Tetelonome 32 - Tosi Tapu

Katiko a Moisese

¹ Atu lagi, fakalogo mai ou taliga, ti e kau masau loa. Kele, fakalogo mai ki masau o loku gutu.

² Ke vilo laku akonaki ofaipe se ua, Ke vilo laku masau ofaipe se sese, Ofaipe se sasau ki le vao sesega, Ofaipe ni motii vai ki le mutie !

³ Talie e kau fakasa loa le suafa o le Eteleno. Ke fakavikiviki ki lotatou Atua !

⁴ Ko le Utu a ia ; e malie tukupau ana gaoi, Talie e agatonu ona ala fuli, Ko se Atua agatonu mo faitotonu a ia, E apele a ia i le agatonu mo le maokioki.

⁵ Kapau kua kotou agasala, e leaise tuku loa kiate ia le sala ; Ko le luma ki ana fanau, Lanu kaka mo aga fakalialia.

⁶ Pe ke tuku loa le sala ki le Eteleno, Kakai ulu vale, kakai sala atamai ? Pe leaise ko lou Tamana a ia, ko lou pule ? Pe leaise ko ia leia na fakatupu ia a koe, ti na fakamakeke ia a koe ?

⁷ Toe manatui a aso o le temi mua, Toe liliu ki fetuu mo tautupu kua sili, Vesili ki lou tamana, ti e fakasa atu loa e ia kiate koe, Ti mo ou kau matua, ti e lotou fakamatala atu loa kiate koe :

⁸ I le aso leia na soli ai e le Taualuga se tofiga ki atu puleaga, I le aso leia na fakamavaevae ai e ia a fanau a Atama, Na fakatuu loa e ia a koiga o puleaga ; Ti na tuku loa e ia ke fakalogo a puleaga ki fanau a Iselaele,

⁹ Talie ko le vaega o le Eteleno ko lona kakai, ti ko lona tofiga ko Sakopo.

¹⁰ Na maua e ia a ia i se fenua malo, I se toafa lavaki mo gugulu. Na puipui e ia a ia, ti na tokaga a ia kiate ia. Na tausi e ia a ia ofaipe le tiloga o lona mata.

¹¹ Na fai a ia kiate ia pe se akuila leia e leo i aluga o lona ofaga, ti na ofaki e ia ona uviki. E folasi e ia ona kapakau i lalo o latou, o sapo latou, Ti e amo e ia latou i ona kapakau.

¹² Io, na taki e le Eteleno toka tasi lona kakai, Ti na leaise nofo se atua kese mo ia.

¹³ Na ave e ia a ia ki potu taualuga o le fenua, Ti na kai e Iselaele a fua o faisaga ; Na fakasali e ia kiate ia le meli o le utu, Mo le lolo leia e sali mei le utu fefeka,

¹⁴ Mo le sua u o pipi fafine mo ovi fafine, Mo le gako o akeno, Mo ovi tagata o Pasani, mo koti tagata, Mo le fulumeto malie ; Ti na ke inu ia le toto o le vite, le vino.

¹⁵ Kae na liliu loa Iselaele o peti, ti na tu vae loa a ia. Io, na liliu loa a ia o gako mo makita, ti na tiaki loa e ia le Atua, lona tupuaga. Na vesia loa a ia ki le Utu o lona ulufaga.

¹⁶ Na lotou lagai loa lona finenonofo ki ni atua kese, Ti na lotou fakatupu loa lona sausau ki ni nea fakalialia.

¹⁷ Na lotou momoli loa ni sakilifisio ki ni temonio ala e leaise Atua, Ki ni atua ala e leaise lotou iloa, Ki ni atua foou ala na leaise iloa e olatou tamana.

¹⁸ Io, Iselaele, na ke tiaki loa le Utu leia na fakatupu ia a koe, Ti na ke galoi loa le Atua leia na fanaui ia a koe.

¹⁹ Na tio loa le Eteleno ki le nea lena, ti na logoi loa e ia le vesia, O tupu kua gologolo kiate ia ona vosa mo ona taineliki.

²⁰ Koia na pati ai loa e ia : E kau fufu loa oku mata kia latou, Ti e kau tio loa pe kolea le nea leia ka soko loa kia latou ; Talie ko se tautupu agatuu, Ko ni vosa ala e leaise feala ke fanaki ki ai.

²¹ Na lotou lagai loku finenonofo ki se nea leia e leaise Atua, Na lotou fakatupu loku sausau ki olatou atua noa ; Ti ko au, e kau lagai loa lolatou finenonofo ki se nea leia e leaise ko se kakai, Ti e kau fakatupu ia loa lolatou ita ki se puleaga leia e sala atamai.

²² Talie kua tutu le afi o loku sausau, Ti e mu loa a ia o kaku ki le tafito o le nofoaga o le kau mate ; E tutu loa e ia le kele mo ona nea fuli, E tutu loa e ia a tafito o mauga.

²³ E kau tanaki mai loa a malaia kia latou, E kau kaloloi loa ke oki aku gasau kia latou.

²⁴ E lotou fakalaulautetea loa i le oge, Ti e kai loa latou e le fiva mo tau masaki veli. Ti e kau kakau mai loa kia latou a manu fekai, mo gata uti kona.

²⁵ I fafo e tamate loa e le seleta olatou fanau, I fale e lotou mamate loa i ni malaia veli : Talie e maua loa e le mate a tagata fuli : Mei le tama tupulaga ki le taine tupulaga, Mei le toe memea ki le matua ulu sina.

²⁶ Na kau manatu loa ke maumaui latou, Ti ke soloi oki olatou igoa i aluga o le kele.

