Tetelonome 16 - Tosi Tapu

Aso o le Pasikate

¹ Ke ke tausi le masina o Apipi, o ke fai loa le Pasikate ki le Eteleno, lou Atua : Talie i le masina o Apipi, na fakamavae a koe e le Eteleno, lou Atua, mei Esipito i le pouli.

² E ke momoli loa le Pasikate ki le Eteleno, lou Atua, ki au vikitima liliki mo lalasi, i le ganea leia e filifili loa e le Eteleno ke nofo ai lona suafa.

³ I le lolotoga o le aso, ke aua na ke kai loa se pane fakatupu, kae e ke kai loa i aso e fitu ni pane sala fakatupu, se pane o le mamae, talie na ke mavae fakatavili i le fenua o Esipito : o tupu ke fakamanatu ai i lou mauli katoa le aso leia na ke mavae ai i le fenua o Esipito.

⁴ I aso e fitu, ke aua na maua loa iate koe se fakatupu, i lou fenua katoa ; ti ke aua na taupau loa se nea e tasi o vikitima ala e ke tamate loa i le afiafi o le uluaki aso ke kaku ki le pogipogi usu.

⁵ Ke aua na ke momoli loa le Pasikate i se tasi ake ganea o potu ala e tuku atu loa e le Eteleno ke ke nofo ai ;

⁶ kae e ke momoli loa le Pasikate i le ganea leia e filifili loa e le Eteleno, lou Atua, ke nofo ai lona suafa, i le afiafi, i le vilo o le laa, i le ola totonu leia na ke mavae ai i Esipito.

⁷ E ke fakamoso loa le vikitima, ti e ke kai loa a ia i le ganea leia e filifili loa e le Eteleno, lou Atua. Ti e ke toe liliu loa i le pogipogi usu ki lou kaiga.

⁸ I aso e ono, e ke kai loa ni pane sala fakatupu ; kae i le fitu o aso e ke fai loa se fakatasi lasi ki le Eteleno, lou Atua : ke aua na ke fai loa se gaoi.

Aso o le Penikosite

⁹ E ke lau loa ni vasaa e fitu ; ka kamata teki loa le sele tuuti fulumeto ki le fulumeto, e ke lau loa ni vasaa e fitu mei ai.

¹⁰ Ti e ke fai loa le aso o le Penikosite ki le Eteleno, lou Atua, ti e ke fai loa ni moliga alofa, o fakafuafua ki le lasi o nea malilie ala na tuku atu kiate koe e le Eteleno, lou Atua.

¹¹ E ke fakafiafia loa i mua o le Eteleno, lou Atua, i le ganea leia e filifili loa e le Eteleno, lou Atua, ke fakanofo ai lona suafa, a koe, mo lou vosa, mo lou taine, mo lau tagata fakasausau, mo lau fafine fakasausau, mo le Levi leia e nofo mo koe, mo le matapule, mo le fanau leia kua mate lona tamana, mo le fafine leia kua mate lona avaga, ala e nonofo loa i loto malie o ou.

¹² E ke manatui loa na ke popula i Esipito, ti e ke tausi loa ti mo ke fai loa a lao fuli ana.

Aso o tapenakulo

¹³ E ke fai loa le aso o tapenakulo i aso e fitu, mo ka ke tanaki loa le fua o lau sasaaga fulumeto mo lau tatauaga vite.

¹⁴ E ke fakafiafia loa i le aso lena, a koe mo lou vosa, mo lou taine, mo lau tagata fakasausau, mo lau fafine fakasausau, mo le matapule, mo le fanau leia kua mate lona tamana, mo le fafine leia kua mate lona avaga, ala e nonofo loa mo koe.

¹⁵ E ke fai loa le aso lena ki le Eteleno, lou Atua, i aso e fitu, i le ganea leia e filifili loa e le Eteleno ; talie e tapuaki loa kiate koe le Eteleno, lou Atua, i au fuata fuli mo gaoi fuli o ou lima, ti e ke fiafia maoki loa.

E leaise tonu ke ano mo lima ata

¹⁶ E tua tolu loa i le fetuu, e ano loa a tagata fuli o lou kakai ki mua o le Eteleno, lou Atua, i le ganea leia e filifili loa e ia : i le aso o pane sala fakatupu, i le aso o le Penikosite, mo le aso o tapenakulo. Ke aua na ano loa ki mua o le Eteleno mo lima ata.

¹⁷ E tasi soli loa e le tagata le nea leia e mafai loa e ia, o mulimuli ki le tapuakina leia e tuku loa kiate ia e le Eteleno, lou Atua.

Fakanofo o tui fakamaau

¹⁸ I kolo fuli ala e soli atu loa kiate koe e le Eteleno, lou Atua, e ke fakanofo loa ni tui fakamaau mo ni ofisa ke fakamaau ia le kakai i le faitotonu.

¹⁹ Ke aua na ke fakasala ia loa le fakamaau, ke aua na ke tio loa ki le tagata, ti ke aua na ke tali loa se moliga, talie e fakakivi e moliga a mata o le kau poto ti e lotou fakasalasala ia loa a masau a le kau agatonu.

²⁰ Kae e ke mulimuli loa ki le faitotonu, o tupu ke ke mauli loa ti mo ke maua tofiga loa le fenua leia e soli loa kiate koe e le Eteleno, lou Atua.

²¹ Ke aua na ke fakatuu loa se taulaatua i tafa o le aletale leia e ke fakatuu ia loa ki le Eteleno, lou Atua.

²² Ti ke aua na ke fakatuu ia loa se fatu tapu. Talie ko nea ana e fakalialia ki ai le Eteleno, lou Atua.