Senesi 11 - Tosi Tapu

Tule o Papele

¹ Na masau tasi le malama nei katoa, mo kupu tatau.

² Na lotou mavae loa mei le potu esite, o lotou maua loa se kele laumalie i le fenua ko Sinea, ti na lotou nonofo loa i ai.

³ Na lotou pati loa : Tou tutuu ki aluga ! Tou fai ni piliki, ti tou tao latou i le afi. Ti na lotou fakaaoga loa le piliki ko le fatu, ti mo le kele pupulu ko le sima.

⁴ Na lotou toe pati loa : Tou tutuu ki aluga, ti tou fakatuu se kolo mo se tule leia e tau lona tumutumu ki le lagi ; ke logo ai lotatou igoa, ti ke aua na tou mavetevete loa i aluga o le malama nei katoa.

⁵ Na ifo loa le Eteleno o tio ki le kolo mo le tule leia na fakatuu e vosa o tagata.

⁶ Ti na pati loa le Eteleno : Ko leinei, e lotou nofo ko se kakai e tasi, ti e lotou masau ki se pati e tasi, ti ko leinei le nea kua lotou kamata fau ; i le temi nei e leaise nea leia e toe taofi ia loa latou i le fakasoko o nea fuli ala e lotou loto loa ki ai.

⁷ Koia tou ifo o veuki ai lalatou masau, ke aua na lotou toe felogoi ia latou.

⁸ Ti na fakamavetevete loa latou e le Eteleno i aluga o le malama nei katoa ; ti na lotou taofi loa i ai le fakatuu o le kolo.

⁹ Koia leia na tuku ai loa ki le kolo lena le igoa ko Papele, talie ko le ganea lena na veuki ai e le Eteleno le masau o le malama nei katoa, ti ko le ganea lena na fakamavetevete ai latou e le Eteleno i aluga o le malama nei katoa.

Tamana o Apalaamo

¹⁰ Ko leinei le sakoga o Semi. Ko Semi, i lona fetuu kau lelau, na fakatupu ia loa Alepakesate, i le sili o fetuu e lua ki le lomaki.

¹¹ Na mauli loa Semi, i le oki o le tupu o Alepakesate i fetuu e kau lelau lima ; ti na fakatupu loa e ia ni vosa mo ni taineliki.

¹² Ko Alepakesate, i lona fetuu kau tolu tupu lima, na fakatupu ia loa Selake.

¹³ Na mauli loa Alepakesate, i le oki o le tupu o Selake i fetuu e kau lelau fa tupu tolu ; ti na fakatupu loa e ia ni vosa mo ni taine.

¹⁴ Ko Selake, i lona fetuu kau tolu, na fakatupu ia loa Epele.

¹⁵ Na mauli loa Selake, i le oki o le tupu o Epele i fetuu e kau lelau fa tupu tolu ; ti na fakatupu loa e ia ni vosa mo ni taineliki.

¹⁶ Ko Epele, i lona fetuu kau tolu tupu fa, na fakatupu ia loa Peleke.

¹⁷ Na mauli loa Epele, i le oki o le tupu o Peleke i fetuu e kau lelau fa kau tolu ; ti na fakatupu loa e ia ni vosa mo ni taineliki.

¹⁸ Ko Peleke, i lona fetuu kau tolu, na fakatupu ia loa a Leu.

¹⁹ Na mauli loa Peleke, i le oki o le tupu o Leu i fetuu e kau lelau lua tupu iva ; ti na fakatupu loa e ia ni vosa mo ni taineliki.

²⁰ Ko Leu, i lona fetuu kau tolu tupu lua, na fakatupu ia loa Seluki.

²¹ Na mauli loa Leu, i le oki o le tupu o Seluki i fetuu e kau lelau lua tupu fitu ; ti na fakatupu loa e ia ni vosa mo ni taine.

²² Ko Seluki, i lona fetuu kau tolu, na fakatupu ia loa Nakole.

²³ Na mauli loa Seluki, i le oki o le tupu o Nakole i fetuu e kau lelau lua ; ti na fakatupu loa e ia ni vosa mo ni taineliki.

²⁴ Ko Nakole, i lona fetuu kau lua tupu iva, na fakatupu ia loa Telake.

²⁵ Na mauli loa Nakole, i le oki o le tupu o Telake i fetuu e kau lelau kau agafulu tupu iva ; ti na fakatupu loa e ia ni vosa mo ni taineliki.

²⁶ Ko Telake, na fetuu kau fitu, na fakatupu ia loa Apalamo, mo Nakole, mo Alane.

²⁷ Ko leinei le sakoga o Telake : Ko Telake na fakatupu ia loa Apalamo, mo Nakole, mo Alane. Na fakatupu loa e Alane a Lote.

²⁸ Ti na mate loa Alane i mua o lona tamana ko Telake, i le fenua leia na tupu ai, i Ulu i Kaletea.

²⁹ Na avaga loa Apalamo ti mo Nakole : Ko le igoa o le avaga o Apalamo ko Salai, ti ko le igoa o le avaga o Nakole ko Milika, taine o Alane. Ko Alane ko le tamana foki a ia o Siseka.

³⁰ Na paa Salai ; na leaise maua sana fanau.

³¹ Na too loa e Telake lona vosa ko Apalamo, mo Lote, vosa o Alane, vosa o lona vosa, ti mo Salai, lona fugao, avaga o Apalamo lona vosa. Ti na lotou mavae fakatasi loa mei Ulu i Kaletea, o ano ki le fenua o Kanaane. Na lotou kaku loa ki Salani, ti na lotou nofo loa i ai.

³² Ko aso o Telake ko fetuu e kau lelau lua tupu lima ; ti na mate loa Telake i Salani.