Fillitagol 11 - Dewtere Laamɗo Fulfulde Burkina Faso

Miccintingol ko Joomiraaɗo waɗani Israa'iila

¹ Njiɗon Joomiraaɗo, Laamɗo mooɗo n de njogitoɗon jamirooje e kiite e sariyaaji muuɗum fuu faa abada.

² Miccitoɗon hannden ko Joomiraaɗo waɗi, de sukaaɓe mooɗon ɓeen kaa nji'aay ɗuum: Ɓe anndaano ekintinooje ɗe Joomiraaɗo, Laamɗo mooɗon hokki on ɗeen. Ɓe nji'aay manngu muuɗum e baawɗe muuɗum e semmbe muuɗum mawɗo oon.

³ Ɓe nji'aay maandeeji muuɗum e ko waɗi Fira'awna kaananke Misira e leydi ndiin fuu ɗuum.

⁴ Ɓe nji'aay ko o waɗi konunkooɓe Misira e pucci muɓɓen e torkooji muɓɓen. No o yooliri ɗum'en ley ndiyam Maayo Maaliya wakkati ndiiwannoo on ndeen e no o lalliniri ɓe fuu faa warde hannden noon.

⁵ Ɓe nji'aay ko o waɗani on ley ladde yoornde faa njottiɗon nokkuure ndee.

⁶ Ɓe nji'aay ko o waɗi Datan e Abiram ɓiɓɓe Eliyaba mo lenyol Ruben ɓeen. No leydi omtorii moɗi ɗum'en kam'en e koreeji muɓɓen e hukumuuji muɓɓen e kujje muɓɓen e rewunooɓe ɗum'en fuu.

⁷ Onon le, gite mon nji'ii kujje mawɗe ɗe Joomiraaɗo waɗi ɗeen fuu.

⁸ Ndelle ndeenon jamirooje ɗe ekintinammi on hannden ɗeen faa keɓon semmbe mo teetirowon leydi ndi ponndiɗon faa laatoo jeyal mooɗon ndiin.

⁹ Noon waɗata de balɗe mon njuuta ley leydi ndi Joomiraaɗo hunanii maamiraaɓe mon hokkan ɗum'en kam'en e taaniraaɓe muɓɓen, ndi kosam e njuumndi ilata e muuɗum ndiin.

No Joomiraaɗo haybirta leydi podaandi ndiin

¹⁰ Leydi ndi naatoton faa teeton ndiin, worraa hono Misira to mburtiɗon, to aawotonno de na on mbiccana gese mon ndiyam hono no sardiŋe ni.

¹¹ Leydi ndi njeytoyton ndiin wo ndi baamle e naɗɗi, ndi ƴuwoonde yarnata.

¹² Leydi ndiin wo ndi Joomiraaɗo, Laamɗo mooɗon haybanta, ndi gite muuɗum ndaarata wakkati fuu gilla puɗɗam hitaande faa timmoode muuɗum.

¹³ Si on kakkilanii jamirooje ɗe kokkammi on hannden, on njiɗii Joomiraaɗo, Laamɗo mooɗon, on ɗowtanake mo e ɓerɗe mon e yonkiiji mon fuu,

¹⁴ o hokkan on ƴuwoole lobbe wakkati muɓɓen. O hokkan on ndiyam dabbunde e gataaje faa keɓon alkama e inaboojam kesam e nebbam.

¹⁵ Mi fuɗinanan daabaaji mon huɗo ley ladde. On nyaaman kaaron.

¹⁶ Kakkilon taa ɓerɗe mon oonyoroo gere de ndikkinoɗon yeeso allaaji goɗɗi faa ɗowtanoɗon ɗum'en.

¹⁷ Si on ngaɗii noon fu, tikkere Joomiraaɗo saaman dow mooɗon. O ommban kammu, o haɗa ƴuwoonde toɓude. Leydi accitan rimude de piɗɗeɗon law ley leydi lobbiri ndi Joomiraaɗo hokkata on ndiin.

¹⁸ Ndelle njogitoɗon jamirooje ɗe kokkammi on ɗeen ley ɓerɗe mon e ley yonkiiji mooɗon. Kaɓɓon ɗe e juuɗe mooɗon hono maande, takkon ɗe dow tiiɗe mon.

¹⁹ Ekintinon ɗe ɓiɓɓe mon, kaalon haala majje nde njooɗiɗon ley galleeji mon, nde njaaton e laawi, nde pukkotoɗon e nde ummotoɗon fuu.

²⁰ Mbinndon ɗe dow bimmbeeje dammbuɗe cuuɗi mon e dow dammbuɗe galluuje mooɗon.

²¹ Ndeen balɗe mooɗon e ɗe ɓiɓɓe mooɗon fuu njuutiran ley leydi ndi Joomiraaɗo huninoo hokkan maamiraaɓe mon ndiin hono no kammu ɓooyri dow leydi ni.

²² Sabo si on njogitake jamirooje ɗe ekintinammi on, on ngaɗii ko ɗe mbi'i, on njiɗii Joomiraaɗo, Laamɗo mooɗon, on ndewii laabi muuɗum, on kaɓɓondirii e muuɗum fu,

²³ riiwan lenyi ɗiin fuu yeeso mooɗon de teeton leyɗe lenyi ɓurɗi on manngu e semmbe.

²⁴ Nokku fuu ɗo koyɗe mooɗon njaaɓi, laatoto jeyal mooɗon. Leydi mooɗon fuɗɗan gilla ladde yoornde faro horɗoore e Liban faro soɓɓirre, yaade maayo Efrat faro lettugal faa yottoo maayo manngo faro gorgal.

²⁵ Fay gooto waawataa daraade yeeso mooɗon. To njottiɗon e leydi ndiin fuu Joomiraaɗo, Laamɗo mooɗon waɗan kuleɗon kulol manngol faa ɓerɗe yimɓe ɓeen ndiwna fodde no wi'iri on noon.

Haala barke e kuddi

²⁶ Ndaaron, hannden miɗo wadda barke e kuddi yeeso mooɗon.

²⁷ On keɓan barke si on kettindake jamirooje Joomiraaɗo, Laamɗo mooɗon ɗe ekintinammi on hannden ɗeen.

²⁸ On kuɗete si on kettindaaki jamirooje Joomiraaɗo, Laamɗo mooɗon, si on celii laawol ngol kollammi on hannden faa ndewon allaaji goɗɗi ɗi on anndaa.

²⁹ Nde Joomiraaɗo, Laamɗo mooɗon nannowi on leydi ndi njeytoton ndiin fu, mbarkinon dow waamnde Garijim de kuɗon dow waamnde Ebal.

³⁰ Baamle ɗeen na keedi gorgal Urdun, leydi Kanaaninkooɓe jooɗiiɓe ley njaayri Araba yeeso Gilgal ɗakkol leɗɗe mawɗe ɗe Moore,

³¹ sabo on peƴƴan Urdun faa njeytowon leydi ndi Joomiraaɗo, Laamɗo mooɗon hokkata on ndiin de njooɗoɗon e mayri.

³² Tinnoɗon e ɗowtanaade kiite e sariyaaji ɗi kokkumi on hannden ɗiin fuu.