Ester 6 - Dewtere Laamɗo Fulfulde Burkina Faso

No Haman doolɗiraa teddina Mordakay

¹ Ley jemma oon, kaananke hunngii ɗaanaade. O ɗaɓɓi o waddanee dewtere kabaaruuji laamu makko. Dewtere ndeen waddaa de o janganaa nde.

² Ley dewtere ndeen na winndaa no Mordakay faamiri de holli ko gollanooɓe kaananke, ɗum woni Bigitan e Teres doomooɓe dammbuɗe laamordu na ngondunoo e anniya warude kaananke.

³ Kaananke ƴami wi'i: — Ɗume Mordakay oon teddiniraa saabe majjum? Gollooɓe makko njaabii mbi'i: — O waɗanaaka faa'e.

⁴ Ndeen kaananke wi'i: — Moy woni ley laamordu ɗo joonin? Tawi wakkati oon pay, Haman yotti naati ley ɓaade ndeen, faa ŋaaro kaananke Mordakay jorfitoree leggal ngal moƴƴinani ɗum ngaal.

⁵ Gollanooɓe kaananke njaabii ɗum mbi'i: — Wo Haman tan woni ɗo joonin. Kaananke wi'i: — O naata!

⁶ Haman naati. Kaananke ƴami mo wi'i: — Ɗume kaanumi waɗande neɗɗo mo kaajaami teddinde sanne? Haman miili ley ɓernde muuɗum wi'i: «Moy kaananke haaja teddinirde nii fu, si wanaa miin?»

⁷ O wi'i kaananke: — Si nii kaananke na haajaa teddinde joomum fuu,

⁸ hokka ɗum kaddungal ngal kam e hoorem ɓorninoo de waɗɗina ɗum puccu ngu kam e hoorem waɗɗinoo, tawa pilkol laamu na hippii dow hoore puccu nguun.

⁹ Ndelle gollanooɓe ma ɓorna joomum saayo laamu ngoon, mbaɗɗinaa ɗum puccu maaɗa de naanda ɗum hakkunde galluure, na peekoo na mbi'a: «Inan no kaananke waɗanta neɗɗo mo yiɗi teddinde!»

¹⁰ Kaananke wi'i Haman: — Yahu law kooƴowaa kaddungal ngaal e puccu nguun de ngaɗanaa Mordakay hono no mbiiruɗaa noon. Mordakay oon wo Yahuudiyanke jooɗiiɗo dammbugal laamordu oon. Taa njeggitaa fay gootum e ko mbiiɗaa imo haani waɗaneede ɗuum fuu.

¹¹ Haman yehi, ɓornowi Mordakay saayo laamu de waɗɗini ɗum puccu nguun, o dillidi e muuɗum, o nanndi ɗum ley galluure imo feekoo imo wi'a: «Inan no kaananke waɗanta neɗɗo mo yiɗi teddinde!»

¹² Caggal ɗuum, Mordakay warti dammbugal suudu laamordu. Haman du hootidi wuro muuɗum e mettorgal ɓernde, na suddi yeeso muuɗum saabe semteende.

¹³ O haalani tindinooɓe makko, ɗum woni deekiiko Jerees e yigiraaɓe makko ko hewtii mo, de ɓeen mbi'i mo: — Saabe Mordakay mo puɗɗuɗaa leeƴineede yeeso muuɗum oon wo Yahuudiyanke, a waawataa ɓantude hoore maaɗa yeeso makko katin. Lamnu a heddoto aɗa leeƴi yeeso makko faa abada.

¹⁴ Ɓe timminaay haala maɓɓe de gollooɓe kaananke njottodii e henyaare faa njaara Haman weltaare Ester ndeen.