Taniela 1 - Tosi Tapu

Taniela mo ona kaukaunea

¹ I le fetuu tolu a le sau ko Sosakimi, sau o Suta, na au loa a Nepukatenesale, sau o Papilone, o taui Selusalemi.

² Na tuku loa e le Aliki ki ona lima Sosakimi, sau o Suta, mo se potu o nea gaoi o le fale tapu o le Atua. Na ave loa e Nepukatenesale a nea gaoi ki le fenua o Sinea, ki le fale o lona atua, ti na tuku e ia a nea gaoi ki le fale koloa o lona atua.

³ Na tuku loa e le sau le fakatotonu kia Asipenasi, pule o le kau enuke, ke aumai ni iki i fanau o Iselaele, ala e kau i le sakoga fakasau pe ko ni famili aliki,

⁴ ni tama tupulaga lee mele fakatino, mo mata fulumalie, mo poto, mo atamai, ti na malie lolatou ako, ti na mafai ke gaoi i le fale o le sau, ti ke ako loa kia latou le faitosi mo le masau a le kau Kaletea.

⁵ Na fakatotonu loa e le sau ke tuku kia latou i aso taki tasi se vaega mei nea kai o lona laupapa ti mo le vino leia e inu e ia. Na loto le sau ke ako latou i ni fetuu e tolu. I le oki o fetuu ana, e lotou ulu loa o tausi ki le sau.

⁶ Na nofo ia latou, mei vosa o Suta, a Taniela, mo Anania, mo Misaele ti mo Asalia.

⁷ Na soli loa e le pule o le kau enuke ni igoa kia latou, kia Taniela le igoa ko Pelesatesale, kia Anania leia ko Satalake, kia Misaele leia ko Mesake, kia Asalia leia ko Apeteneko.

⁸ Na fakapapau loa Taniela i lona loto ke aua na fakakelekele a ia ki nea kai a le sau mo le vino leia e inu e ia, ti na kolekole loa a ia ki le pule o le kau enuke ke aua na fakamaua kiate ia ke fakakelekele a ia.

⁹ Na fakatupu loa e le Atua i le loto o le pule o le kau enuke se loto malie mo se alofa kia Taniela.

¹⁰ Ti na pati loa le pule o le kau enuke kia Taniela : E kau i ki loku aliki sau, leia na fakatotonu ia le nea leia e tonu ke kotou kai mo inu ; kolea e tio ai loa a ia ki okoutou mata e mamae ake i mata o la ake kau tupulaga leia e fetuu tasi mo koutou ; e teiteiki loa loku ulu o tupu ko koutou.

¹¹ Ti na pati loa Taniela ki le tagata leia na fakatotonu e le pule o le kau enuke ke tokaga kia Taniela, mo Anania, mo Misaele ti mo Asalia :

¹² Ke ke asiasii au tagata fakasausau i ni aso e kau agafulu, o ke soli mai kia matou ni magiti ata ke motou kai ti mo se vai ata ke motou inu ;

¹³ ti e ke tioi loa omatou mata mo mata o le kau tupulaga leia e kai ki nea kai a le sau, ti e ke fai loa ki au tagata fakasausau o mulimuli ki le nea leia e ke tio loa ki ai.

¹⁴ Na tali loa e ia lalatou kole, ti na asiasii loa e ia latou i ni aso e kau agafulu.

¹⁵ I le oki o aso e kau agafulu, na lotou mata fiafia ake mo pepeti ake i le kau tupulaga fuli leia na kai ki nea kai a le sau.

¹⁶ Ti na ave loa e le tagata leia na tausi kia latou a nea kai mo le vino leia na tonu ke soli kia latou, kae na soli loa e ia kia latou ni magiti ata.

¹⁷ Na soli loa e le Atua ki tupulaga ana e toka fa le poto, mo le atamai i faasiga faitosi fuli ti mo le poto ; ti na fakamatala loa e Taniela a tio fuli mo moe miti fuli.

¹⁸ I le kaku ki le temi leia na fakatuutuu e le sau ke avake ai latou kiate ia, na ave loa latou e le pule o le kau enuke ki mua o Nepukatenesale.

¹⁹ Na masau loa le sau mo latou ; ti na leaise tasi fua i le kau tupulaga fuli lena, na tatau mo Taniela, mo Anania, mo Misaele ti mo Asalia. Na lotou ulu loa o tausi ki le sau.

²⁰ I nea fuli ala na aoga ki ai se poto mo se atamai, ti mo nea fuli ala na fakavesilii latou ki ai e le sau, na maua loa e le sau ia latou e lotou popoto lasi ake o tua kau agafulu i le kau fai nea fakatalatupua mo le kau sivi o le temi, ala na maua i lona puleaga katoa.

²¹ Na fenaaki loa le mauli o Taniela o kaku ki le uluaki fetuu a le sau ko Silusi.