2 Samuwiila 11 - Dewtere Laamɗo Fulfulde Burkina Faso

Daawda e Batseeba

¹ Wakkati gataaje fu, kaanankooɓe mburtoto faa kaɓowee. Wo wakkati oon Daawda nulii Yo'ab e maccuɓe mum e sordaasiiɓe Israa'iila fuu, faa ɓe kaɓa e Amoninkooɓe. Ɓe njehi, ɓe kalki ɗum'en. Ndeen ɓe piilii wuro Rabba. Daawda kaa yahaay. Imo heddii Urusaliima.

² Nyannde gomma, wakkati laasara peewɗo, Daawda ummii e leesom na waancoo dow suudu mum laamordu. Illa e dow suudu toon o yi'i debbo gomma na lootoo. Debbo oon na ŋarɗi sanne.

³ Daawda nuli faa humpitoo kabaaru debbo oon. O wi'aa: — Oon wo Batseeba, ɓii Eliyam, dee Uriya Hittiyankeejo.

⁴ Daawda nuli nelaaɓe ngadda mo. O wari to muuɗum de fukkodii e makko. (Tawi ɓooyaay ko debbo oon laamnunoo hoore mum e tuunndi mum.) De o hooti.

⁵ Debbo oon hooƴi reedu. O nuli e Daawda, o wi'i o hooƴii reedu.

⁶ Ndelle Daawda nuli e Yo'ab, wi'i nuldee Uriya Hittiyankeejo oon. De Yo'ab nuldi mo Daawda.

⁷ Nde Uriya warnoo to Daawda ndeen, Daawda ƴami mo kabaaru Yo'ab, e kabaaru yimɓe e wolde ndeen.

⁸ Caggal ɗuum Daawda wi'i Uriya: — Hootu suudu maaɗa, lootaa koyɗe maa, powtaa. Uriya wurtii suudu kaananke de kaananke nuldi mo dokkal caggal makko.

⁹ Ammaa Uriya hootaay suudu muuɗum. O waali to dammbugal suudu laamordu, to maccuɓe kaananke fuu mbaalata toon.

¹⁰ Caggal ɗuum, Daawda humpitaa Uriya hootaay wuro mum. Ndelle Daawda ƴami Uriya: — Wanaa to woɗɗi ƴuuruɗaa naa? Ko waɗi a hootaay?

¹¹ Uriya wi'i Daawda: — Keesuwal Amaana Laamɗo e yimɓe Israa'iila e Yahuuda na njooɗii ley hukumuuji de joomam Yo'ab e worɓe mum na ndaaki ley njaayri. Noy mbaawrumi hootude faa mi nyaama mi yara mi fukkodoo e deekam? Mi hunorake nguurndam maaɗa mi waɗataa noon koy!

¹² Ndeen Daawda wi'i mo: — Jooɗa ɗo hannden, de jaango mi yoppete njeccoɗaa wolde. Ndelle Uriya jooɗii ley Urusaliima nyannde ndeen e jaango majjum.

¹³ Daawda noddi mo, o nyaamdi e muuɗum o yardi e muuɗum. Daawda waɗi faa o sulii. Ammaa e noon fuu, Uriya hootaay wuro muuɗum. Nde naange hiirnoo ndeen, o wurtii de o fukkii hakkunde maccuɓe joomiiko.

¹⁴ Jaango majjum Daawda winndani Yo'ab ɓataaki, hokki Uriya yaara.

¹⁵ Ley ɓataaki kiin o winndi, o wi'i: — Ngatton Uriya e orol yeesowol to haɓo ɓuri fuu wulude. Ndeen toowton gaɗa makko faa o fiyee faa o maaya.

¹⁶ Ndelle ko Yo'ab fiildi ngalluure ndeen sordaasiiɓe muuɗum ɗuum, o heedini Uriya to o anndi habdiiɓe maɓɓe ɓurɓe semmbe ngoni.

¹⁷ Worɓe ngalluure ndeen mburtii de kaɓi e Yo'ab. Woɓɓe hakkunde sordaasiiɓe Daawda caami, Uriya Hittiyankeejo oon du maayi.

¹⁸ Yo'ab nuli e Daawda kabaaruuji haɓo ngoon.

¹⁹ O yamiri nulaaɗo oon, o wi'i: — Si a tilake e hokkude kaananke kabaaruuji wolde nde,

²⁰ hasii kaananke ɓernan de ƴame, «Ko waɗi takkiɗon e ngalluure ndeen faa kaɓeɗon? Wanaa on paamii ɓe piɗan kure e dow kokuwol ngalluure ndeen naa?

²¹ On miccitaaki wo hono noon Abimelek ɓii Yerubeset wardanoo? Wanaa debbo gonɗo dow kokuwol limnii hayre niisirde dow makko faa o maayi to wuro Tebes naa? Ko waɗi ndelle takkiɗon e kokuwol ngool?» Si kaananke wi'ii noon fu, mbi'aa mo, «Maccuɗo maaɗa Uriya Hittiyankeejo du maayii.»

²² Nulaaɗo oon yehi, nde yottinoo ndeen humpiti Daawda fuu ko Yo'ab nuli mo o wi'a ɗuum.

²³ Nulaaɗo oon wi'i Daawda: — Worɓe ɓeen keɓii semmbe, ɓe ngarii to amin to njaayri. Ammaa min ndiiwii ɓe faa e dammbugal ngalluure.

²⁴ Ndeen fiɗooɓe kure piɗi maccuɓe maaɗa to dow kokuwol ngool. Woɓɓe hakkunde maccuɓe maaɗa maayii. Maccuɗo maaɗa Uriya Hittiyankeejo du maayii.

²⁵ Daawda wi'i nulaaɗo oon: — Mbi'aa Yo'ab taa ɗum fuu ɗum metta ɗum ɓernde. Sabo si kaafaahi taƴaay o fu, taƴan o. Ɓeyɗon haɓo mooɗon e dow ngalluure ndeen, de kalkon nde. Cemmbiniraa ɓernde Yo'ab hono nii.

²⁶ Dee Uriya oon nani gorum maayii, de woyi ɗum.

²⁷ Caggal o sudditake ndeen, Daawda nuli o waddee to suudu muuɗum de o laatii deekum, o rimani ɗum suka gorko. Ammaa huunde nde Daawda waɗi ndeen welaay Joomiraaɗo.