Amos 3 - Dewtere Laamɗo Fulfulde Burkina Faso

Kiite dow Israa'iila

¹ Kettindee konngol ngol Joomiraaɗo haali dow mooɗon, onon Israa'iila'en, lenyol muɓɓol ngol wurtini leydi Misira ngool:

² Mi senndii on onon tan hakkunde lenyi adunaaru fuu. Saabe ɗuum de mi hiitoto hakkeeji mooɗon ɗiin fuu.

³ Yalla yimɓe ɗiɗo na njaada tawaa paamiraay naa?

⁴ Laddeeru le, na ubba ley cukkuri si heɓaay ko hampi naa? Ɓii laddeeru na figinoo ley ngayka si nangaay faa'e naa?

⁵ Yalla foondu na saama ley tuugol dow leydi si nyaamdu muuɗum tawaaka toon? Yalla tuugol na ɓantoo tawa faa'e meemaay ɗum naa?

⁶ Si luwal konu fuufaama ley galluure yalla na woodi mo diwnataa naa? Masiiba le, na hewtoo galluure tawa wanaa Joomiraaɗo neldi ɗum?

⁷ Ndelle Laamɗo Joomiraaɗo waɗataa faa'e tawa ɓanginanaay ɗum gollooɓe muuɗum annabaaɓe ɓeen.

⁸ Si laddeeru ubbii, moy woni hulataa? Si Laamɗo Joomiraaɗo haalii, moy woni yottintaa konngol ngool?

⁹ Ley laamorɗi Asdod e ley ɗi Misira, ngoynee mbi'on: Kawritee dow baamle Samariya de ndaaron no galluure ndeen jiiɓondiri e torra ka wuurdi.

¹⁰ Yimɓe ɓeen anndaa waɗude ko dartii. Noon Joomiraaɗo wi'i. Iɓe kebbini laamorɗi maɓɓe jawdi teetiraandi semmbe.

¹¹ Saabe ɗuum de inan ko Joomiraaɗo wi'i: Ganyo fiilnan leydi ndiin, ɓola semmbe mayri de jawdi laamorɗi maaɗa ɓoɓtee.

¹² Inan ko Joomiraaɗo wi'i: Hono no duroowo teetirta koyɗe mbaalu ɗiɗi naa mbukkudi nowru muuɗum e hunnduko laddeeru nii, wo noon Israa'iila'en jooɗiiɓe Samariya ɓeen kisinirtee, ŋappitere leeso e seeɗa daɗɗo tan heddotoo.

¹³ Kettindee de ceedoɗon bone suudu Yaakuuba. Noon Joomiraaɗo, Laamɗo Jom Kammu e Leydi oon wi'i.

¹⁴ Nyannde carotoomi Israa'iila saabe hakkeeji muuɗum ndeen, mi halkan cakkirɗe Baytila. Luwe sakkirde ndeen kelete de caama e leydi.

¹⁵ Mi liɓan cuuɗi ceeɗu e ɗi ndunngu fuu. Cuuɗi nyiɓiraaɗi nyiiƴe nyiibi ɗiin kalkete. Ɗum laatoto timmoode cuuɗi yimɓe tedduɓe. Noon Joomiraaɗo wi'i.