Tetelonome 23 - Tosi Tapu

Ko latou ala e tonu ke fakamavae i le fakatasi o le Eteleno

¹ Ko leia kua lavea ona fa kou pe kua motu lona koga fakatagata, ke aua na ulu loa ki le fakatasi a le Eteleno.

² Ke aua na ulu loa ki le fakatasi a le Eteleno leia na tupu mei se fakatasi leia e tapu ; e tatau mo lona tautupu kau agafulu ke aua na ulu loa ki le fakatasi a le Eteleno.

³ Ke aua na ulu loa le Amone mo le Moape ki le fakatasi a le Eteleno ; e tatau mo ola tautupu kau agafulu, ke aua na ulu loa ki le fakatasi a le Eteleno,

⁴ O tupu na leaise lotou au ki okoutou mua mo se pane mo se vai i le aso leia na kotou fanoga ai i le ala, i le oki o lakotou mavae mei Esipito, kae na lotou totogi paaga Palaami, vosa o Peoli, mei Petoli i Mesopotamia, ke tuku ia se malaia kiate koe.

⁵ Kae na leaise fia logo le Eteleno, lou Atua, kia Palaami. Ti na fetogi e le Eteleno, lou Atua kiate koe le malaia ki le tapuakina, talie e alofa le Eteleno, lou Atua, kiate koe.

⁶ Ke aua na afa loa i se aso le malolo mo le malie o kakai ana e lua, i le temi katoa o lou mauli.

⁷ Ke aua na ke vesia loa ki le Etome, talie ko lou taina ; ke aua na ke vesia loa ki le Esipito, talie na ke nofo matapule i lona fenua :

⁸ Ko vosa ala e tupu loa kia laua i le tolu o tautupu e ulu loa ki le fakatasi a le Eteleno.

Ko le mea o le nofolaga

⁹ Ka ke ano loa o tau ki ou fili, ti ka ke fakatuu loa lou nofolaga solia, ke ke tokaga ai ki nea fuli ala e fakatupu kelekele.

¹⁰ Kapau e maua loa iate koe se tagata kelekele, o tupu ko se tutamaki i le pouli, ke mavae loa a ia i le nofolaga solia, ti ke aua na toe ulu loa a ia ki loto i le aso katoa lena.

¹¹ I le afiafi e fakamea loa a ia i le vai, ti e i le vilo o le laa e feala loa ke toe ulu a ia ki loto o le nofolaga solia.

¹² E ke vaei loa se ganea kese i fafo o le nofolaga solia, ke ke ano loa ki ai o faikauga.

¹³ E ke maua loa i lou kavega se nea gaoi. Ka ke fakatutuu loa i le vao, e ke kenu loa se ga popoko o fai ki ai lau faikauga, ti e ke tanu loa lau faikauga i mua o lau toe ulu ki loto o le nofolaga.

¹⁴ Talie e saele le Eteleno, lou Atua, i loto malie o lou nofolaga solia, o puipui a koe mo saofaki a koe mei ou fili. Koia e tonu ai ke mea lou nofolaga solia, ke aua na tio loa le Eteleno ki se nea fakalialia i lou nofolaga ti ke maliu kese loa a ia meiate koe.

Lao ki le kau popula

¹⁵ Ke aua na ke tuku ia loa ki lona pule se tagata fakasausau leia e sola loa mei lona pule o mumuni iate koe.

¹⁶ E nofo loa a ia i lou fale, i loto malie o lou kakai, i le ganea leia e loto a ia ki ai, i le kolo leia e malie kiate ia ; ke aua na ke fakamakeke loa kiate ia.

Ko le lao ki le faiaga

¹⁷ Ke aua na maua loa se fafine faiaga i taineliki o Iselaele, ti ke aua na maua loa se tagata faiaga i vosa o Iselaele.

¹⁸ Ke aua na ke ave loa ki le fale o le Eteleno, lou Atua, le totogi o se fafine faiaga pe ko le totogi o se tagata faiaga, ke fakasoko ai se fakapapau ; talie e fakalialia le Eteleno, lou Atua, ki leia mo leia.

Lao ki maua

¹⁹ Ke aua na ke fakamaua ki lou taina se tupu o se paaga, pe ko se magiti, pe ko se nea fua leia na ke soli maua kiate ia.

²⁰ E feala loa ke ke too se tupu i le matapule, kae ke aua na ke too loa se tupu i lou taina, o tupu ke tapuaki le Eteleno, lou Atua, kiate koe i au gaoi fuli i le fenua leia e ke ulu loa ki ai o maua tofiga.

Ko fakapapau

²¹ Kapau e ke fai loa se fakapapau ki le Eteleno, lou Atua, ti ke aua na ke tuvai loa i lona fai ; talie e afa atu loa e le Eteleno, lou Atua, a ia kiate koe, ti e ke maua ia loa se agasala.

²² Kae kapau e leaise ke fai ia se fakapapau, ti e leaise ke fai ia loa se agasala.

²³ Kae e ke tausi loa mo ke fakasoko ia loa le nea leia e mavae loa mei lou gutu, o mulimuli ki fakapapau ala e ke fai loa ki le Eteleno, lou Atua, i lou loto faitalisa, ti e puaki loa e lou gutu.

²⁴ Kapau e ke ulu loa ki le vite o lou oloi, e feala loa ke ke kai ni fuai vite o makona ; kae ke aua na ke fafao loa latou ki lau kete.

²⁵ Kapau e ke ulu loa ki faisaga fulumeto o lou oloi, e feala loa ke ke tau ki ou lima ni fui fulumeto, kae ke aua na ke fakaaoga loa le sele piko ki le fulumeto o lou oloi.