Sosue 11 - Tosi Tapu

Malo lasi i Melomi

¹ I le logo a Sapini, sau o Atesoa, ki le nea lena, na kakau loa e ia ni tagata avelogo kia Sopape, sau o Matoni, mo le sau o Similoni, mo le sau o Akisafi,

² mo sau ala na nonofo i le mauga, mo le fenua o le Solotane i le saute o le vai ko Kineleti, mo le fenua taulalo, ti mo le fenua o Tole i le uesite,

³ mo le kau Kanaane o le esite mo le uesite, mo le kau Amole, mo le kau Eti, mo le kau Pelesi, mo le kau Sepusi i le mauga, ti mo le kau Evi i vae o le Elemoni i le fenua o Misipa.

⁴ Na lotou ulu loa ki fafo, a latou mo olatou kau solia fuli, ti na lotou fakatasi loa ko se kakai e tasi o api ofaipe le one i le mata tai, ti na lotou maua ni kau osi mo ni kau saliote lasi ai.

⁵ Na lotou fakatuutuu loa se ganea ke lotou fakatasi ki ai, ti na lotou ano loa o nonofo fakatasi o feofi ki vai o Melomi, ke tau ki Iselaele.

⁶ Na pati loa le Eteleno kia Sosue : Ke aua na ke i kia latou, talie i le aso apogipogi, i le ola leinei, e kau tuku loa latou fuli ke tamate i mua o Iselaele. E ke tuuti loa a ivi o vae o alatou osi ti e ke tutu loa olatou saliote i le afi.

⁷ Na kaku fakapunamauli loa Sosue mo lona kau solia kia latou i atu vai o Melomi, ti na lotou osoi loa latou.

⁸ Na tuku loa latou e le Eteleno ki lima o Iselaele ; na lotou tamate loa latou ti na lotou tuli loa latou o kaku ki le kolo lasi ko Sitone, mo Misilefoti-Maimi, ti mo le vaivailiua o Misipa i le esite ; Na lotou tamate loa latou, o leaise sao loa se fa toka tasi.

⁹ Na fai loa e Sosue kia latou o mulimuli ki le nea na fakatotonu e le Eteleno kiate ia. Na tuuti loa e ia a ivi o vae o alatou osi, ti na tutu loa e ia olatou saliote i le afi.

Malo i le noleto

¹⁰ I lana toe liliu, na too loa e Sosue a Asoli, leia na tuu i le temi lena ko le kolo mua o puleaga o le potu noleto, ti na taai loa e ia ki le mata o le seleta lona sau.

¹¹ Ti na tamate loa e ia ki le mata o le seleta a kakai fuli na maua i le kolo ; na leaise toe sao loa se fa toka tasi ti na tutu foki e ia ki le afi le kolo ko Asoli.

¹² Na toe too foki e Sosue a kolo fuli o sau ana, ti mo olatou sau, ti na tamate loa e ia latou ki le mata o le seleta, ti na tamate e ia latou fuli, o mulimuli ki le fakatotonu na tuku kiate ia e Moisese, tagata fakasausau a le Eteleno.

¹³ Kae na leaise tutu loa e Iselaele se kolo fua e tasi o kolo ala na tuu i aluga o mauga liliki, gato fai ki Asoli leia na tutu e Sosue.

¹⁴ Na too loa e fanau a Iselaele kia latou a koloa fuli ti mo manu ala na lotou maua i kolo ana, kae na lotou taai loa ki le mata o le seleta le kakai katoa, ti na leaise lotou tuku loa ke mauli se fa toka tasi.

¹⁵ Na fai loa e Sosue a fakatotonu a le Eteleno ki lona tagata fakasausau ko Moisese, ti na toe tuku loa e Moisese kia Sosue ; na leaise tiaki noa loa e ia se nea fua e tasi i nea fuli ala na fakatotonu e le Eteleno kia Moisese.

¹⁶ Na fenaaki le maua loa e Sosue o le fenua katoa lena : le fenua o le mauga, le fenua katoa o le saute, le fenua katoa o Koseni, le fenua taulalo, le fenua o le vaivailiua o le Solotane, mo le fenua o mauga o Iselaele, ti mo le toafa o le potu noleto,

¹⁷ mei le mauga leia e tuu i Seili o kaku ki Paale-Kati, i le vaivailiua o Lipane, i vae o le mauga ko Elemoni. Na too loa e ia olatou sau fuli, ti na taai loa e ia latou ki le mata o le seleta o latou mamate ai.

¹⁸ Na fai loa e Sosue le tau ki sau fuli ana o fualoa.

¹⁹ Na leaise fai loa e se kolo e tasi le tokamalie mo fanau a Iselaele, gato fuai kia Kapaone, leia na nofo ai le kau Evi ; na lotou too loa latou fuli i le tau.

²⁰ Talie na fakataga e le Eteleno ke fakafefeka a loto o puleaga ana o tau ki Iselaele, o tupu ke tamate latou e Iselaele, ti ke aua na maua loa se alofa kia latou, kae ke tamate latou ke puli oki, o mulimuli ki le nea leia na fakatotonu e le Eteleno kia Moisese.

²¹ I le temi foki lena, na toe ano loa Sosue o taui le kau Anake ala na nonofo i mauga o Epelone, mo Tepile, mo Anape, mo mauga fuli o Suta ti mo mauga fuli o Iselaele. Na tamate loa latou fuli e Sosue ti na maumaui katoa loa e ia olatou kolo.

²² Na leaise toe maua se Anake i le fenua o Iselaele, kae na toe fai i Kasa, mo Kati, ti mo Asetoti.

²³ Na too loa e Sosue le fenua katoa, o mulimuli ki nea fuli ala na fakasa e le Eteleno kia Moisese. Ti na tuku loa a ia e Sosue ki Iselaele ko lona tofiga, o vaevae i faasiga o Iselaele. Ti na malolo loa le fenua i le tau.