Fillitagol 12 - Dewtere Laamɗo Fulfulde Burkina Faso

No haani wuurdee ley leydi Kanaana

¹ Inan kiite e sariyaaji ɗi tinnotoɗon e ɗowtanaade nyannde fuu ley leydi ndi Joomiraaɗo, Laamɗo maamiraaɓe mooɗon hokkata on faa laatoo jeyal mooɗon faa abada ndiin.

Haala nokkuure wootere nde Joomiraaɗo suɓoytoo ndeen

² Kalkon nokkuuje ɗe lenyi ɗi ndiiwoton ɗiin teddinannoo allaaji muɓɓen dow baamle e dow tile e ley leɗɗe bilitinɗe fuu.

³ Kelon cakkirɗe maɓɓe, puson kaaƴe maɓɓe darnaaɗe, mbulon leɗɗe tooru Asera, kalkon allaaji maɓɓe de lallinon inɗe muɓɓen ley nokkuuje ɗeen.

⁴ Taa ngaɗanon Joomiraaɗo, Laamɗo mooɗon oon hono no ɓe ngaɗiranta allaaji maɓɓe noon.

⁵ Ammaa wo ley nokkuure nde Joomiraaɗo, Laamɗo mooɗon suɓoytoo hakkunde lenyi mooɗon faa waɗa joonde muuɗum de tabintina innde muuɗum ndeen tan njahoton pilowoɗon ɗum.

⁶ Wo toon njaaroton kirsamaaji mooɗon buleteeɗi e jakkaaji e dokke aadi e ɗe yardamuye e ko laatii awru daabaaji mon pamari e mawɗi fuu e sadakaaji mooɗon feere feere.

⁷ Wo toon nyaamoton yeeso Joomiraaɗo, Laamɗo mooɗon de onon e yimɓe mon mbeltoroɗon barke mo waɗani on ley golleeji mon fuu.

⁸ Taa ngaɗon no waɗirtee ɗo hannden noon. Taa mono fuu waɗa ko weli ɓernde muuɗum tan,

⁹ sabo on kewtaay nokkuure powtiri ndeen tafon, ɗum woni ndongu ngu Joomiraaɗo, Laamɗo mooɗon hokkata on nguun.

¹⁰ Ammaa nde peƴƴoyɗon Urdun de njooɗiɗon leydi ndi Joomiraaɗo, Laamɗo mooɗon hokki on faa laatoo ndongu mooɗon, tawi oɗon njooɗii e jam sabo o hisinii on e juuɗe wayɓe fiiliiɓe on ɓeen fu,

¹¹ wo ley nokkuure nde o suɓoytoo faa o tabintina innde makko ndeen ngaddoton ko njamirmi on ɗuum fuu. Ɗum woni kirsamaaji buleteeɗi e sadakaaji e jakkaaji e dokke ko artii ɓenndude e gese mon e sadakaaji mooɗon cuɓaaɗi saabe aadi fuu.

¹² Ceyoɗon yeeso Joomiraaɗo, Laamɗo mooɗon, onon e ɓiɓɓe mon rewɓe e worɓe, e maccuɓe mon e horɓe mon e Lewinkooɓe tawaaɓe ley galluuje mon, sabo Lewinkooɓe ngalaa ngeɗu hakkunde mooɗon.

¹³ Tinnoɗon taa cakkon kirsamaaji mon buleteeɗi ley nokkuuje ɗe nji'oyton fuu.

¹⁴ Wo ley nokkuure nde Joomiraaɗo suɓoytoo hakkunde lenyi mooɗon ndeen tan njeyɗon sakkude kirsamaaji mon buleteeɗi ɗiin. Wo toon ngaɗoton ko njamirammi on ɗuum fuu.

¹⁵ Ammaa oɗon mbaawi hirsude kujje mon, nyaamon teewu muɓɓen no kaajoraɗon fuu fodde no Joomiraaɗo, Laamɗo mooɗon barkiniri on ley galluuje mooɗon. Laaɓuɗo e mo laaɓaa fuu na waawi nyaamude ɗum hono no nyaamroton kooba naa lewla.

¹⁶ Ammaa taa nyaamon ƴiiƴam. Ndufon ɗam dow leydi hono ndiyam ni.

