1 Kaanankooɓe 22 - Dewtere Laamɗo Fulfulde Burkina Faso

No Ahabi e Yehosafat ndawridiri

¹ Duuɓi tati jam jooɗorii hakkunde Siiriya e Israa'iila.

² Ley hitaande tataɓerde ndeen Yehosafat, kaananke Yahuuda, yehi to kaananke Israa'iila.

³ O tawi kam du haaldiino e gollooɓe muuɗum, wi'i: — On paami enen njeyi wuro Ramot-Galaad, de en ngaɗaay faa'e faa teeten ngo e junngo kaananke Siiriya naa!

⁴ Ndelle o ƴami kaananke Yehosafat, o wi'i: — Yalla a yaadan e amin faa kaɓden e Ramot-Galaad naa? Yehosafat jaabii mo, wi'i: — Miin kaa, en laatake gootum, yimɓe am laatake yimɓe ma, pucci am du laatake pucci maaɗa.

⁵ Yoosafat ɓeydi wi'i: — Miɗo ŋaare ƴamaa muuyɗe Joomiraaɗo tafon.

No Mikaya hollirii maayde Ahabi

⁶ Kaananke Israa'iila hawrondini annabaaɓe 400 de ƴami ɗum'en wi'i: — Yalla miɗo jeyi yaade wolde Ramot-Galaad, naa mi jeyaa? Ɓe njaabii mo ɓe mbi'i: — Yahu kaananke, Joomiraaɗo wattan wuro ngoon e juuɗe maaɗa!

⁷ Ammaa Yoosafat ƴami wi'i: — Yalla annabaajo Joomiraaɗo fay gooto walaa mo mbaawɗen ƴamude naa?

⁸ Kaananke Israa'iila jaabii Yehosafat, wi'i: — Annabaajo Joomiraaɗo gooto tan woni leydi am ɗoo, mo mbaawɗen ƴamude ammaa miin kaa, miɗo wanyi mo sabo abada o haalaay lobba dow am. Annabaajo oon na wi'ee Mikaya ɓii Yimla. Yehosafat jaabii, wi'i: — Kaananke, taa wi'u noon!

⁹ Ndeen kaananke Israa'iila neli gooto e mawɓe laamordu muuɗum haroo waddowa Mikaya ɓii Yimla.

¹⁰ Kaananke Israa'iila e kaananke Yahuuda na ɓornii kaddule kaanankooɓe na njooɗii, mono fuu dow jooɗorgal muuɗum laamu ley ƴarorde dammbugal Samariya. Annabaaɓe na ngoni yeeso maɓɓe, na kaalda annabaaku.

¹¹ Gooto maɓɓe na wi'ee Sidekiya ɓii Kenaana. Oon waɗi luwe jamɗe, de wi'i: — Inan ko Joomiraaɗo wi'i: «Njuwiraa Siiriyankooɓe luwe ɗee faa nde kalkidinɗaa ɓe ley leydi Siiriya.»

¹² Annabaaɓe ɓeen fuu na mbi'a hono noon, iɓe mbi'a: — Njahaa wolde Ramot-Galaad ndeen ko a jaaloto! Joomiraaɗo wattan ɓe e juuɗe maaɗa aan kaananke.

¹³ Nelaaɗo noddowa Mikaya oon wi'i ɗum: — Inan konngol annabaaɓe ɓeen, ɓe fuu ɓe ngaɗii hunnduko wooto, iɓe mbi'a kaananke heɓowan wunee ley wolde Ramot-Galaad. Si nii a yehi fu, taa yeddu haala maɓɓe, ndewaa ko ɓe mbi'i tan!

¹⁴ Ammaa Mikaya jaabii, wi'i: — Mi hunorake Joomiraaɗo buurɗo, ko Joomiraaɗo wi'i kam tan kaalanammi mo.

¹⁵ Nde Mikaya yottinoo toon fu, kaananke ƴami ɗum, wi'i: — Mikaya, yalla eɗen njeyi yaade wolde Ramot-Galaad ndeen naa mi jeyaa? Mikaya wi'i mo: — Kaananke, njahaa wolde ndeen! A heɓan daliili! Joomiraaɗo wattan ɓe e juuɗe maaɗa!

¹⁶ Kaananke oon wi'i mo: — Kile foti ngaɗanmi kunoɗaa taa kaalaa ko wanaa goonga e innde Joomiraaɗo?

