Selemia 6 - Tosi Tapu

Agasala a Suta, fakasa o le tautea

¹ Kotou sosola, fanau o Pesamino, i loto malie o Selusalemi, Kotou pupusi le fakatagi pupusi i Tekoa, Kotou toso se manumanu i Pete-Akelemi ! Talie kua sa mei le potu noleto se malaia, Ti mo se maumau lasi.

² Taine fulumalie mo fakaeteete, E kau maumaui loa a koe, taine o Sione !

³ E saele kiate ia ni kau tausi manu mo alatou kau manu ; E lotou fakatuu olatou falela i ona tafatafa, E lotou tasi kai lona vaega.

⁴ Kotou teuteu ke osoi a ia ! Tou ano, tou pale i le lalatea totonu !… Malaia kia tatou, talie kua toetoe le aso, Kua fakaloloa a malu le afiafi.

⁵ Tou ano, tou pale i le pouli ! Tou maumaui ona fale sau !

⁶ Talie e folafola le Eteleno o kau tau, o pati : Kotou sele ki lalo laakau, Kotou fau ni palepale tau ki Selusalemi ! Ko le kolo lena e tonu ke tautea ; Talie kua apele a ia i agaveli ata.

⁷ Ofaipe se vai e mapuna mei se sosoni, E mapuna foki lona agaveli meiate ia ; E masau ata iate ia ki le fakamakeke mo le maumau ; E tio tuumau oku mata ki le mamae mo lavea.

⁸ Ei Selusalemi, tali le akonaki, Ke aua na kau fakamamao iate koe, Ke aua na kau fakaliliu a koe ko se toafa, Ko se fenua lavaki !

⁹ E folafola le Eteleno o kau tau, o pati : E taetae loa a toetoega o Iselaele ofaipe le vite. E toe falo lou lima ki ai, Ofaipe le tagata tau vite ki tafito vite.

¹⁰ Ko ai leia e tonu ke kau masau ki ai, ti ko ai leia e tonu ke too ko se tagata fakamaoki ke lotou fakalogo mai ai kiate au ? Ko leinei, kua tulituli lolatou taliga, Ti e leaise mafai fua ke lotou tokaga ; Ko leinei, e fai le folafola a le Eteleno kia latou pe se lumaaga, E leaise lotou maua i ai se fiafia fua e tasi.

¹¹ Kua kau apele i le sausau o le Eteleno, e leaise koi mafai ke kau taofi a ia i loku loto. Liligi a ia ki le toe ikiiki i le ala, Ti mo le fakatasiga a le kau tupulaga. Talie e too loa le tagata mo le fafine, Le matua ti mo leia kua mafaia i fetuu.

¹² E tuku loa olatou fale ki ni iki, Mo olatou faisaga ti mo alatou avaga, I le aso leia e falo ai loa loku lima ki le kakai o le fenua, E pati le Eteleno.

¹³ Talie mei leia e ikiiki o kaku ki leia e lasi, E lotou manumanu fuli ki le paaga ; Mei le polofeta o kaku ki le tagata faisakilifisio, e lotou fai kaka fuli.

¹⁴ E lotou faitoo fakakaka le lavea o le taine o loku kakai ; E lotou pati : Tokamalie ! tokamalie ! Kae e leai se tokamalie ;

¹⁵ Pe lotou luma loa, talie e lotou fai ni nea fakalialia ? E leaise lotou kukula fua, e leaise lotou iloa le luma ; Koia e lotou vivilo fakatasi loa mo latou ala e vivilo, E lotou sisiga loa i le aso leia e kau tautea ai loa latou, E pati le Eteleno.

¹⁶ E folafola le Eteleno, o pati : Kotou tutuu i ala, o tio, Ti kotou vesili pe kofea a ala afea, Pe kofea le ala malie ; kotou saele i ai, Ti e kotou maua loa le malolo o okoutou laumalie ! Kae e lotou tali : E leaise motou saele loa i ai.

¹⁷ Na kau tuku ki okoutou tafa ni tagata leo : Kotou tokaga ki le tagi o le fakatagi pupusi ! Kae e lotou tali : E leaise motou tokaga loa ki ai.

¹⁸ Koia kotou fakalogo mai, ei atu puleaga ! Ke kotou iloa le nea leia e soko loa kia latou, fakatasiga a atu kakai !

¹⁹ Kele, fakalogo mai ! Ko leinei, e kau kakau mai ki le kakai leinei le malaia, Fua o ana manatu ; Talie na leaise lotou tokaga ki aku folafola, Na lotou tiaki aku lao.

²⁰ Kolea le aoga mai kiate au o le iseso leia e au mei Sepa, Mo le lolo manogi mei se fenua mamao ? E leaise malilie akoutou failaulau kiate au, Ti e leaise kano malie akoutou sakilifisio kiate au.

²¹ Koia e folafola ai le Eteleno, o pati : Ko leinei, e kau tuku loa ki mua o le kakai leinei ni fatu fakatupu siga, Ala e tegea fakatasi loa i ai le tamana mo le vosa, Le oloi mo kaukau nea, ti e lotou mamate loa.

²² E folafola le Eteleno, o pati : Ko leinei, e au se kakai mei le fenua o le potu Noleto, E malaga ake ki aluga se puleaga lasi mei potupotu o le malama nei.

²³ E lotou too le kalolo mo le tao ; E lotou tukipo, sala manava alofa. E gugulu lolatou leo ofaipe le tai. E lotou eke i ni osi, O fakaatu pe se tagata e tasi, Ke taui a koe, taine o Sione !

²⁴ I le logo ki lalatou saele, E gaegae omatou lima, E maua matou e le i Ofaipe le mamae o se fafine leia e fanau.

²⁵ Aua na kotou ano ki faisaga, Aua na kotou saele i ala, Talie e nofo i ai le seleta a le fili, Ti e taka le mate i le takatakai katoa !

²⁶ Taine o loku kakai, ke ke pulou ki se taga, ti ke ke mafulifuli i le mugalafu, Tui le kofu o le putu ofaipe le putu ki se vosa fuatasi, Fakasali ou loimata, ni loimata kona ! Talie e au fakafokifa kia tatou le tagata maumau.

²⁷ Na kau fakanofo a koe ofaipe se tagata oono ukamea, Ofaipe se kolo tau Ke ke iloa ti mo ke oono ona ala.

²⁸ Ko ni kau agatuu fuli latou, ko ni kau fatufatu ; Ko se kapa mo se ukamea ; Kua lotou fakalialia fuli.

²⁹ Kua vela le nea pupusi matagi, Kua okioki le pulu i le afi ; Kae e leaise uiga o le fakamea : E leaise mavae a sikoli.

³⁰ E fakaigoa latou ko se siliva veli, Talie kua tiaki latou e le Eteleno.