Tuifakamaau 1 - Tosi Tapu

Malo o Suta

¹ I le oki o le mate o Sosue, na vesili loa fanau a Iselaele ki le Eteleno, o pati : Ko ai leia ia matou e tonu ke uluaki pale loa o taui le kau Kanaane ?

² Na tali loa le Eteleno : E pale loa Suta, talie kua kau tuku le fenua ki ona lima.

³ Ti na pati loa Suta ki lona taina ko Simeone : Ke ke pale loa mo au ki le fenua leia kua tuku mai kiate au e le toso, ti ke ta taui loa le kau Kanaane ; e kau toe ano loa mo koe ki le fenua leia na tuku atu kiate koe ko lou tofiga. Ti na ano loa Simeone mo ia.

⁴ Na pale loa Suta, ti na tuku loa e le Eteleno ki olatou lima le kau Kanaane mo le kau Pelesi. Na lotou tamate loa ni tagata e tino agafulu afe i Peseki.

⁵ Na lotou maua loa Atoni-Peseki i Peseki, ti na lotou taui loa a ia, ti na lotou tamate loa le kau Kanaane mo le kau Pelesi.

⁶ Na sola loa Atoni-Peseki, kae na lotou tuli loa a ia o maua, ti na lotou tutuuti loa a maikao matua o ona lima mo ona vae.

⁷ Na pati loa Atoni-Peseki : na tae e sau e tino fitu, ala na tutuuti a maikao matua o olatou lima mo olatou vae, a toega kai i lalo o loku laupapa kai : Kua toe liufaki loa e le Atua kiate au le nea leia na kau aga o fai. Na ave loa le sau ki Selusalemi, ti na mate loa a ia i ai.

⁸ Na taui loa e vosa o Suta a Selusalemi o lotou maua loa a ia. Na lotou tamate loa ki le mata o le seleta le kakai o le kolo, ti na lotou tutu loa ki le afi le kolo.

⁹ Ti na ifo loa a vosa o Suta o taui le kau Kanaane leia na nonofo i le mauga, mo le potu saute, ti mo le toafa.

¹⁰ Na saele loa Suta ki le kau Kanaane leia na nofo i Epelone, leia na igoa i mua ko Kiliate-Alepa. Ti na tamate loa e ia Sesai, mo Asimani ti mo Talamai.

¹¹ Mei lena na saele loa a ia ki le kakai o Tepile : na igoa Tepile i mua ko Kiliate-Sefeli.

¹² Na pati loa Kalepo : E kau soli loa loku taine ko Akesa ke avaga mo le tagata leia e malo loa i Kiliate-Sefeli, ti mo too ia loa a ia.

¹³ Na too loa a ia e Oteniele, vosa o Kenasi, taina lua o Kalepo ; ti na soli loa e Kalepo kiate ia lona taine ko Akesa ke avaga mo ia.

¹⁴ I le lakaga na ulu ai loa Akesa ki le fale o Oteniele, na faigai loa e ia kiate ia ke kole e ia ki lona tamana se faisaga. Na ifo loa a ia i lana asino ; ti na pati loa Kalepo kiate ia : Pe i ai se nea leia e ke loto ki ai ?

¹⁵ Na tali loa Akesa kiate ia : fai mai kiate au se nea alofa, talie na ke soli mai kiate au se kele malo i le saute ; toe soli mai foki kiate au ni matapuna vai. Ti na soli loa e Kalepo kiate ia a matapuna vai i aluga mo matapuna vai i lalo.

¹⁶ Na pale ake loa a vosa o le tagata Kenia, tamana o le avaga o Moisese, mei Seliko, kolo o palemie, mo vosa o Suta, ki le toafa o Suta i le potu saute o Alate, ti na lotou ano loa o nonofo mo le kakai.

¹⁷ Na ano loa a Suta mo lona taina ko Simeone o taui le kau Kanaane ala na nonofo i Sefati. Ti na lotou maumaui katoa le kolo, ti na lotou tuku loa ki ai le igoa ko Olama.