¹⁷ Taa nyaamon jakka alkama naa inaboojam kesam naa nebbam, naa awru ndaaba mon magga e pamara naa dokke aadi e ɗe yardamuye naa sadakaaji mooɗon feere feere ley galluuje mooɗon.

¹⁸ Ammaa nyaamon ɗum yeeso Joomiraaɗo, Laamɗo mooɗon, ley nokkuure nde suɓoytoo ndeen onon e ɓiɓɓe mon worɓe e rewɓe e maccuɓe mon e horɓe mon e Lewinkooɓe jooɗiiɓe ley galluuje mon. Ceyoɗon yeeso Joomiraaɗo, Laamɗo mooɗon saabe barke golleeji mooɗon fuu.

¹⁹ Tinnoɗon taa njeeboɗon Lewinkooɓe ɓeen haddi nguurndam mooɗon ley leydi mon ndiin fuu.

²⁰ Nde Joomiraaɗo, Laamɗo mooɗon yaajinowi leydi mon hono no wiirunoo on noon de cuunaɗon teewu faa oɗon mbi'a: «Miɗen kaajanoo teewu min nyaama» fu, oɗon mbaawi nyaamude teewu no kaajoraɗon fuu.

²¹ Si nokkuure nde Joomiraaɗo, Laamɗo mooɗon suɓoytoo faa tabintina innde muuɗum ndeen na woɗɗondiri e galluure mooɗon fu, oɗon mbaawi hirsude daabaaji mon mawɗi e pamari ɗi Joomiraaɗo hokki on fuu fodde no njamirmi on noon. Oɗon mbaawi nyaamude ɗum ley galluuje mon no kaajoraɗon fuu.

²² Nyaamon ɗum hono no nyaamroton kooba naa lewla. Laaɓuɗo e mo laaɓaa fuu na mbaawi nyaamude ɗum.

²³ Ammaa kakkilon sanne taa nyaamon ƴiiƴam, sabo ƴiiƴam wo yonki. Ndelle taa nyaamidon teewu e yonki.

²⁴ Taa nyaamon ɗam, ammaa ndufon ɗam dow leydi hono ndiyam ni.

²⁵ Taa nyaamon ɗam faa keɓon jam onon e ɓiɓɓe mon fuu. Ngaɗon ko fotanta Joomiraaɗo.

²⁶ Ammaa ko ceninanɗon Joomiraaɗo e sadaka saabe aadi tan tilsani on waddude nokkuure nde Joomiraaɗo suɓoytoo ndeen.

²⁷ Si tawii wo kirsamaaji buleteeɗi fu, cakkon teewu majji e ƴiiƴam majji dow sakkirde Joomiraaɗo, Laamɗo mooɗon. Ƴiiƴam kirsamaaji feere du rufee dow sakkirde ndeen de nyaamon teewu muɓɓen.

²⁸ Kettindoɗon jamirooje ɗeen de ngaɗon ko mbiimi faa onon e ɓiɓɓe mon fuu keɓon jam faa abada saabe on ngaɗii ko dartii e ko wooɗi yeeso Joomiraaɗo, Laamɗo mooɗon.

No ɗowtanagol allaaji goɗɗi haɗiraa

²⁹ Nde Joomiraaɗo, Laamɗo mooɗon halkowi lenyi ɗi ndiiwoton de njeyton leydi muɓɓen ɗiin fu,

³⁰ tinnoɗon taa nyemmbiton ɗi, gaɗa ko ɗi kalkaa ɗuum de caamon e tuugol. Kakkilon taa piloɗon faamude ko allaaji maɓɓe ɗiin laatinoo mbi'on: «Noy lenyi ɗiin ɗowtorantonoo allaaji muɓɓen? Minen du, min ngaɗan hono noon!»

³¹ Taa ngaɗanon Joomiraaɗo, Laamɗo mooɗon noon, sabo lenyi ɗiin na ngaɗannoo kujje bonɗe nyiddiniiɗe ɗe Joomiraaɗo wanyi faa iɓe mbulanannoo allaaji maɓɓe ɗiin ɓiɓɓe maɓɓe worɓe e rewɓe.