Ester 7 - Dewtere Laamɗo Fulfulde Burkina Faso

No Haman saamiri

^1-2 Kaananke e Haman ngardi weltaare Ester ɗiɗaɓerde ndeen. Wakkati ɓe njarannoo cabijam ndeen, kaananke ƴami Ester katin wi'i: — Ɗume woni ŋaarnde maaɗa, Ester? Miɗo yardi hokkude ma huunde fuu ko kaajaɗaa. Fay si wo feccere laamu am, a heɓan ɗum.

³ Ndeen Ester jaabii mo wi'i: — Si nii kaananke yardake, si miin mi keɓɗo hinney yeeso muuɗum, si ɗum na fotani mo fuu, mi wuura woni ko kaajaami; lenyol am hisa woni ŋaarnde am.

⁴ Miin e lenyol am min connaama faa min kalkee, min mbaree, min timminee. Si nii wo min connirano hono maccuɓe fu, mi deƴƴintono sabo ɗuum hewtaay mi tampina kaananke.

⁵ Ndeen kaananke ƴami Ester wi'i: — Moy woni oon? Toy cuusuɗo waɗude hono ɗuum oon woni?

⁶ Ester jaabii wi'i: — Ganyo kabdoo e amin oon, wo Haman bonɗo o! Kulol manngol nanngi Haman yeeso kaananke e deekum.

⁷ Kaananke ummodii e mettorgal ɓernde manngal, dilli weltaare ɗoon, yehi ley sardiŋe laamordu. Haman du, heddi ina ŋaaro Ester sawranoo ɗum faa yonki muuɗum hisa maayde sabo o faami kaananke anniyake warude mo.

⁸ Wakkati kaananke Jerjes yeccotonoo weltaare ɗoon, tawi Haman na hippi dow jooɗorgal Ester. Ndeen kaananke feekii wi'i: — Ndelle Haman na anniyii nanngude deekam, miɗo tawa ley laamordu am ɗo naa? Kaananke timminaay haala kan de gollooɓe muuɗum njottii cuddi yeeso Haman.

⁹ Harabona, gooto e gollooɓe kaananke wi'i: — Haman moƴƴinaniino Mordakay kisinɗo kaananke maayde oon leggal faa njorfitoree. Leggal ngaal na woni ley suudu makko. Tooweefi maggal, wo piyanɗe 50. Kaananke jaabii wi'i: — O jorfitoree ngal!

¹⁰ Noon Haman jorfitoraa dow leggal ngal moƴƴinanno Mordakay ngaal. Ɗum feewtini ɓernde kaananke.