¹⁸ Na toe too foki e Suta a Kasa mo lona fenua, mo Asekaloni mo lona fenua, mo Ekeloni mo lona fenua.

¹⁹ Na nofo loa le Eteleno mo Suta leia na maua ia loa le mauga, kae na leaise mafai ke kapu loa e ia le kakai o le lalo mauga, talie na lotou maua ia ni saliote ukamea.

²⁰ Na soli loa kia Kalepo a Epelone, o mulimuli ki le pati a Moisese ; ti na kapu loa e Kalepo a vosa e tolu o Anake.

Lava a laake faasiga

²¹ Na leaise kapu loa e vosa o Pesamino le kau Sepusi ala na nonofo i Selusalemi ; ti na nonofo loa le kau Sepusi i Selusalemi mo vosa o Pesamino o kaku mai ki le aso nei.

²² Na pale loa le fale o Sosefo ki Petele, ti na nofo loa le Eteleno mo latou.

²³ Na kakau loa e le fale o Sosefo ni tagata ke ano o sivisivi Petele, leia na igoa i mua ko Lusi.

²⁴ Na tio loa a tagata leo ki se tagata leia na ulu mei le kolo, ti na lotou pati loa kiate ia : fakasa mai kia matou le uluaga ki le kolo, ti e motou fakamauli loa a koe.

²⁵ Na fakasa loa e ia kia latou le uluaga ki le kolo, ti na lotou tamate loa le kolo katoa ki le mata o le seleta, kae na lotou fakamauli loa le tagata lena mo lona famili katoa.

²⁶ Na ano loa le tagata lena ki le fenua o le kau Eti : Ti na laga loa e ia se kolo, ti na tuku loa e ia ki le kolo lena le igoa ko Lusi, igoa leia na maua e ia o kaku mai ki le aso nei.

²⁷ Na leaise kapu loa e Manase le kakai o Pete-Seani ti mo ona kolo liliki, o Taanaki mo ona kolo liliki, o Tole mo ona kolo liliki, o Sipeleami mo ona kolo liliki, o Mekito mo ona kolo liliki ; ti na loto loa le kau Kanaane ke nonofo i le fenua lena.

²⁸ I temi leia na makeke ai loa Iselaele, na teki loa e ia ni gaoi ki le kau Kanaane, kae na leaise mafai ke kapu loa e ia latou.

²⁹ Na leaise kapu loa e Efalaimi le kau Kanaane leia na nonofo i Kesele, ti na nonofo loa le kau Kanaane i loto malie o Efalaimi i Kesele.

³⁰ Na leaise kapu loa e Sapulone le kakai o Kitisoni, mo le kakai o Naaloli ; ti na nonofo loa le kau Kanaane i loto malie o Sapulone, kae na tuku loa e ia kia latou ni gaoi.

³¹ Na leaise kapu loa e Asele le kakai o Ako, mo le kakai o Sitone, mo le kakai o Aselale, mo Akesipe, mo Elipa, mo Afike ti mo Leopi ;

³² Ti na nofo loa Asele i loto malie o le kau Kanaane, kakai o le fenua, talie na leaise kapu loa e ia latou.

³³ Na leaise kapu loa e Nefetali le kakai o Pete-Semesi, mo le kakai o Pete-Anati, ti na nofo loa a ia i loto malie o le kau Kanaane, kakai o le fenua : Kae na fai loa e le kakai o Pete-Semesi mo Pete-Anati ni gaoi kia latou.

³⁴ Na kapu loa e le kau Amole a vosa o Tane ki le mauga, ti na leaise fakataga loa e ia kia latou ke toe ifo ki tai.

³⁵ Na loto loa le kau Amole ke nofo i Ali-Elesi, mo Asaloni, ti mo Saalipimi ; kae na mamafa loa le lima o le fale o Sosefo kia latou ti na lotou tukusau loa kia latou.

³⁶ Na fakalaka loa le koiga o le kau Amole i le fenua o le kau Etome, mei le paleaga o Akelapimi, i le esite.