1 Samuwiila 29 - Dewtere Laamɗo Fulfulde Burkina Faso

No Akis fornyiniri Daawda

¹ Filistiyankooɓe kawrunduri ori sordaasiiɓe muɓɓen fuu to wuro Afek. Sordaasiiɓe Israa'iila du ndaaki ɗakkol ilam ngonɗam wuro Yesre'el.

² Hooreeɓe Filistiya'en na njaha ley ori muɓɓen keme e ujunaaje. Daawda e worɓe mum e Akis ngoni sakitiiɓe.

³ Hooreeɓe Filistiya'en ɓeen mbi'i: — Ɗume Ibraninkooɓe ɓeen ngaɗi? Akis jaabii ɓe, wi'i: — Ɗum wo Daawda maccuɗo Sawulu kaananke Israa'iila. O waddii e am balɗe e kitaale, de mi yiiraay o fuu feloore illa nyannde o doggi o wari to am.

⁴ Ammaa hooreeɓe Filistiya'en ɓeen ɓernani Akis, ɓe mbi'i: — Nuldu gorko o faa o yeccoo nokku mo kokkuɗaa mo. Taa o yaada e men to wolde, taa o laatoo ganyo meeɗen wakkati haɓo. Noy o waawri rewrintinde hoore makko e joomiiko si wanaa e ko'e meeɗen.

⁵ Wanaa ɗum wo Daawda mo ɓe njimnata iɓe mbamana, iɓe mbi'a: «Sawulu warii ujunaaje mum, Daawda du warii ujunaaje mum capanɗe keewɗe.»

⁶ Ndelle Akis noddi Daawda wi'i mo: — Mi hunorake Joomiraaɗo buurɗo, a neɗɗo ponnditiiɗo. Na weli kam si aɗa waawunoo yaadude e wardude e am ley wolde. Mi yiiraay maa fuu feloore illa nyannde ngaruɗaa to am faa e hannden. Ammaa a weldaay e hooreeɓe.

⁷ Jonkaa fornya, yahu e jam. Ndeen a waɗataa ko welaa hooreeɓe Filistiya'en.

⁸ Daawda wi'i Akis: — Ɗume ngaɗumi? Yalla won ko njiiɗaa ko boni e am miin maccuɗo maaɗa illa nyannde nde naatumi golle maaɗa faa hannden naa? Ko waɗi de mi waawaa yahude mi haɓa e wayɓe ma, aan joomam kaananke?

⁹ Akis jaabii Daawda, wi'i: — Miɗo anndi. Wo goonga, aɗa weli kam hono maleyka Laamɗo. Ammaa hooreeɓe Filistiya'en ɓeen mbi'ii taa naatidaa e amin ley wolde.

¹⁰ Ndelle ummoɗaa gilla beetee, aan e maccuɓe yaadiraaɓe maaɗa. Ummoɗon wakkati hejjere de si pooyngol feccake fu, ndillon.

¹¹ Ndelle Daawda e worɓe mum ummii illa hejjere faa ɓe njeccoo leydi Filistiya'en, de Filistiyankooɓe ɓeen du njehi wuro Yesre'el.