Tuifakamaau 5 - Tosi Tapu

Katiko a Tepola mo Palaki

¹ I le aso lena, na sua loa e Tepola le katiko leinei, mo Palaki, vosa o Apinoame :

² Na malaga ki aluga ni pule o taki le kakai o Iselaele, Ti na loto makeke le kakai ki le tau : Ke kotou fakafetai ki le Eteleno !

³ Sau, kotou fakalogo mai ! Kau aliki, kotou fakalogo mai okoutou taliga ! E kau sua loa, io, e kau sua loa ki le Eteleno, E kau sua loa ki le Eteleno, le Atua o Iselaele.

⁴ Ei Eteleno ! i le aso leia na ke au ai mei Seili, I le aso leia na ke saele mai ai mei faisaga o Etome, Na galulu loa le kele, ti na liligi loa e le lagi ona vai, Ti na to loa se ua lasi mei ao ;

⁵ Na sisiga loa a mauga i mua o le Eteleno, I mua o le Eteleno o Sinai, le Atua o Iselaele.

⁶ I le temi o Samika, vosa o Anate, I le temi o Saele, na lavaki a ala, Ti na ano a kakai fanoga i ni ala pikopiko.

⁷ Na sala makeke a pule i Iselaele, io, na lotou sala makeke, I le aso leia na kau tuu ai ki aluga, a au Tepola, Io, i le aso leia na kau tuu ai ki aluga ofaipe se tinana i Iselaele.

⁸ Na filifili e Iselaele ni atua foou : Koia na nofo ai le tau i mua matapa ; Na leaise maua fua se paletau pe ko se tao I se tino fa afe i Iselaele.

⁹ E ano loku loto ki pule o Iselaele, Kia latou ala o le kakai na loto makeke ki le tau. Ke kotou fakafetai ki le Eteleno !

¹⁰ Ko koutou ala e eke i ni asino tetea, Ko koutou ala e tonatona i ni tapi, Ti mo koutou ala e saele i ala, ke kotou sua !

¹¹ I olatou leo, mei loto malie o inuaga o manu, Ke fakavikiviki le kau fai kalolo ki gaoi malilie a le Eteleno, Ki gaoi malilie o lona tagata taki i Iselaele ! Koia na ifo ai loa le kakai o le Eteleno ki matapa.

¹² Ke ke alaala, ke ke alaala, Tepola ! Ke ke alaala, ke ke alaala, ke ke sua se katiko ! Ke ke tuu ki aluga, Palaki, ti ke ke aumai lau kau pilisoni, vosa o Apinoame !

¹³ Koia na malo ai loa se toega o le kakai i le kau makeke, Na soli mai loa e le Eteleno kiate au le malo i le kau toa.

¹⁴ Mei Efalaimi na au loa latou na nonofo i Amaleke. Na mulimuli loa Pesamino iate koe i lau kau tau. Mei Makile na au loa ni pule, Ti mo ni ofisa lagiaki mei Sapulone.

¹⁵ Na kau loa ni pule o Isakale mo Tepola, Ti na mulimuli loa Isakale ia Palaki, Na ano fakatavili loa a ia kia Palaki i le vaivailiua. I famili o Lupeni, Na lasi ai a fai tonu o le loto !

¹⁶ Kolea na ke nofo ai i loto malie o fale manu, O fakalogo ki tagi o kau manu ? Io, i famili o Lupeni, Na lasi ai a fai tonu o le loto !

¹⁷ Ko Kalaate i le fetuu esite o le Solotane na leaise mavae fua i lona nofoaga. Kolea na nofo ai a Tane i ona vaka fai koloa ? Na tonatona Asele i le mata tai, Ti na malolo a ia i ona taulaga vaka.

¹⁸ Ko Sapulone ko se kakai leia na tau loa mo le mate, Ti na tatau foki mo Nefetali, I ganea ala na fai ai le tau.

¹⁹ Na au loa a sau, na lotou tau loa, Io na tau loa a sau o Kanaane, I Tanaaki, i tafa o vai o Mekito ; Na leaise lotou ave ia loa se koloa, pe ko se paaga.

²⁰ Na tau loa mei lagi, Mei olatou ala na tau loa a fetuu kia Sisela.

²¹ Na ave latou e le liua o Kisoni, Io, e le liua o temi afea, le liua o Kisoni. Ei loku laumalie, ke ke takatakafi ki ou vae le kau toa !

²² Koia na patato ai loa a vae o osi, I le sosola, i le sosola fakatavili o le kau tau na eke ia latou.

²³ Na pati loa le aselo o le Eteleno : Ke kotou fakamalaia Melosi, Ke kotou fakamalaia, ke ke kotou fakamalaia lona kakai, Talie na leaise lotou ano loa o tokoi ki le Eteleno, Io, o tokoi ki le kau toa a le Eteleno.

²⁴ Ke tapuaki lasi kia Saele, Avaga o Epele, le tagata Kenia ! Ke tapuaki lasi kiate ia i fafine ala e nonofo i falela !

²⁵ Na kole loa e Sisela se ga vai, ti na soli e Saele se sua manu ! I le ipu fakaalialiki na teuteui loa e ia se sua manu gako.

²⁶ Ti na kukumi loa e Saele i se tasi a lima le pike, Ti na too loa e lona lima atamai le amale a tagata tufuga ; Na taai e ia Sisela, io, na taai e ia lona ulu o mafaa, ti na ulu le pike o sa i leia fetuu ulu.

²⁷ Na punou Sisela ki lalo i vae o Saele, na teka a ia ki le kele, ti na moe a ia ki lalo. Io, i ona vae na punou a ia ki lalo, na teka a ia ki le kele kua oki lona mauli.

²⁸ I le matapa tiloata, i le katupa, Na faino le tinana o Sisela, ti na kalaga : Kolea e tuvai ai le au o lana saliote ? Kolea e ano mamalie ai ana saliote ?

²⁹ Na tali loa kiate ia a fafine ala na popoto i ana kau fafine, Ti na tali foki a ia kiate ia totonu :

³⁰ Pe leaise maua e ia se koloa o le tau ? Pe leaise vae e ia a ia ? Ko se taine e tasi, ko taine e lua ki le tagata. Ko ni teu lanu kesekese kia Sisela, Io ni teu lanu kesekese, na tui fakateuteu, Ko se teu lanu kesekese e tasi, mo ni teu e lua na tui fakateuteu, Ki le ua o le tagata malo.

³¹ Ke mamate fenaaki ou fili fuli, ei Eteleno ! Kae ko latou ala e alofa kiate ia, Ke lotou faipe le laa, I lana sopo ake i lona gigila katoa. Na malolo loa le fenua i fetuu e kau fa.