Ardiiɓe 17 - Dewtere Laamɗo Fulfulde Burkina Faso

Allaaji ɗi Mika waɗani hoore muuɗum

¹ Ina woodunoo gorko gomma jeyaaɗo leydi ngonndi dow baamle Efrayim, ina wi'ee Mika.

² O wi'i inniiko: — Yeeso am kuɗuɗaa kooƴuɗo ceede cardi 1.100 majjanɗe ma ɗeen. Ceede ɗeen, inani ɗe e junngo am. Wo miin hooƴi ɗe. Ndeen inniiko wi'i mo: — Ɓiyam, Joomiraaɗo barkinɗine!

³ Mika hokkiti innum buuɗi cardi 1.100 ɗiin. De inniiko oon wi'i: — Haya, mi hokkan ɗi Joomiraaɗo saabe ɓiyam. Mi waɗa ɗi ngaɗee natal allaaji e tooru siiwiraandu cardi. Wooɗi, joonin kaa mi yeccinan ɗi to ma.

⁴ Nde Mika hokkitinnoo innum cardi ndiin fu, oon itti buuɗi cardi 200 ley majji, yaari to bahillo faa waɗa nate allaaji e tooru siiwaandu. Caggal ɗuum ɓe ngaddi ɗi, ɓe ndesi ɗi nder suudu Mika.

⁵ Tawi Mika ina woodi suudu dewal muuɗum. O sanyi saaya ka mawɓe diina ɓornotoo, o waɗi tooruuji cehaaɗi, ndeen o suɓii gooto hakkunde ɓiɓɓe makko laatoo almaami ley suudu makko.

⁶ Ley balɗe ɗeen, Israa'iilankooɓe ngalaano kaananke. Mono fuu ina waɗa ko weli ɗum tan.

⁷ Ina woodunoo jokolle Lewinkeejo gomma jeyaaɗo wuro Baytilaama nder leydi Yahuuda. Imo jooɗii hakkunde Yahuudiyankooɓe toon.

⁸ De o eggi Baytilaama ley leydi Yahuuda, o yehi imo filoo nokkuure ɗo hoɗa. Nder jahaangal makko ngaal, o faltorii dow baamle Efrayim faa o yottii suudu Mika.

⁹ Mika ƴami mo, wi'i: — Toy ƴuuruɗaa? O wi'i: — Miin, mi Lewinkeejo ƴuuruɗo wuro Baytilaama nder Yahuuda. Ley jahaangal ngonumi joonin. Miɗo filoo nokku ɗo koɗanmi.

¹⁰ Ndeen Mika wi'i mo: — Ndelle jooɗa ley ɓaade am, laatanoɗaa kam baabiiwo e almaami dow suudu am. Miin du, mi hokkete buuɗi cardi sappo ley hitaande fuu. Katin du mi hokkete nyaamdu e kolte.

¹¹ Lewinkeejo oon jaɓi jooɗaade ley ɓaade Mika. Mika adi mo hono ɓiyum ni.

¹² Mika waɗi mo almaami, imo gollana ɗum. O heddii ley ɓaade muuɗum.

¹³ Caggal ɗuum, Mika wi'itii: — Joonin miɗo anndi Joomiraaɗo hollan kam moƴƴere muuɗum, sabo miɗo woodi Lewinkeejo laataniiɗo kam almaami!