¹⁷ Mikaya jaabii mo wi'i: — Miin, mi yi'ii Israa'iila'en na cankitii dow baamle hono baali ɗi ngalaa duroowo. Joomiraaɗo wi'i: «Israa'iila'en ngalaa hooreejo, ndelle mono e maɓɓe fuu yecco wuro muuɗum e jam.»

¹⁸ Kaananke Israa'iila wi'i Yoosafat: — Mi haalanayno ma, abada annabi Mikaya haalaay lobba dow am, wakkati fuu mbonka tan o wi'ata kam!

¹⁹ Mikaya wi'i mo: — Hettinda konngol Joomiraaɗo. Miin Mikaya mi yi'ii Joomiraaɗo na jooɗii dow jooɗorgal muuɗum laamu, maleyka'en na ndarii nano e nyaamo fuu.

²⁰ Joomiraaɗo ƴami ɓe: «Moy hiilata Ahabi faa yaha wolde Ramot-Galaad?» Oo ga na wi'a ni, oo too du na wi'a ni.

²¹ Ndeen alhaali bonɗo gomma wari, darii yeeso Joomiraaɗo, de wi'i: — Miin hiilata Ahabi. Joomiraaɗo ƴami o, wi'i: — Noy kiilirtaa o?

²² Joomiraaɗo ƴami mo, noy kiildataa mo? Ruuhu oon jaabii, wi'i: — Mi wurtoto, mi laatoo ruuhu penoowo de mi watta fewre ley kunnduɗe annabaaɓe makko. Joomiraaɗo wi'i mo: — A gaynan! Ndelle njahaa de kiilaa o.

²³ Ndeen Mikaya ɓeydi wi'i: — Joomiraaɗo wattii ley kunnduɗe annabaaɓe maaɗa ɓee fuu ruuhu penoowo. Paamaa Joomiraaɗo na fodanii ma halkere.

²⁴ Ammaa Sidekiya ɓii Kenaana, ɓattii feenyi Mikaya de wi'i: — Toy ruuhu Joomiraaɗo wurtorii e am faa haalda e maaɗa?

²⁵ Mikaya jaabii mo, wi'i: — A faaman nyannde naatuɗaa to ɓuri fuu lonngitaade ley suudu faa cuuɗoɗaa.

²⁶ Kaananke Israa'iila wi'i Mikaya nanngee, yaaree to Amon hooreejo wuro, e to Yowas ɓii kaananke.

²⁷ Mbi'aa: — Wo miin kaananke Israa'iila wi'i: Nannon Mikaya ley kasu, de oɗon kokka ɗum buuru e ndiyam seeɗakal tan, faa ɗo ngartumi e jam.

²⁸ Mikaya wi'i mo: — Si a wartii e jam fu, ɗuum na holla wanaa Joomiraaɗo haaliri e hunnduko am. O ɓeydi o wi'i: — On fuu, kakkilanon ko mbi'umi joonin ɗum.

Maayde Ahabi

²⁹ Ndeen kaananke Israa'iila e Yoosafat kaananke Yahuuda ndilliri konu Ramot-Galaad.

³⁰ Kaananke Israa'iila wi'i Yoosafat: — Miin kaa, mi wattinkinto hono sordaasiijo de mi naata wolde, ammaa aan Yoosafat, keddodoɗaa e kaddule maaɗa laamu. Ndeen kaananke Israa'iila wattinkinorii kaddule goɗɗe de naati wolde ndeen.

³¹ Tawi kaananke Siiriya yamiriino hooreeɓe torkooji pucci muuɗum taa piloo sordaasiiɓe famarɓe naa mawɓe, ammaa piloo kaananke Israa'iila tan.

³² Nde hooreeɓe torkooji ɓeen nji'unoo Yoosafat ndeen mbi'i: — Sikke walaa, wo o woni kaananke Israa'iila. Ndeen ɓe kucciti mo, faa ɓe nannga mo. De Yehosafat fiyi nyonaango.

³³ Nde ɓe paamunoo wanaa kanko woni kaananke Israa'iila fu, ɓe acci mo.

³⁴ Ley wolde ndeen, goɗɗo fiɗi kural yaare de ngal yanowi e kaananke Israa'iila faa ngal siititi hakkunde jamɗe saayo muuɗum. Ndeen kaananke oon wi'i dorbotooɗo torkooru muuɗum: — Oonca mburtinaa kam ley wolde ɗoo, sabo mi nawnake.

