2 Samuwiila 8 - Dewtere Laamɗo Fulfulde Burkina Faso

Bolwole Daawda

¹ Caggal ɗuum Daawda jaalii Filistiyankooɓe, leeƴini ɓe. Katin du, o teeti ngalluure maɓɓe mawnde e laamu mayre.

² Daawda jaalii Mo'abinkooɓe du. O fukkini nanngaaɓe ɓeen e leydi de o fonndiri ɓe e ɓoggol ponndirgol. Si ɓoggol ngool fonndaama e fukkiiɓe ɓeen kile ɗiɗi fu, ɓeen kaa mbaree. Si ngol fonndaama nde wootere du, ɓeen kaa accee mbuura. Mo'abinkooɓe ɓeen laatii maccuɓe Daawda, iɓe njoɓa ɗum lampo.

³ Katin du, Daawda jaalii kaananke leydi Soba, bi'eteeɗo Hadadeser ɓii Rehoob. O haɓdi e muuɗum wakkati yahunoo faa semmbina laamu muuɗum to maayo Efaratis ndeen.

⁴ Daawda nanngi dorbotooɓe pucci makko 1.700 e sordaasiiɓe 20.000. O taƴi codduli pucci ɗiin, ammaa o heddanii hoore makko 100 majji.

⁵ Siiriyankooɓe jeyaaɓe Damas ngarii faa mballa Hadadeser kaananke Soba, ammaa Daawda jaalake hakkunde maɓɓe worɓe 22.000.

⁶ Daawda joƴƴini kawrite dawrooɓe faro Damas toon, de Siiriyankooɓe ɓeen du laatii maccuɓe Daawda na njoɓa ɗum lampo. Nokku fuu to Daawda yehi, Joomiraaɗo na hokka ɗum jaalagol.

⁷ Daawda jaɓii bawaaɗe kaŋŋe ɗe maccuɓe Hadadeser tiiginoo ɗeen, yaari ɗe Urusaliima.

⁸ Daawda itti alhan faa heewi e ley galluuje bi'eteeɗe Beeta e Berotay ɗe Hadadeser jeynoo ɗeen.

⁹ Wooɗi, kaananke leydi Hamat na wi'ee To'i. O humpitaa Daawda jaalake sordaasiiɓe Hadadeser fuu.

¹⁰ Ndelle o nuli ɓiyiiko Yoram to Daawda faa o jowta ɗum, o yetta (o barkina) ɗum ley ko jaalii Hadadeser, sabo tawa Hadadeser na haɓannoo e makko sanne. Yoram yaarani Daawda dokke gaɗiraaɗe cardi e kaŋŋe e alhan.

¹¹ Daawda senini kujje ɗeen to Joomiraaɗo hono no o seniniri cardi e kaŋŋe ko ƴuuri e leyɗe ɗe o jaalii fuu.

¹² Leyɗe ɗeen wo Edom e Mo'ab e Amon e Filistiya e Amalek. Gineeji ɗi o honi to Hadadeser ɓii Rehoob kaananke Soba du, o senini ɗi saabe Joomiraaɗo.

¹³ Innde Daawda ɓeydi mawnude (na nanee e tatteeji fuu) gaɗa ko warti wolde e Edominkooɓe. Ley wolde ndeen o wari Edominkooɓe 18.000 ley Naɗɗol Lamɗam.

¹⁴ O joƴƴini kawrite dawrooɓe ley leydi Edom fuu. Yimɓe Edom ɓeen fuu laatii maccuɓe makko. To Daawda yehi fuu Joomiraaɗo na hokka ɗum jaalagol.

Gollidooɓe e Daawda

¹⁵ Daawda laamii Israa'iila fuu, ina waɗa ko dartii e ko fonnditii dow yimɓem.

¹⁶ Hooreejo sordaasiiɓe Daawda wo Yo'ab ɓii Seruya. Kokkoowo kabaaruuji wo Yehosafat ɓii Ahilut.

¹⁷ Almaami'en wo Sadok ɓii Ahituf e Ahimelek ɓii Abiyatar. Seraya du wo binndanoowo laamiiɗo.

¹⁸ Benaya ɓii Yehoyada wo hooreejo Karti'en e Peleti'en. Ɓiɓɓe Daawda worɓe du, wo ardiiɓe ley laamordu.