²⁷ Kae na kau i na gologolo loa olatou fili kiate au, Ti mo lotou pati loa ko latou ala na fai ia le nea lena, O lotou manatu loa na leaise fai e loku lima a nea fuli ana.

²⁸ Talie ko Iselaele ko se puleaga leia e sese o tupu ko lona loto, E leaise maua ia latou se atamai.

²⁹ Ka na lotou popoto, e lotou matala loa ki le nea leinei, E lotou manatu loa ki le nea leia e soko loa kia latou ki muli.

³⁰ Pe mafai ke tuli loa e se toka tasi se tino afe, Pe ke kapu loa e se toka lua ni tino agafulu afe, Mo kapau na leaise fakatau latou e lolatou Utu, Mo kapau na leaise tuku latou e le Eteleno ?

³¹ Talie e leaise tatau lolatou utu mo lotatou Utu, Leia kua fakamaoki ki ai otatou fili.

³² Kae ko lolatou vite ko se vite mei Sotoma, Ti na taaki a ia mei le kele o Komola ; E mamala olatou fuai vite ofaipe le au, Ti e kona olatou fui vite.

³³ Ko lolatou vino, ko le au kona a ia o gata lalasi, Ko le uti mateia a ia o gata velo.

³⁴ Ko au ko le Eteleno au, Ko lena le nea leia na kau teuteui fakafufu, Ti na kau fakamau i oku koloa fakapulipuli.

³⁵ A aku le lagavaka mo le totogi, I le aso leia e seke ai loa olatou vae ! Talie kua ofi fua le aso o lolatou malaia, Ti e leaise toe tuvai loa le nea leia e talitali kia latou !

³⁶ E fakamaaui loa e le Eteleno lona kakai ; Kae e alofa loa a ia ki ana tagata fakasausau, Mo ka tio a ia kua oki lolatou makeke, Ti e leaise maua se tasi ke tokoi kiate ia, Ti e leaise maua se tasi ke toe fanaki a ia ki ai !

³⁷ E pati loa a ia : Kofea olatou atua, Le utu leia na lotou ulufaga ki ai,

³⁸ A atua ala na kai ia a gako o alatou sakilifisio, Ti na inu ia a vino o alatou moliga ? Ke lotou tutuu mai ki aluga, ti ke lotou saofaki koutou, Ke lotou puipui koutou !

³⁹ Koia ke kotou iloa ko au leia e Atua, Ti e leaise tasi ake Atua i oku tafa. Ko au leia e fakamauli ia ti e fakamate ia. Ko au leia e fai ia le lavea ti e faitoo ia a ia, Ti e leaise tasi leia e saofaki ia mei oku lima.

⁴⁰ Talie e kau siki loku lima ki le lagi, Ti e kau pati : E kau mauli o lee gato !

⁴¹ Kapau e kau fakakakai ke gigila laku seleta, Ti kapau e too e loku lima le faitotonu, E kau lagavaka loa ki oku fili, Ti e kau tautea loa latou ala e vesia kiate au.

⁴² E kai loa e laku seleta olatou kanofi, Ti e kau fakainu loa aku gasau ke konana i lolatou toto, Io i le toto o le kau lavevea mo le kau popula.

⁴³ Atu puleaga, ke kotou sua a fakavikiviki o lona kakai ! Talie e taui e le Eteleno le toto o ana tagata fakasausau, E tautea e ia ona fili, Ti e fai e ia le fakamolemole o agasala ki lona fenua, mo lona kakai.

⁴⁴ Na au loa Moisese mo Sosue, o tuu i mua o le kakai, ti na fakasa loa e ia a folafola fuli o le katiko lena ke lotou logo ki ai.

⁴⁵ I le oki o le lau e Moisese o folafola fuli ana i mua o fanau a Iselaele,

⁴⁶ Na pati loa a ia kia latou : ke kotou too fakamalotoloto a folafola fuli anei e kau fakapapau atu kia koutou i le aso nei, ti ke kotou fakatotonu latou ki okoutou fanau, o tupu ke lotou tausi latou mo fai latou.

⁴⁷ Talie e leaise ko se nea noa a ia kia koutou ; kae ko lokoutou mauli a ia, ti ko le nea a ia e fakatologa ia loa okoutou aso i le fenua leia ka kotou maua tofiga loa, i le oki o lakoutou fakalaka i le Solotane.

Fakatotonu ke pale Moisese ki le mauga

⁴⁸ I le aso foki lena, na masau loa le Eteleno kia Moisese, o pati :

⁴⁹ Ke ke pale ki le mauga o Apalimi, i le tumutumu o le mauga ko Nepo, i le fenua o Moape, i mua o Seliko ; ti ke tio loa ki le fenua o Kanaane leia ka kau soli loa ke maua tofiga e fanau a Iselaele.

⁵⁰ E ke mate loa i aluga o le mauga lena ka ke pale loa ki ai, ti e ke ano loa o fakatasi mo ou tamana, ofaipe lou taina ko Alone leia na mate i le mauga ko Oli ti kua ano o fakatasi mo ona tamana.

⁵¹ Talie ko Alone mo koe, na kolua fai se agasala veli kiate au, i mua o fanau a Iselaele, i tafa o vai o Melipa, i Katesi, i le toafa o Sini, talie na leaise kolua tuku ke sa loku maokioki i loto malie o fanau a Iselaele.

⁵² E ke tio loa ki le fenua mei mamao, kae e leaise ke ulu loa ki le fenua leia e kau soli ki fanau a Iselaele.