³⁵ Wolde ndeen nyaaɗi sanne nyannde ndeen. Kaananke Israa'iila na darnaa ley torkooru muuɗum yeeso Siiriyankooɓe, faa laasara de maayi. Ƴiiƴam makko rufi ley torkooru nduun.

³⁶ Wakkati caamal naange, feekaango waɗi hakkunde wolde toon, wi'i: — Mono e mooɗon fuu jaaƴowo wuro muuɗum e leydi muuɗum!

³⁷ Ɓe njaari kaananke maayɗo oon Samariya, ɓe mooɓowi ɗum.

³⁸ Ndeen ɓe looti ƴiiƴam makko ngonnooɗam ley torkooru ɗaam ley feto Samariya. Dawaaɗi ina ngoni ɗoon, na metta ɗam. Woykotooɓe du na lootonoo ley maggo. Ɗum fuu ɗum waɗiri hono no Joomiraaɗo wiirunoo noon.

³⁹ Kabaaru kaananke Ahabi keddiiɗo fuu na winndaa ley Dewtere Kabaaruuji Kaanankooɓe Israa'iila. Ley toon na holla ko o waɗi ley nguurndam makko, no o nyiɓiri suudu nyiiƴe nyiibi e gure ɗe o nyiɓi fuu.

⁴⁰ Ahabi maayi hawritowi e maamiraaɓe muuɗum. Ɓiyiiko Ahajiya loomti mo laamii.

No Yehosafat laamorii dow Yahuuda

⁴¹ Yehosafat ɓii Asa laamake Yahuuda ley hitaande nayaɓerde laamu Ahabi kaananke Israa'iila.

⁴² Wakkati o laamotonoo ndeen, duuɓi makko wo 35. O laamorii duuɓi 25 ley Urusaliima. Innde inniiko wo Ajuba, ɓii Silihi.

⁴³ O rewi laawol baabiiko Asa, o selaay ngol. O waɗi ko fotani Joomiraaɗo.

⁴⁴ Ammaa nokkuuje cakkirɗe pusaakano. Ndelle yimɓe na keddii na mbula ure, na ngaɗa sadakaaji dow majje.

⁴⁵ Yehosafat waɗi jam hakkunde muuɗum e kaananke Israa'iila.

⁴⁶ Kabaaru kaananke Yehosafat keddiiɗo, e golleeji muuɗum ɗi semmbe, e woldeeji ɗi waɗuno fu winndaama ley dewtere kaanankooɓe Yahuuda.

⁴⁷ Yehosafat halkii waɗooɓe woykuuru saabe tooruuji muɓɓen, heddinooɓe ley leydi ndiin gilla wakkati bammum Asa.

⁴⁸ Kaananke walaano wuro Edom ammaa kalfinaaɗo laamu na wonno toon.

⁴⁹ Yehosafat waddi laanaaji ndiyam bi'eteeɗi laanaaji Tarsis faa njaha Ofir, pilowoo kaŋŋe. Ammaa jahaangal ngaal heɓaay waɗeede sabo laanaaji ndiyam ɗiin kalkii de keɓaay yaade Tarsis.

⁵⁰ Ndeen Ahajiya ɓii Ahabi haaldi e Yehosafat wi'i: — Accu gollooɓe am njaada e gollooɓe maaɗa ley laanaaji ɗiin. Ammaa jaɓaay.

⁵¹ Yoosafat maayi, hawritowi e maamiraaɓe muuɗum. O uwaa hakkunde muɓɓen ley galluure maamiiko Daawda. Ɓiyiiko Yoram loomti mo laamii.

No Ahajiya laamorii dow Israa'iila

⁵² Ley hitaande sappo e jeɗɗaɓerde laamu Yehosafat kaananke Yahuuda, Ahajiya ɓii Ahabi laamii dow Israa'iila ley wuro Samariya. Duuɓi ɗiɗi o laamorii Israa'iila.

⁵³ Ahajiya ummini tikkere Joomiraaɗo. O rewii laawol baabiiko e inniiko e laawol Yerobo'am ɓii Nebat ngattunooɗo Israa'iila'en e hakke oon.

⁵⁴ O ɗowtanii Ba'al, o sujidani ɗum, o tikkini Joomiraaɗo, Laamɗo Israa'iila hono no baabiiko waɗirno noon.