1 Kaanankooɓe 9 - Dewtere Laamɗo Fulfulde Burkina Faso

No Joomiraaɗo bangirani Suleymaana

¹ Nde kaananke Suleymaana timminnoo nyiɓugol suudu Dewal Mawndu e laamordu muuɗum e ko fodinoo nyiɓude fu,

² Joomiraaɗo ɓangi e makko katin hono no ɓangirannoo mo Gibiyon noon.

³ Laamɗo wi'i o: — Mi nanii du'aaw e ŋaarnde nde ngaɗuɗaa yeeso am. Mi senirii suudu ndu nyibuɗa nduun e innde am faa abada. Gite am e ɓernde am fuu ngonnan dow mayru faa abada.

⁴ Aan du, si a tokkii laawol am hono no bammaa Daawda, a waɗirii ko njamirmi ma fuu e hoolaare e ɓernde laaɓunde faa ɗowtanoɗaa jamirooje am e sariyaaji am fuu,

⁵ paama mi semmbinɗinan de mi tabintina laamu maaɗa dow yimɓe am Israa'iila'en faa abada. Wo kanjum podaninoomi bammaa Daawda nde mbi'unoomi: «Abada a hunngataako loomtoowo maa dow jooɗorgal laamu Israa'iila.»

⁶ Ammaa si on tottitake kam, onon e ƴuwdi mooɗon, on paɗɗii jamirooje e sariyaaji ɗi kokkumi on ɗiin de on njehii on ɗowtanowake allaaji goɗɗi, on kofake yeeso majji fu,

⁷ mi fiɗɗan on onon Israa'iila'en dow leydi ndi kokkumi on, wooɗi du, mi tottitoto suudu ndu cenimmi faa teddiniree innde am mawnde nduun. Ndeen Israa'iila'en laatanto lenyi adunaaru fuu jalnorgal e yawaara.

⁸ Suudu mawndu teddundu nduun du, nfaltoytooɓe ɗakkol muuɗum fuu, haaynde mawnde e kulol nanngan ɗum'en saabe halkere mayru de ƴamito mbi'a: — Ɗume saabii de Joomiraaɗo waɗi leydi ndi e suudu ndu hono nii?

⁹ Ndeen woɓɓe njaaboto ɓe mbi'a: «Wo saabe ɓe njoppii Joomiraaɗo, Laamɗo maɓɓe, burtinɗo maamiraaɓe maɓɓe leydi Misira de ɓe kaɓɓondiri e allaaji goɗɗi, ɓe kofake yeeso muɓɓen, ɓe ɗowtanii ɗi de kam du jukkii ɓe jukkungo manngo ngoon.»

Golle Suleymaana Goɗɗe

¹⁰ Duuɓi 20 Suleymaana nyiɓiri cuuɗi ɗiɗi ɗiin, ɗum woni suudu Dewal Joomiraaɗo Mawndu e suudu muuɗum laamordu.

¹¹ Hiram, kaananke Tirus, walliri mo leɗɗe seddere e sipire e kaŋŋe ko o haajanoo faa o nyiɓira fuu. Saabe ɗuum o hokki Hiram oon galluuje 20 gonɗe nder leydi Galili.

¹² Hiram ƴuuri Tirus wari faa ndaara galluuje ɗe o hokki ɗum ɗeen ammaa ɗe mbelanaay mo.

¹³ Ndeen o wi'i: — Galluuje ɗumeeje kokkuɗaa kam ni, aan sakiike am? O inndiri ɗe Kabul (ɗum na fiirta «ko walaa teddeengal»), noon du ɗe mbi'ete faa warde hannden.

¹⁴ Kaŋŋe mo Hiram neldi Suleymaana saabe gollal nyiɓugol fuu wo kilooji 3.500.

¹⁵ Kaananke Suleymaana na gollinannoo yimɓe golle tilsuɗe saabe nyiɓugol suudu Dewal Joomiraaɗo Mawndu e suudu muuɗum laamordu e nokkuure wi'eteende Millo e kokuwol piiliingol Urusaliima e kuɓeeje Hasoor e Megiddo e Gejer,

¹⁶ tawi huɓeere Gejer ndeen le, Fira'awna Kaananke Misira hippakeno de wuli ɗum, wari Kanaaninkooɓe wonnooɓe toon fuu de hokki nde ɓiyum debbo nde ɓaŋeteno Suleymaana ndeen.

¹⁷ Ɗum saabi de Suleymaana nyiɓitii Gejer. Katin du, o nyiɓi Bayti-Horoon leeƴuɗo,

¹⁸ e Ba'alata e Tadmoor nder leydi njoorndi,

¹⁹ e gure to torkooji konu e kaɓitirɗe ndesetee e to pucci konu nduretee. O nyiɓi ko o haajaa fuu nder galluure Urusaliima e nder Liban e nder leyɗe ɗe o laamii ɗeen fuu.

²⁰ Na heddinoo lenyi, ɗum woni Amorinkooɓe e Hittiyankooɓe e Perisinkooɓe e Hewinkooɓe e Yebusinkooɓe ɓe njeyaaka e ɓiɓɓe Israa'iila.

²¹ Ɓe keddakenoo iɓe mbuuri sabo Israa'iila'en mbaawaayno halkidinde ɓe. Kaananke waɗi ƴuwdi maɓɓe maccuɓe gollooɓe golle tiiɗɗe tilsuɗe, iɓe keddodii e maccungaaku faa warde hannden.

²² O wattaay Israa'iilanke fay gooto ley golle muuɗum tiiɗɗe ɗeen ammaa o waɗii ɓe laatii konunkooɓe, hono sordaasiiɓe maa ardiiɓe maa dawranooɓe sordaasiiɓe maa dorbotooɓe torkooji konu maa waɗɗotooɓe pucci wolde.

²³ Ardiiɓe ɓe Suleymaana suɓii wo worɓe 550. Wo ɓeen ndawranannoo jamaare ndeen.

²⁴ Nde ɓii Fira'awna debbo ɗum woni dee Suleymaana oon wartunoo suudu ndu kaananke nyiɓani ɗum fu, Suleymaana nyiɓi ko wi'etee Millo.

²⁵ Ley hitaande fuu, kile tati Suleymaana waɗata sadakaaji buleteeɗi e jeɗeteeɗi dow hirsirde nde nyiɓani Joomiraaɗo ndeen. Imo wula du urdiiji yeeso Joomiraaɗo. Noon golle suudu Dewal Mawndu nduun timminiraa.

²⁶ Kaananke Suleymaana waɗi laanaaji ndiyam na ngoni wuro Esiyon-Geber, ɗakkol huɓeere Elot, daande maayo Maaliya, leydi Edom.

²⁷ Kaananke Hiram neli gollooɓe muuɗum waawuɓe laanaaji ndiyam anndanɓe maayo, ngara ngonda e gollanooɓe Suleymaana.

²⁸ Ɓe njottii nokkuure wi'eteende Ofir. Toon, ɓe coodi kaŋŋe kilooji 12.000 faa ɓe ngaddana kaananke.