Sopo 4 - Tosi Tapu

Valoki o Sopo e Elifasi

¹ Ti na masau loa Elifasi mei Temane, o pati :

² Kapau e motou asiasi masau kiate koe, pe ke mamae loa ? Kae ko ai leia koi mafai lana fakaleemu ?

³ Ko leinei, na ke ako ia le toka api, Ti na ke fakamakeke ia a lima gagae,

⁴ Na toe lagai ki aluga e au masau latou ala na meimeiki ke siga, Ti na ke fakamakeke a tuli ala kua mapelu.

⁵ Ka ko leinei kua soko a ia kiate koe totonu, ti kua ke gaegae ! Ko leinei kua kaku mai kiate koe le malaia, ti kua ke i !

⁶ Ko lau tui ki le Atua, pe leaise ko lou tokoi a ia ? Ko lou agatonu ki le Atua, pe leaise ko lau amanaki malie a ia ?

⁷ Fakamanamanatu pe kua i ai se tagata mea leia kua malaia ? Ti ko ai ma a tagata agatonu ala kua motusi ?

⁸ Kiate au, kua kau tio totonu ki ai, ko latou ala na to ia le agaveli Ti na muluki ia le agasala na toe utu ia a fua ;

⁹ E tamate latou e le tukumanava a le Atua, Ti e tutu latou e le matagi o lona sausau.

¹⁰ E fakagato e ia le gugulu a laione, Ti e fatifatii e ia a nifo o uviki laione.

¹¹ E mate le laione talie e leaise koi maua se nea kai, Ti e mavetevete a uviki o le laione fafine.

¹² Na kaku mai kiate au se masau fakafufu, Ti na logoi e loku taliga lona mumusui.

¹³ I le temi leia e gaoi ai le moe miti le fakakaukau, Mo ka kua tuku a tagata ki se moe loloto,

¹⁴ Na soko mai loa kiate au se i lasi, mo se lulu, Ti na lulu loa oku ivi fuli.

¹⁵ Na fakalaka loa se laumalie i oku tafa… Ti na tuu tala loa oku fului ulu fuli…

¹⁶ Na tuu se tasi i oku mua, kae na leaise kau iloa lona agaaga. Ti na kau logo loa ki se leo leia na musumusu mamalie fua :

¹⁷ Pe agatonu loa le tagata i mua o le Atua ? Pe mea loa a ia i mua o leia na fakatupu ia a ia ?

¹⁸ Kapau e leaise fanaki le Atua ki ana tagata fakasausau, Ti kapau e maua e ia se valea i ana kau aselo,

¹⁹ Ti e feaki ake loa latou ala e nonofo i ni fale kele, Latou ala na fakatupu mei le kele, Latou ala e feala ke takatakafi ofaipe ni kelemutu !

²⁰ E fatifatii latou ki lalo mei le usu ki le afiafi, E lotou puli o lee gato, kae e leaise tokaga se tasi fua ki ai.

²¹ Kua motusi le va o lolatou mauli, E lotou mamate, kae e leaise lotou ako fua le poto.