Sopo 27 - Tosi Tapu

Tali fakaoki a Sopo o fakasa lona mea

¹ Na fai loa e Sopo se masau mamafa, o pati :

² E mauli le Atua, leia e leaise fia fakasa ia loku faitotonu ! E mauli le Mafimafi, leia kua fakaapele ia loku laumalie ki se mamae kona !

³ I le temi katoa koi kau tukumanava ai, Ti koi maua ai le matagi a le Atua i loku isu,

⁴ E leaise puaki loa e oku laugutu se nea leia e leaise totonu, Ti e leaise pati loa loku alelo ki se nea leia e sala.

⁵ E mamao iate au le manatu ke fakatonuia koutou ! O kaku ki laku tukumanava fakaoki e kau taofi ki loku saosaoa.

⁶ E kau loto ke kukumi tukupau loku maokioki, e leaise kau toe gaegae loa ; E leaise fakalakasala au e loku loto i se nea fua e tasi o loku mauli.

⁷ Ke tatau loku fili mo le tagata agaveli, Ti ke tatau leia e fakafesagai mai kiate au mo le tagata agasala !

⁸ Ko le amanaki malie fea leia e toe ki le tagata agasala, Mo ka tuuti e le Atua le va o lona mauli, Mo ka too e le Atua lona laumalie ?

⁹ Pe fakalogo le Atua ki ana kalaga, Mo ka taomia a ia i le mamae ?

¹⁰ Pe maua e ia lona fiafia i le Mafimafi ? Pe faikole a ia i temi fuli ki le Atua ?

¹¹ E kau ako atu loa kia koutou a ala o le Atua, E leaise kau fufu loa kia koutou a fakatuutuu a le Mafimafi.

¹² Kae e kotou iloa a nea ana, ti e kotou fakamaoki ki ai ; Kolea e kotou mulimuli ai i ni manatu noa ?

¹³ Ko leinei le vaega leia e taofi e le Atua ki le tagata agasala, Le tofiga leia e tuku e le Mafimafi ki le tagata agaveli.

¹⁴ Kapau e lasi ni ona vosa, e tamate loa latou e le seleta, Ti e leaise maua loa e olatou uli se pane ke feauga.

¹⁵ Ti e tanu loa e le taumasaki veli latou ala e sao i le seleta, Ti e leaise tagi loa olatou avaga kia latou.

¹⁶ Kapau e tanaki e ia le paaga ofaipe le efu, Ti kapau e fakatuuga e ia ni kofu ofaipe le pela,

¹⁷ E tanaki fua e ia, kae ko le tagata agatonu leia e teuteui ki ai a nea ana, Ti ko le tagata saosaoa leia e maua ia loa le paaga.

¹⁸ E fai lona fale pe leia e fakatuu e le unufe, Pe le falepola leia e fakatuu e le tagata leo vite.

¹⁹ E moe a ia i koloa, kae e mate loa a ia i le telefua ; E fakamavaa ake e ia ona mata, o tio kua puli nea fuli.

²⁰ E fakalomaki a ia e le malaia ofaipe le vai ; Ti e too a ia e le asesio i le pouli.

²¹ E ave a ia e le matagi o le potu esite ki mamao ; Ti e taaki fakamakeke a ia e le afa i lona nofoaga.

²² E fana fakaveliveli e le Atua ana gasau kiate ia, Ti e oli a ia ke sola ke sao i gasau.

²³ E pasipasi a lima i lona vilo, Ti e mapumapu kiate ia i lana ano.