Sopo 29 - Tosi Tapu

Masau a Sopo iate ia

¹ Na toe fai e Sopo se tasi masau mamafa, o pati :

² Oi, ka na mafai ke kau toe liliu ki masina kua sili, Ki aso ala na taupau ai au e le Atua,

³ Ki le temi leia na mu ai lona malama i loku fa ulu, Ti na taki ai au e lona malama i le fakapouli !

⁴ Kolea e leaise kau toe maua ai a aso o loku makeke, Ala na leoleo ai le Atua ki loku fale ofaipe soku kaukaunea,

⁵ Ala nofo ai le Mafimafi mo au, Ti na takatakai ai au e aku fanau ;

⁶ I le temi leia na maanu ai oku vae i koloa, Ti na sali ai ni vaitafe lolo i oku tafa mei le utu !

⁷ Kapau na kau ulu o ano ki le matapa o le kolo, Ti kapau na kau pati ke teuteui mai soku ekeekeaga i le lapalasi o le kolo,

⁸ Na mavae le kau tupulaga i laku fakafeofi atu, Ti na tutuu le kau matua ki aluga.

⁹ Na taofi e le kau aliki alatou masau, Ti na teki olatou lima ki olatou gutu ;

¹⁰ Na fakaleemu le kau pule, Ti na mate noa olatou alelo i olatou gutu.

¹¹ Ko le taliga leia e logo ki aku masau e pati mai kiate au : Manuia a koe ! Ti ko le mata leia e tio kiate au e fakamaoki mai kiate au ;

¹² Talie e kau saofaki le mativa leia e kole mai ke mauli, Mo le toe sala matua leia e leai sona fanakiaga.

¹³ Na au kiate au le tapuakina a le tagata fakaaloalofa ; Ti na kau fakaapele ki le fiafia le loto o le fafine lokonui.

¹⁴ Na kau kofu ki le faitotonu, ti na kau fai kiate ia pe se kofu. Na kau taupulupulu mo puloga ki le maokioki.

¹⁵ Na kau liliu ko le mata o le tagata kivi, Ti mo le vae o le tagata kito.

¹⁶ Na kau liliu ko le tamana o le kau fakaaloalofa, Ti na kau tokaga ki le matapule.

¹⁷ Na kau fatii le gutu o leia e leaise faitotonu, Ti na kau tatai mei ona nifo lana nea kai.

¹⁸ I le temi lena na kau pati : E kau mate loa i loku ofaga, Ti e mauke loa oku aso ofaipe le one.

¹⁹ E ulu loa le vai ki oku aka, Ti e fakamokomoko loa e le sasau o le mafoata oku laa.

²⁰ E sesega tuumau loa loku kololia, Ti e fakafoou loa laku kalolo i loku lima.

²¹ I le temi lena na fakalogo mai kiate au, ti na nofo le kakai o talitali mai kiate au, Ti na fakalologo o fakalogo mai ki aku akonaki.

²² I le oki o laku masau, e leaise toe tali se tasi, Ti na fai laku masau kia latou fuli pe se sasau mokomoko ;

²³ Na lotou talitali kiate au ofaipe le talitali ki le ua, Ti na lotou fakamavaa olatou gutu o inu aku masau ofaipe le inu o se ua i le temi mafana.

²⁴ Na kau malimali kia latou mo ka kua lotou loto gaegae, Ti na leaise mafai ke puli le fiafia i oku mata.

²⁵ Na kau fia ano tuumau kia latou, ti na kau tonatona i olatou mua ; Na kau faipe se sau i loto malie o se fa solia, Pe se tagata fakafimalie i tafa o latou ala na mamae.