Ester 9 - Dewtere Laamɗo Fulfulde Burkina Faso

No wayɓe Yahuudiyankooɓe kalkiraa

¹ Nyannde 13 lewru sappo e ɗiɗaɓurdu (lewru Adar) ndeen yottii. Tawi nyalaande ndeen woni nde wayɓe Yahuudiyankooɓe podinoo heɓude baawɗe dow muɓɓen fodde no Haman yamirnoo e innde kaananke. Ammaa aadi oon waylitake de Yahuudiyankooɓe keɓi baawɗe dow wayɓe muɓɓen.

² Yahuudiyankooɓe fuu na kawrita nokku gooto ley galluuje muɓɓen nder leyɗe laamu Jerjes fuu, faa kabda e filotooɓe waɗude ɗum'en ko boni ɓeen. Walaa fuu baawɗo daraade yeeso maɓɓe saabe kulol manngol ngol lenyi keddiiɗi fuu kulata ɓe.

³ Ardiiɓe leyɗe e goforneere'en e gollidooɓe e howruuɓe kaananke fuu na mballita Yahuudiyankooɓe saabe iɓe kula Mordakay sanne.

⁴ Mordakay laatii neɗɗo teddinaaɗo sanne ley laamordu kaananke Jerjes. Kabaaru teddeengal makko sankitii e leyɗe fuu, wooɗi manngu innde makko na ɓeydoo weeti fu.

⁵ Yahuudiyankooɓe coppiri wayɓe muɓɓen kaafaaje, mbari ɗum'en, kalki ɓe, ngaɗi ɓe ko kaajaa.

⁶ Ley piilol laamordu huɓeere Suus ɗon tan, Yahuudiyankooɓe mbari, kalki worɓe 500,

^7-10 tawti ɓiɓɓe Haman (ɓii Hammedata ganyo Yahuudiyankooɓe) sappo. Ɗum woni Parsandata e Dalfon e Aspata e Poorat e Adaliya e Aridata e Parmasta e Arisay e Ariday e Wayjaata. Ammaa ɓe adaay jawdi muɓɓen.

¹¹ Nyannde majjum kaananke haalanaa limoore yimɓe ley piilol laamordu huɓeere Suus ɓe Yahuudiyankooɓe mbari.

¹² Ndeen kaananke wi'i deekum Ester: — Ley piilol laamordu huɓeere Suus ɗo tan, Yahuudiyankooɓe mbarii yimɓe 500 tawti ɓiɓɓe Haman 10. Yimɓe foto tawetee ɓe mbarii ley leyɗe laamu am goɗɗe? Ammaa fay e noon, si nii a ŋaarake kam goɗɗum feere katin, mi hokkete, mi waɗante ko muuyɗaa fuu.

¹³ Ester jaabii wi'i: — Si nii kaananke yardake, jaango katin Yahuudiyankooɓe tawaaɓe ley huɓeere Suus fuu ngaɗa hono noon fodde ko winndaa ley ɓataakiiji ɗiin; ɓiɓɓe Haman maayɓe ɓeen du, ɓilee.

¹⁴ Kaananke waɗi yamiroore ndeen gooyna ley huɓeere Suus ɗon, ɓiɓɓe Haman du, ɓilaa.

¹⁵ Yahuudiyankooɓe huɓeere Suus kawriti katin ley nyalaande sappo e nayaɓerde lewru Adar nduun, ɓe mbari worɓe 300 ammaa ɓe adaay faa'e e jawdi muɓɓen.

¹⁶ Yahuudiyankooɓe galluuje keddiiɗe du, kawriti ndaranii yonkiiji muɓɓen, mbari wayɓe muɓɓen 75.000 faa keɓa njooɗoo e jam, ammaa ɓe adaay fay huunde e jawdi muɓɓen.

¹⁷ Ɗum waɗii nyannde 13 lewru Adar. Nyannde 14 lewru nduun, ɓe powtinii de ɓe ngaɗi weltaare mawnde.

¹⁸ Yahuudiyankooɓe Suus du, mbariri wayɓe muɓɓen balɗe ɗiɗi (nyalaande 13 e nde 14) de powtinii. Ɓe ngaɗi weltaare maɓɓe mawnde nyannde 15 lewru Adar.

¹⁹ Ɗum hollata ko saabi de Yahuudiyankooɓe gure ladde e galluuje pamare na kiira nder seyo manngo e hokkondirgol dokke nyannde 14 lewru Adar.

No hiiro Purim tabintiniraa

²⁰ Mordakay winndi ko waɗi fuu de neldi ɓataakiiji ɗiin Yahuudiyankooɓe jooɗiiɓe leyɗe ɓattiiɗe e boɗɗuɗe ɗe Jerjes laami dow muɓɓen fuu.

²¹ O wi'i ɓe, ɓe ngaɗa weltaare mawnde hitaande fuu nyannde 14 e 15 lewru Adar.

²² Saabe balɗe ɗeen Yahuudiyankooɓe keɓunoo baawɗe dow wayɓe muɓɓen. Ley lewru nduun, suno maɓɓe waylitii seyo, mettorgal maɓɓe du, waylitii weltaare mawnde. Iɓe ngaɗa hiirooji hitaande fuu wakkati lewru nduun, iɓe ceyoo, iɓe kokkondira dokke e nyaamdu, iɓe mballita talkaaɓe saabe ɓe keɓii jooɗaade e jam hakkunde wayɓe maɓɓe.

²³ Yahuudiyankooɓe njaɓi ko Mordakay winndi, ɓe ngaɗi weltaare ndeen hitaande go'aɓerde de ɗum laati finaatawaa maɓɓe.

^24-26 Nyalaaɗe ɗeen na inndiree Purim, ɗum woni cumnal, sabo Haman ɓii Hammedata Agaagiyanke, ganyo maɓɓe oon, waɗiino cumnal faa faama wakkati mo halkere maɓɓe ndeen haani waɗeede. Ammaa nde kabaaru oon yottinoo kaananke fu, anniya makko bonɗo oon yecci e makko. Noon kanko e ɓiɓɓe makko fuu njorfitoraa. Yahuudiyankooɓe njogitii ɓataaki Mordakay, ko winndaa ley makki e ko njiiri gite muɓɓen fuu.

²⁷ Ɓe kunii tabintinde waɗugol weltaare ndeen e ko ɗowtata nde fuu finaatawaa maɓɓe, kamɓe e ɓiɓɓe maɓɓe, e taaniraaɓe maɓɓe e tokkuɓe diina Yahuudiyankooɓe fuu. Ley hitaande fuu balɗe ɗiɗi ɗeen cuɓaa faa hiirooji ɗiin ngaɗee fodde no Mordakay yamiri.

²⁸ Nyalaaɗe Purim ɗeen na miccitee ley cuuɗi e leyɗe e galluuje ley jamaanuuji fuu. Yahuudiyankooɓe accitataa waɗude hiirooji Purim ɗiin faa abada.

²⁹ Ester ɓii Abihayil dee kaananke e Mordakay Yahuudiyanke mbinnditii ɓataakiiji dow hiiro Purim ngoon faa ngo tabintinee.

³⁰ Ɓe neldi Yahuudiyankooɓe leyɗe laamu Jerjes 127 fuu ɓataakiiji burwaaga jam e hoolaare.

³¹ Ley ɓataakiiji ɗiin na winndaa ko Ester e Mordakay njamiri dow nyalaaɗe Purim ɗeen e dow suumayeere e boytaali.

³² Jamirooje Ester ɗeen ɓeydi tabintingol hiirooji Purim ɗiin de ɗum winndaa nder dewtere kabaaruuji.