Sosue 4 - Tosi Tapu

Tuuga fatu fakamanatu e lua

¹ I le oki o le fakalaka o le puleaga katoa i le Solotane, na pati loa le Eteleno kia Sosue :

² Ke kotou filifili ni tagata e tino agafulu tupu lua, se tagata e tasi i le faasiga.

³ Ke kotou tuku kia latou le fakatotonu leinei : Ke kotou too i leinei, i loto malie o le Solotane, i le ganea leia na tutuu ai le kau tagata faisakilifisio, ni fatu e kau agafulu tupu lua. Kotou ave loa a fatu ana, ti ke kotou tuku loa latou i le ganea leia e kotou momoe ai loa i le po leinei.

⁴ Na kalagai loa e Sosue a tagata e tino agafulu tupu lua ala na filifili e ia i fanau a Iselaele, ko le tagata e tasi i le faasiga.

⁵ Na pati loa a ia kia latou : Ke kotou ano i mua o le aleka o le Eteleno, lokoutou Atua, ki loto malie o le Solotane, ti ke tasi amo e le tagata o koutou se fa fatu ki lona tuauma, o mulimuli ki le lasi o faasiga o Iselaele,

⁶ o tupu ke liliu a ia ko se fakamailoga i loto malie o koutou. Ka vesili atu loa a akoutou fanau kia koutou i se aso : Kolea le uiga o fatu ana kia koutou ?

⁷ E kotou tali loa kia latou : Na tuuti lua a vai o le Solotane i mua o le aleka o le Eteleno ; i le temi leia na fakalaka ai le aleka i le Solotane, na mavaelua a vai o le Solotane, ti e tuu loa a fatu anei ofaipe tausi alofa ki fanau a Iselaele.

⁸ Na fai loa e fanau a Iselaele le nea leia na fakatotonu e Sosue kia latou. Na lotou too loa a fatu e kau agafulu tupu lua i loto malie o le Solotane, o mulimuli ki le nea leia na fakasa e le Eteleno kia Sosue, o fakafuafua ki le lasi o faasiga o Iselaele. Na lotou ave loa latou mo latou ti na lotou tuku loa latou i le ganea leia na lotou nonofo ai i le po lena.

⁹ Na fakatuu foki e Sosue ni fatu e kau agafulu tupu lua i loto malie o le Solotane, i le ganea leia na tutuu ai a tagata faisakilifisio ala na amo ia le aleka o le fakapapau, ti koi lotou tutuu i ai o kaku mai ki le aso nei.

¹⁰ Na tutuu loa a tagata faisakilifisio ala na amo ia le aleka i loto malie o le Solotane, o kaku ki le oki o le fai o nea fuli ala na fakatotonu e le Eteleno kia Sosue ke fakasa ki le kakai, o mulimuli ki nea fuli na tuku e Moisese kia Sosue. Ti na fakavilivili loa le kakai o fakalaka i le Solotane.

¹¹ I le oki o le fakalaka o le kakai katoa i le Solotane, na toe ano loa le aleka o le Eteleno mo le kau tagata faisakilifisio i mua o le kakai.

¹² Ti na saele loa a vosa o Lupeni, mo vosa o Kate ti mo vosa o Manase mo alatou masafu i mua o fanau a Iselaele, o mulimuli ki le pati a Moisese kia latou.

¹³ Na tino fa afe a tagata ala na too ia alatou masafu tau, ti kua tokamalie ki le tau, o saele i mua o le Eteleno ki le fenua o Seliko.

¹⁴ I le aso lena, na fakamakeke e le Eteleno le pule a Sosue i mua o fanau fuli o Iselaele, ti na lotou fakaapaapa loa kiate ia i lona mauli katoa ofaipe lalatou fakaapaapa kia Moisese.

¹⁵ Na pati loa le Eteleno kia Sosue :

¹⁶ Fakatotonu ki le kau tagata faisakilifisio ala e amo ia le aleka o le fakamaoki ke lotou mavae mei le Solotane.

¹⁷ Ti na tuku loa e Sosue le fakatotonu leinei ki le kau tagata faisakilifisio : Ke kotou mavae mei le Solotane !

¹⁸ Na mavae loa le kau tagata faisakilifisio ala na amo ia le aleka o le fakapapau o le Eteleno mei loto malie o le Solotane. I le temi leia na tuu ai loa olatou vae ki le kele fefeka o le kauvai, na toe liliu loa a vai o le Solotane ki lolatou tafeaga, ti na lotou toe mafola loa ofaipe mua, i kauvai o le Solotane.

¹⁹ Na mavae loa le kakai i le Solotane i le aso kau agafulu o le uluaki masina ti na lotou nonofo loa i Kilikale i le fetuu esite o Seliko.

²⁰ Na fakatuu loa e Sosue i Kilikale a fatu e kau agafulu tupu lua ala na lotou too mei loto malie o le Solotane.

²¹ Ti na pati loa a ia ki fanau a Iselaele : Ka vesili atu loa kia koutou, i se temi ki muli, okoutou vosa pe kolea le uiga o fatu anei,

²² ti kotou fakamalamai loa okoutou vosa mo kotou pati loa kia latou : Na fakalaka Iselaele i le Solotane leinei i le malo.

²³ Talie na fakamasa e le Eteleno, lokoutou Atua, i okoutou mua le Solotane, o tupu ke kotou fakalaka i ai, ofaipe lana fakamasa ia kia koutou le tai Kula.

²⁴ Na fai e ia le nea lena ke iloa e kakai fuli o le malama nei e mafimafi le lima o le Eteleno, ti ke kotou fakaapaapa tuumau loa ki le Eteleno, lokoutou Atua.