1 Samuwiila 31 - Dewtere Laamɗo Fulfulde Burkina Faso

Haala Wolde to Gilbo'a e maayde Sawulu

¹ Filistiyankooɓe na kaɓda e Israa'iila'en. Worɓe Israa'iila ndoggi yeeso Filistiyankooɓe, ɓe caami dow waamnde Gilbo'a sabo ɓe piyaama faa ɓe maayi.

² Filistiyankooɓe ndiiwi Sawulu e ɓiɓɓe mum worɓe faa ɓattii ɓe, de ɓe mbari ɓiɓɓe ɓeen Yonatan e Abinadab e Malkisuwa.

³ Haɓo ngo wulii dow Sawulu sanne. Fiɗooɓe kure kewtii mo de mbarmini mo barmere mawnde.

⁴ Ndeen Sawulu wi'i tiigiiɗo kaɓitirɗe muuɗum: — Soortu kaafaahi maaɗa de njuwaa kam, faa taa yimɓe ɓe taadaaka ɓe ngara njuwa kam, njalnoroo kam. Ammaa tiigiiɗo kaɓitirɗe oon waɗaay ko o wi'i sabo o hulii sanne. Ndelle Sawulu hooƴi kaafaahi mum de saami dow makki.

⁵ Nde tiigiiɗo kaɓitirɗe oon yiinoo maayde Sawulu ndeen, kam du saami dow kaafaahi mum de maaydi e Sawulu.

⁶ Nii Sawulu maayri nyannde ndeen, kam e ɓiɓɓem worɓe tato e tiigiiɗo kaɓitirɗe mum e worɓe mum fuu maaydi nyannde ndeen.

⁷ Nde Israa'iila'en wonɓe gere ooto naɗɗol ngool e wonɓe gere ooto maayo Uurdun ngoon njiinoo sordaasiiɓe Israa'iila na ndogga, wooɗi, ko Sawulu e ɓiɓɓe mum maayi ɗuum fu, ɓe ndoggi, ɓe njoppi gure maɓɓe. Filistiyankooɓe ɓeen ngari de njooɗii ley gure ɗeen.

⁸ Jaango majjum Filistiyankooɓe ngari faa ɓotta gineeji maayɓe ɓeen. Ɓe tawi Sawulu e ɓiɓɓe mum worɓe na maayii dow waamnde Gilbo'a.

⁹ Ɓe taƴi hoore Sawulu de ɓe ɓotti kaɓitirɗe wolde mum. Ɓe nuli nelaaɓe ley leydi Filistiya'en fuu, ɓe kumpiti kabaaru majjum oon ley cuuɗi dewal tooruuji maɓɓe e hakkunde yimɓe du.

¹⁰ Ɓe ngatti kaɓitirɗe ɗeen ley suudu dewal tooru wi'eteendu Astarta. Ɓe kaɓɓi ɓanndu makko to senngo kokuwol wuro Bayti-San.

¹¹ Yimɓe Yabes-Galaad nanii ko Filistiyankooɓe ngaɗi Sawulu,

¹² de worɓe maɓɓe suusuɓe njehi faa haddi jemma oon fuu faa njottii wuro Bayti-San. Ɓe njippini ɓanndu Sawulu e ɓalli ɓiɓɓem e senngo kokuwol Bayti-San, de ɓe njaari ɗi wuro Yabes, ɓe mbuli ɗi.

¹³ Caggal ɗuum, ɓe kooƴi ƴi'e maɓɓe, ɓe uwi ɗe ley lekki njammi ngonki Yabes. Ndeen ɓe cuumii faa waɗi balɗe jeɗɗi.