2 Kaanankooɓe 13 - Dewtere Laamɗo Fulfulde Burkina Faso

No Yehowakas laamorii Israa'iila

¹ Hitaande noogay e tataɓerde laamu Yowas ɓii Ahajiya kaananke Yahuuda, Yehowakas ɓii Yehu laamii Israa'iila ley galluure Samariya. O laamorii duuɓi 17.

² O waɗi ko boni yeeso Joomiraaɗo. O tokki laawol Yerobo'am ɓii Nebat, gattunooɗo Israa'iila'en e hakkeeji oon. O yoppaay golle bonɗe ɗeen.

³ Ɗuum saabii de Joomiraaɗo ɓernani Israa'iila'en de watti ɗum'en e junngo Hajayel kaananke Siiriya, e Ben-Hadad ɓii Hajayel ley duuɓi ɗiin fuu.

⁴ Ndeen Yehowakas ŋaarii Joomiraaɗo waaltinana ɓe tikkere muuɗum. Joomiraaɗo jaabii du'aare makko, sabo yi'i torra ka kaananke Siiriya yarnata Israa'iila'en kaan.

⁵ O neldi ɓe kisinoowo, faa teeta ɓe e juuɗe Siiriyankooɓe. Noon ɓe keɓiri ɓe mbuuri e jam ley cuuɗi maɓɓe hono no arande noon.

⁶ Ammaa fay e noon, ɓe njoppaay hakkeeji ɗi suudu Yerobo'am wattunoo ɓe ɗiin, iɓe keddii e majji. Fay leggal tooru Asera ngaal du na heddi na darii ley Samariya.

⁷ Konunkooɓe Yehowakas waɗɗotooɓe pucci 50 e torkooji 10 e sordaasiiɓe yahooɓe e koyɗe 10.000 tan keddii, sabo kaananke Siiriya halkiinoo ɓe halkere mawnde, waɗii ɓe hono sollaare yaaɓeteende dow laawol ni.

⁸ Kabaaru Yehowakas keddiiɗo e semmbe laamu muuɗum e ko waɗi fuu na winndaa ley Dewtere Kabaaruuji Kaanankooɓe Israa'iila.

⁹ O maayi o hawritowi e maamiraaɓe makko. O uwaa ley Samariya. Ɓiyiiko Yehowas loomti mo laamii.

No Yehowas laamorii Israa'iila

¹⁰ Hitaande capanɗe tati e jeɗɗaɓerde laamu Yowas kaananke Yahuuda, Yehowas ɓii Yehowakas laamii Israa'iila ley Samariya. O laamorii duuɓi 16.

¹¹ O waɗi ko boni yeeso Joomiraaɗo. O seedaay e hakkeeji ɗi Yerobo'am ɓii Nebat wattunoo Israa'iila'en ɗiin. Imo heddii e waɗude ɗi.

¹² Kabaaru Yehowas keddiiɗo e semmbe laamu muuɗum e no jaalorii Amasiya kaananke Yahuuda wakkati konu e ko waɗi fuu na winndaa ley Dewtere Kabaaruuji Kaanankooɓe Israa'iila.

¹³ O maayi o hawritowi e maamiraaɓe makko. O uwaa Samariya hakkunde janaale kaanankooɓe Israa'iila. Ɓiyiiko Yerobo'am loomti mo laamii.

Maayde Elisey

¹⁴ Gilla e nguurndam Yehowas kaananke Israa'iila, Elisey nyawi nyawu saate. Yehowas oon wari to makko faa ndaara mo. O jiimi Elisey de imo woya imo wi'a: — Baaba am! Baaba am! Aan laataniiɗo Israa'iila kaɓitirɗe e konunkooɓe!

¹⁵ Ndeen Elisey wi'i mo: — Hooƴu kalawal e kure. Yehowas hooƴi.

¹⁶ Elisey wi'i mo: — Sappa kural maaɗa de pooɗaa. O sappii o fooɗi. Ndeen Elisey deki juuɗe muuɗum dow juuɗe makko de

¹⁷ wi'i mo: — Omtu feneetere suudu lettugaare. O omti nde. Elisey wi'i: — Fiɗu kural ngaal! O fiɗi ngal. Ndeen Elisey wi'i: — Ngal woni kural Joomiraaɗo jaalorgal! Wo ngal jaalotoongal Siiriyankooɓe. A jaaloto Siiriyankooɓe fuu, kalkaa ɗum'en ley galluure Afek.

¹⁸ Elisey ɓeydi katin wi'i: — Hooƴu kure ɗeen. O hooƴi ɗe. Elisey wi'i mo katin: — Fiyu leydi. O fiyi leydi ndiin kile tati de o seli.

¹⁹ Elisey ɓernani mo de wi'i: — Si wo kile joy maa jeegom piinoɗaa ndi fu, a halkidannoo Siiriyankooɓe fuu. De wo kile tati tan piiɗaa ndi! Ndelle wo kile tati tan njaalotoɗaa ɓe.

²⁰ Ndeen Elisey maayi, ɓe uwi ɗum. Ley hitaande jokkitiinde ndeen, fedde sordaasiiɓe Mo'ab naati leydi ndiin.

²¹ Tawi Israa'iila'en na uwannoo maayɗo. Nde ɓe njiinoo sordaasiiɓe ɓeen na ngara fu, ɓe paɗɗi maayɗo oon ley yanaande Elisey. Nde ɓanndu makko meemunoo ƴi'e Elisey fu, o iirtii de o ummii o darii.

²² Hajayel kaananke Siiriya oon torri Israa'iila'en haddi nguurndam Yehowakas fuu.

²³ Ammaa Joomiraaɗo yurmake ɓe, hollii ɓe moƴƴere muuɗum saabe amaana mo waddunoo e Ibrahiima e Isiyaaka e Yaakuuba. O muuyaay halkude ɓe wooɗi du, o muuyaay riiwude ɓe ɗakkol makko faa warde hannden.

²⁴ Hajayel kaananke Siiriya oon maayi. Ɓiyum Ben-Hadad loomti ɗum laamii.

²⁵ Ndeen Yehowas ɓii Yehowakas hewti galluuje ɗe Hajayel teetunoo bammum Yehowakas. Kile tati Yehowas na jaaloo Ben-Hadad oon de hewti galluuje Israa'iila ɗe Siiriyankooɓe teetunoo ɗeen.