Ardiiɓe 4 - Dewtere Laamɗo Fulfulde Burkina Faso

Deboora ardiiɗo

¹ Caggal maayde Ehut, Israa'iilankooɓe puɗɗiti waɗude ko boni yeeso Joomiraaɗo.

² Ndeen Joomiraaɗo ummini kaananke Kanaana haɓi e maɓɓe, jaalii ɓe. Innde makko wo Yabin. Laamorde makko ina woni ley ngalluure Haajor. Mawɗo sordaasiiɓe makko ina wi'ee Sisera. Kam du ina jooɗii to Haroset-Goyim.

³ Ina woodi torkooji pucci 900 gaɗiraaɗi njamndi ɓaleeri. O torri Israa'iilankooɓe torra naawɗo sanne faa waɗi duuɓi 20. Saabe majjum, ɓe mbullitii to Joomiraaɗo.

⁴ Ley wakkati oon ina woodunoo annabaajo debbo gomma bi'eteeɗo Deboora, dee Lapidot. Kanko wonnoo ardiiɗo Israa'iilankooɓe e nyalaaɗe ɗeen.

⁵ Imo jooɗoo ley ɗowki ngelleehi hakkunde Rama e Baytila, nder leydi Efrayimankooɓe. Ɗoon Israa'iilankooɓe ngarata faa o hiitoo ɗum'en. Ɓe noddirii ngelleehi kiin Ngelleehi Deboora.

⁶ Nyannde gomma, o nelani Barak ɓii Abinowam mo ngalluure Kedes jeyaaɗo ley leydi Naftali noddowee. O wi'i ɗum: — Inan ko Joomiraaɗo, Laamɗo Israa'iila yamiri ma: «Yahu hooƴu konunkooɓe ley lenyol Naftali e ley lenyol Jabulon, waɗooɓe 10.000, kawriton waamnde Taabor.

⁷ Miin du, mi waddante Sisera mawɗo sordaasiiɓe Yabin, to gooruwol Kison, kanko e torkooji pucci makko e konunkooɓe makko. Mi wattan mo e junngo maaɗa.»

⁸ Barak wi'i Deboora: — Si a yaadan e am, mi yahan. Si a yaadataa e am du, mi yahataa.

⁹ Deboora wi'i mo: — Wooɗi, mi yaadan e maaɗa, ammaa a heɓataa teddeengal ley konu nguun, sabo Joomiraaɗo wattan Sisera e junngo debbo! Caggal ɗuum, Deboora ummii dillidi e Barak, ɓe njaadi ngalluure Kedes.

¹⁰ Toon Barak noddi yimɓe Jabulon e Naftali kawrita. Worɓe waɗooɓe 10.000 ngari njokki mo. Deboora du yaadi e makko.

¹¹ Ley balɗe ɗeen ina woodi Keniyankeejo gomma jooɗiiɗo ɗoon, bi'eteeɗo Heber. O seedi e Keniyankooɓe heddiiɓe, kam'en ngoni ɓiɓɓe Hobab esoo Muusaa. O yehi, o tonti hukum makko ɗakkol lekki mawki to Sa'ananim, ɗakkol Kedes.

¹² Wooɗi, wakkati oon ɓe kumpiti Sisera, ɓe mbi'i: — Haya, inan Barak ɓii Abinowam ƴeeŋii waamnde Taabor.

¹³ Ndeen Sisera noddi tayre sordaasiiɓe wonduɓe e muuɗum ɓeen fuu, e torkooji pucci muuɗum 900 gaɗiraaɗi njamndi ɓaleeri. Ɓe ummii gilla Haroset-Goyim, ɓe njehi faa gooruwol Kison.

¹⁴ Ndeen Deboora wi'i Barak: — Umma! Sabo hannden wo nyalaande nde Joomiraaɗo wattata Sisera e junngo maaɗa. Joomiraaɗo e hoorem ina woni yeeso maaɗa faa ɗowe. Barak jippii waamnde Taabor, konunkooɓe 10.000 ina njokki caggal muuɗum.

¹⁵ Nde Barak e konunkooɓe muuɗum coortunoo kaafaaje muɓɓen naati e wolde ndeen fu, Joomiraaɗo jiiɓi hakkillooji Sisera e worɓe waɗɗiiɓe torkooji pucci muuɗum e konunkooɓe muuɗum fuu. Sisera jippii torkooru puccu muuɗum, doggi e koyɗe.

¹⁶ Barak riiwi jamaa konunkooɓe ɓeen fuu e waɗɗiiɓe torkooji ɓeen du faa Haroset-Goyim. Konunkooɓe Sisera fuu mbardaa kaafaaje, fay gooto hisaay.

¹⁷ Sisera tan heɓi doggi. O doggiri hukum Ya'el. Ya'el wo dee Heber Keniyankeejo oon. Sisera doggiri toon sabo potal ina woni hakkunde wuro Heber e Yabin, kaananke Haajor.

¹⁸ Ya'el wurtii jaɓɓowii Sisera, wi'i ɗum: — Naatu ɗoo, joomam. Naatu, taa hulu. O darii, o naati ley hukum Ya'el. Oon du adi suddamaare muuɗum, suddi mo.

¹⁹ Ndeen o wi'i Ya'el: — Miɗo ŋaare, kokkoraa kam ndiyam seeɗa mi yara. Sabo miɗo ɗomɗi sanne. Ndeen oon omti jollooru kosam. O hokki Sisera, yari. Caggal ɗuum, o suddi ɗum.

²⁰ Sisera wi'i mo: — Yahu darowa to dammbugal toon. Si goɗɗo warii ƴamii ma yalla won gonɗo ga fu, mbi'aa ɗum walaa.

²¹ Ndeen o ɗaanii ɗoyngol teddungol saabe o tampii. Wakkati oon, Ya'el hooƴi tontoode e tontirde, yottorii heese-heese, tonti nde e laalagal hoore makko. Tontoode ndeen naati faa yottii leydi, de o maayi.

²² Wooɗi, wakkati oon, Barak ina filonoo Sisera de nanngaay ɗum tafon. Ya'el wurtii jaɓɓitowii mo, wi'i: — War faa mi holle mo pilotoɗaa oon. O jokki debbo oon faa e ley hukum, o tawi inan Sisera ina waali wo baraaɗo, tontoode ina ɗisii e hoorem.

²³ Nyannde ndeen Laamɗo hokki Israa'iilankooɓe jaalagol dow Yabin, kaananke Kanaana.

²⁴ Illa ndeen Israa'iilankooɓe celaay honude Yabin faa ɓe kalki ɗum.