Senesi 22 - Tosi Tapu

Sakilifisio o Isaake

¹ Na sili loa ki nea ana, ti na asiasii loa e le Atua a Apalaamo, ti na pati loa a ia kiate ia : Apalaamo ! Ti na tali loa a ia : Ko leinei au !

² Na pati loa le Atua : Too lou vosa, lou vosa fuatasi, leia e ke alofa ki ai, ko Isaake ; ano ki le fenua o Molisa, ti ke momoli loa a ia i le ganea lena ko se failaulau i aluga o se mauga leia e kau fakasa loa kiate koe.

³ Na tuu ake loa Apalaamo i le pogipogi usu, o teuteui lana asino, ti na too loa e ia ni tagata fakasausau e toka lua ke ano mo ia, ti mo lona vosa ko Isaake. Na taisi loa e ia se fafie ki le sakilifisio, ti na ano loa a ia ki le ganea leia na pati ki ai le Atua.

⁴ I le tolu o aso, na siki ake loa e Apalaamo ona mata, ti na tio loa a ia mei mamao ki le mauga.

⁵ Ti na pati loa Apalaamo ki ana tagata fakasausau : Kolua nonofo i leinei mo le asino ; ko au mo le tupulaga, e ma ano loa o kaku ki aluga o atolasio, ti o ma toe liliu mai loa kia koulua.

⁶ Na too loa e Apalaamo le fafie o le failaulau, o fakaamo a ia ki lona vosa ko Isaake, kae too loa e ia i lona lima le afi mo le sele. Ti na la saele fakatasi loa toka lua.

⁷ Na pati loa Isaake kia Apalaamo lona tamana : Ei loku Tamana ! Na tali loa a ia : Ko leinei au, ei loku vosa ! Na toe pati loa Isaake : Ko leinei le afi mo le fafie, kae kofea loa le akeno ki le failaulau ?

⁸ Na tali loa Apalaamo : Ei loku vosa, e tokaga loa le Atua totonu ki le akeno o le failaulau. Ti na la saele fakatasi loa, toka lua.

⁹ Na la kaku loa ki le ganea leia na pati ki ai le Atua, ti na fakatuu loa e Apalaamo se aletale, ti na fakatoka loa e ia le fafie i aluga. Na sai loa e ia lona vosa ko Isaake, o teki ki le aletale, i aluga o fafie.

¹⁰ Ti na falo loa e Apalaamo lona lima, o too le sele ke tamate ai lona vosa.

¹¹ Kae na kalaga loa le Aselo o le Eteleno mei lagi, o pati : Apalaamo ! Apalaamo ! Ti na tali loa a ia : Ko leinei au !

¹² Na pati loa le aselo : Aua na fafa lou lima ki le fanau, ti aua na ke fai se nea kiate ia ; talie e kau iloa i le aso nei e ke i ki le Atua, ti na leaise ke fakafiti mai kiate au lou vosa, lou fuatasi.

¹³ Ti na siki ake loa e Apalaamo ona mata, ti na tio loa a ia ki se ovi tagata i ona muli leia kua taofi ona tala i se ulu vao. Ti na ano loa Apalaamo o too le ovi tagata, o momoli a ia ko se sakilifisio, o fetogi ai lona vosa.

¹⁴ Na soli loa e Apalaamo ki le ganea lena le igoa ko Seova-Sile. Koia leia e pati ai i aso nei : I le mauga e soli loa e le Eteleno le nea leia e aoga !

¹⁵ Na toe kalaga loa le aselo o le Eteleno mei lagi kia Apalaamo, ko lona tua lua a ia,

¹⁶ o pati : E kau fakapapau iate au totonu, folafola a le Eteleno ! Talie na ke fai le nea lena, ti na leaise ke fakafiti mai kiate au lou vosa, lou fuatasi,

¹⁷ E kau tapuaki loa kiate koe, ti e kau liuliuga loa lou sakoga ofaipe fetuu o le lagi mo le one o le mata tai ; ti e maua loa e lou sakoga le matapa o ona fili.

¹⁸ E tapuakina loa a puleaga fuli o le malama nei i lou sakoga, talie na ke fakalogo ki loku leo.

¹⁹ Na toe liliu loa Apalaamo ki ana tagata fakasausau, ti na lotou tutuu ake loa o toe liliu fakatasi ki Pele-Sepa. Talie na nofo Apalaamo i Pele-Sepa.

²⁰ I le sili o nea ana, na fakasa loa kia Apalaamo, o pati : Ko leinei, kua fanaui foki e Milika ni tamaliki kia Nakole, lou taina.

²¹ Ko Usi ko lona uluaki, mo Pusi ko lona taina, mo Kemuele ko le tamana o Alame,

²² Mo Keseti, mo Aso, mo Pilitasi, mo Sitila, mo Petuele.

²³ Na fakatupu loa e Petuele a Lepeka. Ko vosa ana e valu na fanaui e Milika kia Nakole, ko le taina o Apalaamo.

²⁴ Ko le lua avaga o Nakole na igoa ko Leuma, na fanaui loa e ia Tepaki, mo Kaami, mo Taasi, ti mo Maaka.