Sosue 16 - Tosi Tapu

Le tofiga o Efalaimi

¹ Ko le tofiga leia na tuku loa e le toso ki fanau o Sosefo na kamata loa i le Solotane i tafa o Seliko, i le fetuu esite o le matapuna leia e fakavai ia le kolo. Mei Seliko, na ulu loa a ia i le toafa o kaku ki le mauga o Petele.

² Na soko atu loa a ia i Petele ki Lusi, ti na fakalaka loa a ia i Ataloti leia na nofo ai le kau Alaki.

³ Ti na ifo loa a ia ki le potu uesite ki le koiga o le kau Safeleti o kaku ki leia o le kau Pete-Oloni i lalo o kaku ki Kesele, o ano loa o kaku ki le tai Metitelanea.

⁴ Ko lena le tofiga leia na maua e vosa o Sosefo, ko Manase mo Efalaimi.

⁵ Ko leinei a koiga o vosa o Efalaimi, o mulimuli ki olatou famili. Ko le koiga o lolatou tofiga, i le potu esite, na natu i Ataloti-Ata o kaku ki Pete-Oloni aluga.

⁶ Na soko atu a ia i le potu uesite ki Mikemetati i le noleto, o maliu loa i le esite ki Taanati-Silo, ti na fakalaka loa o ano ki Sanoake.

⁷ I Sanoaki na ifo loa a ia ki Ataloti mo Naalata, o kaku loa ki Seliko, ti na fakaoki loa a ia ki le Solotane.

⁸ I le potu uesite o Mikemetati, na natu le koiga i Tapuake o kaku ki le liua o Kana, o kaku loa ki le tai Metitelanea. Ko lena le tofiga leia na tuku loa ki vosa o Efalaimi.

⁹ Ti na toe maua foki e vosa o Efalaimi ni kolo mo olatou kolo liliki ala na tuu i le tofiga o le faasiga o Manase.

¹⁰ Na leaise mafai loa e vosa o Efalaimi le kapu o le kau Kanaane leia na nofo i Kesele, ti na nofo loa le kau Kanaane i loto malie o Efalaimi o kaku mai ki le aso nei, kae na lotou fakasausau loa mo tukusau loa ki fanau a Efalaimi.