1 Samuwiila 21 - Dewtere Laamɗo Fulfulde Burkina Faso

¹ Daawda ummii, dilli, de Yonatan yeccii ley ngalluure.

No Daawda doggiri moolowii wuro Nobi

² Daawda yehi wuro Nobi to almaami bi'eteeɗo Ahimelek. Ahimelek diwni kulol, wi'i: — Ko waɗi ngaruɗaa aan tan? Ko saabii a waldaa e fay gooto?

³ Daawda jaabii Ahimelek, wi'i: — Wo kaananke neli kam, de wi'i taa mi acca fay gooto faama ko yamiri kam ɗum. Mi hollii jokolɓe am nokkuure wonnde to min kawrata.

⁴ Ndelle ɗume ngooduɗaa hono nyaamdu? Kokkoraa kam buuruuje joy naa ko tawraɗaa fuu.

⁵ Almaami jaabii Daawda, wi'i: — Mi walaa buuru keɓaaɗo fuu, ammaa miɗo woodi buuruuje ceniiɗe, de sanaa tawee jokolɓe maaɗa mbayrii rewɓe.

⁶ Daawda jaabii almaami wi'i: — Wo goonga, wakkati wolde fuu min ngondataa e rewɓe. Ɓalli jokolɓe am ɓe wo ceniiɗi, fay ley bolwole ɗe cenaaki du ɓe cenii, sakko hannden.

⁷ Ndelle almaami oon hokki Daawda buuruuje ceniiɗe ɗeen sabo ɓe ngalaano buuruuje si wanaa buuruuje gonnooɗe yeeso Joomiraaɗo ittanooɗe. Nyannde nde ɗe ittanoo ndeen, ɓe loomtiniri ɗe buuruuje bulɗe.

⁸ Tawi gooto hakkunde maccuɓe Sawulu na toon nyannde ndeen, na wi'ee Do'ek jeyaaɗo leydi Edom, wo o hooreejo durooɓe Sawulu.

⁹ Daawda ƴami Ahimelek, wi'i: — Yalla aɗa woodi labbo naa kaafaahi ga naa? Mi hooƴaay kaafaahi am naa kaɓorɗe am fuu sabo nelal kaananke wo kenyiingal.

¹⁰ Almaami jaabii, wi'i: — Inan kaafaahi Goliyat Filistiyankeejo mo mbarunoɗaa ley Naɗɗol Leɗɗe Mawɗe. Inani ki ɗo, iki fiiliraa e kaddungal gaɗa to saaya almaamaaku wallintee. Si aɗa yiɗi fu, kooƴaa sabo goɗɗum fuu walaa. Daawda wi'i: — Ki walaa yeru. Hokkam ki.

No Daawda yehiri wuro Gaat

¹¹ Nyannde ndeen Daawda ummii doggi Sawulu yehi to Akis, kaananke wuro Gaat.

¹² Maccuɓe Akis mbi'i ɗum: — Wanaa kanko woni Daawda kaananke leydi naa? Wo kanko ɓe njimanta iɓe mbama, iɓe mbi'a: «Sawulu wari ujunaaje seeɗa mum, Daawda du wari ujunaaje mum capanɗe keewɗe».

¹³ Daawda jogitake haalaaji ɗiin, o huli Akis kaananke Gaat sanne.

¹⁴ Ndelle o wattinkinii hono kaaŋaaɗo yeeso maɓɓe. Imo ŋaasa gampuuje, imo acca joodooli na njoodoo e dow waare makko.

¹⁵ Ndeen Akis wi'i gollooɓe mum: — Ndaaree, gorko o wo kaaŋaaɗo. Ko waɗi ngaddanɗon kam mo?

¹⁶ Yalla mi waasu haaŋaaɓe faa ngaddon neɗɗo o na haaŋɗa yeeso am naa? Yalla on miilii mi accan o naata suudu am naa?