Selemia 5 - Tosi Tapu

Ko le tupuaga o le tautea

¹ Kotou foli i ala o Selusalemi, Kotou tio, kotou iloa, kotou afa i nofoaga fakafenua, Pe nofo i ai se tagata, pe i ai se tasi Leia e fai ia le faitotonu, leia e pipiki ki le maoki, Ti e kau fakamolemole loa ki Selusalemi.

² Tatau aifai pe lotou pati : E mauli le Eteleno ! E lotou fai se fakamaoki loi.

³ Eteleno, pe leaise tio ou mata ki le maoki ? E ke taai latou, kae e leaise lotou logoi fua se mamae ; E ke tutu latou ke okioki, kae e leaise lotou tokaga fua ki se akonaki : E lotou asili fakafefeka ake olotou mata i le fatu ; E leaise lotou fia tafoki kiate koe.

⁴ Na kau pati : Ko toe liliki fai ana e fai fenaaki, Talie koi lotou valelea, ti e leaise lotou iloa le ala o le Eteleno, Le lao o lolatou Atua.

⁵ E kau ano loa ki le kau lalasi, ti e kau masau loa kia latou, Talie ko latou, e lotou iloa le ala o le Eteleno, Le lao o lolatou Atua ; Kae kua lotou fatii fulifuli le laakau taki, Kua lotou motusi a sai.

⁶ Koia e tamate ai latou e le laione o le vao, E maumaui ai latou e le lupo o le toafa, E lamalama ai latou e le taika i mua o olatou kolo ; Ko latou fuli ala e mavae loa i kolo e sae loa ; Talie kua lasi ai alatou agasala, ti kua liuliuga ai alatou agatuu.

⁷ Kolea e kau fakamolemole ai loa kiate koe ? Na tiaki au e au fanau, Ti e lotou fakapapau i ni atua ala e leaise ko ni atua. Na kau fagai latou ke makokona, kae na lotou faiaga, E lotou tanaki fuli i le fale o le fafine faiaga.

⁸ O tatau mo ni kau osi kua makokona ti e makape saele, E lotou tasi oli ki le avaga o lona oloi.

⁹ Pe leaise kau tautea loa a nea ana, e pati le Eteleno, Pe leaise kau totogi loa ki se puleaga felaaki ?

¹⁰ Kotou kava ki ona paa, ti kotou soloi, Kae aua na kotou maumaui katoa ! Kotou tatai ona tafito vite Ala e leaise kau ki le Eteleno !

¹¹ O tupu na agatuu kiate au le fale o Iselaele mo le fale o Suta, E pati le Eteleno.

¹² E lotou fakafiti ki le Eteleno, e lotou pati : E leaise Atua ! Ti e leaise au loa le malaia kia tatou, E leaise tou tio loa ki le seleta mo le oge.

¹³ Ko ana kau polofeta ko ni matagi ata, Ti e leaise masau se tasi ia latou. Ke fai kia latou le nea leia e lotou masau ki ai.

¹⁴ Koia e folafola ai le Eteleno, le Atua o kau tau, o pati : O tupu na kotou pati le nea lena, Ko leinei, e kau loto ke fai laku folafola i lou gutu pe se afi, Ti ke fai le kakai leinei pe se fafie, Ti ke tutu a ia e le afi lena ke okioki.

¹⁵ Ko leinei, e kau aumai loa mei mamao se puleaga kia koutou, fale o Iselaele ; E pati le Eteleno ; Ko se puleaga makeke a ia, ko se puleaga afea, Se puleaga leia e leaise ke iloa lana masau, Ti e leaise ke matala loa ki ana masau.

¹⁶ E fai lana tanakiaga gasau pe se tanuma mavaa ; E lotou totoa fuli.

¹⁷ E kai loa e le puleaga lena lau fulumeto mo lau pane ; E kai loa e ia ou vosa mo ou taineliki ; E kai loa e ia au ovi mo au pipi ; E kai loa e ia lau vite mo lau fiki ; E maumaui loa e ia ki le seleta ou kolo tau ala e ke fanaki ki ai.

¹⁸ Kae i aso ana, e pati le Eteleno, E leaise kau maumaui fuli loa koutou.

¹⁹ Kapau e kotou pati loa i le aso lena : Kolea e fai ai e le Eteleno, lomatou Atua, a nea fuli anei kia matou ? E ke tali loa kia latou : Talie na kotou tiaki au, Ti na kotou tausi ki ni atua matapule i lokoutou fenua, Koia e kotou popula loa ki ni matapule i se fenua leia e leaise ko lokoutou fenua.

²⁰ Kotou fakasa le nea leinei ki le fale o Sakopo, Kotou kalaga a ia i Suta, ti kotou pati :

²¹ Kotou fakalogo mai ki le nea leinei, kakai valea, kakai leia e leai sona mafu ! E lotou maua ni mata kae e leaise lotou tio fua, E lotou maua ni taliga kae e leaise lotou logo fua.

²² Pe leaise kotou i loa kiate au, e pati le Eteleno, Pe leaise kotou lulu loa i oku mua ? Ko au leia na soli ia le one ke fakagatogato ai le tai, Ko se koiga kua lau sekulo leia ke aua na fakalaka ai a ia ; Kapau e pale loa ona galu, kae e leaise lotou makeke ake loa ; Kapau e lotou gugulu, kae leaise lotou fakalaka loa i ai.

²³ E maua e le kakai leinei se loto patigataa mo agatuu ; E lotou agatuu, ti e lotou ano.

²⁴ E leaise lotou pati i olatou loto : Ke tou i ki le Eteleno, lotatou Atua, Leia e soli ia le ua i lona temi Le ua i mua mo le ua i muli, Ti e taupau ia kia tatou a vasaa ke tuuti ai le fulumeto.

²⁵ E tupu ko akoutou agasala na leaise soko ai a nea ana, Ko akoutou agasala ala na taofi ia a nea malilie ana ia koutou.

²⁶ Talie e maua i lotolotoga o loku kakai ni tagata agaveli ; E lotou lamalama ofaipe le tagata kapu manu lele, leia e fakatuu ia ni masele ; E lotou folasi ni kupega, ti e lotou tapo ni tagata.

²⁷ Ofaipe se kisi kua apele i manu lele ; Kua apele foki olotou fale i le kaka ; Koia leia kua lotou liliu ai o mauiga mo mou koloa.

²⁸ Kua lotou pepeti, ti kua lotou gigila ; Kua lotou fakalaka i fuafua fuli o le veli ; E leaise lotou fakamaau i le faitotonu, E leaise lotou fakamaau i le faitotonu le toe sala matua, leia e tonu ke malo i lona fakamaau ; E leaise lotou fai le nea e totonu ki le kau mativa.

²⁹ Pe leaise kau tautea loa a nea ana, e pati le Eteleno, Pe leaise kau totogi loa ki se puleaga felaaki ?

³⁰ E fai i le fenua Ni nea fakaii mo fakalialia.

³¹ E faikikite le kau polofeta i le loi, Ti e kau fakatasi mo latou le kau faisakilifisio, o pule faifaitalisa, Ti e fiafia loku kakai i le nea lena. Kolea e kotou fai loa i le fakaoki ?