Selemia 46 - Tosi Tapu

Folafola kikite ki Esipito

¹ Ti na tuku loa le folafola a le Eteleno kia Selemia, le polofeta, o uiga mo atu puleaga.

² Ki Esipito. Ki le solia a Falaone Neko, sau o Esipito, leia na nofo i tafa o le vaitafe ko Eufalate, i Kalekemisi, ti na tamate e Nepukatenesale, sau o Papilone, i le fetuu fa o Sosakimi, vosa o Sosiasi, sau o Suta.

³ Kotou teuteu le paletau ikiiki mo le paletau lasi, Ti kotou saele ki le tau !

⁴ Kotou fakagutu a osi, Kotou eke ki osi, kau ekeosi ! Kotou au mo okoutou puloga tau, kotou fakagigila akoutou tao, Kotou tui le kofu tau !…

⁵ Kolea e kau tio ki ai ? E lotou i, e lotou solomuli ; Kua lava olatou tagata toa ; Kua lotou sosola, e leaise lotou toe tio ki muli… Kua takatakai latou e le i, e pati le Eteleno.

⁶ Ke aua na maua e leia e mauvave se fakamauli i le sola, Ke aua na sao leia e toa ! I le potu noleto, i laugutu o le Eufalate, E lotou tukia, e lotou sisiga.

⁷ Ko ai leia e au ofaipe le Nile, Ti e malagalaga ona atu vai ofaipe ni vaitafe makeke ?

⁸ Ko Esipito. E au a ia ofaipe le Nile, Ti e malagalaga ona atu vai ofaipe ni vaitafe makeke. E pati a ia : E kau pale loa, e kau mafola loa i le kele, E kau maumaui loa a kolo mo olatou kakai.

⁹ Kotou pale, osi ! Kotou makape, saliote ! Ke lotou sa mai, a tagata toa, Latou o Etiopia mo Puti ala e too ia le paletau, Ti mo latou o Lute ala e faikalolo !

¹⁰ Ko le aso leinei o le Aliki, o le Eteleno o kau tau ; Ko se aso o le lagavaka, leia e totogi ai e ia ki ona fili. E kai le seleta, e makona a ia, E kona a ia i lolatou toto. Talie e i ai ni vikitima a le Aliki, a le Eteleno o kau tau, I le fenua o le potu noleto, i laugutu o le Eufalate.

¹¹ Pale ki Kalaate, too se lolo faitoo, Taine taupoou, taine o Esipito ! E leaise uiga o lau liuliuga faitoo, Talie e leaise ke toe mauli loa.

¹² E logo atu puleaga ki lou luma, Ti e fakaapele e au tagi fenua, Talie e tukia le toa ki le toa, Ti e la sisiga fakatasi toka lua ki lalo.

¹³ Ti na fakasa loa le folafola a le Eteleno kia Selemia, le polofeta, o uiga mo le kaku mai a Nepukatenesale, sau o papilone, leia na loto ke taai ia le fenua o Esipito.

¹⁴ Kotou fakasa a ia i Esipito, Kotou fakasa a ia i Miketoli, Kotou fakasa a ia i Nofi mo Takepanese ! Kotou pati : Tuu ki aluga, teuteu, Talie e kai le seleta i ou tafa !

¹⁵ Kolea e ave ai au tagata toa ? E leaise lotou tuu makeke, talie e fakasisiga latou e le Eteleno.

¹⁶ E fakatukia e ia se toka api ; E lotou sisiga leia ki leia, ti e lotou pati : Tou ano, tou toe liliu ki lotatou kakai, Ki lotatou fenua tupu, O mamao i le seleta maumau !

¹⁷ I lena, e kalaga : Falaone, sau o Esipito, Ko se logoa noa a ia ; kua oki lona temi.

¹⁸ E kau mauli ! e pati le sau, Leia e igoa ko le Eteleno o kau tau : Ofaipe le Tapole i loto malie o atu mauga, Ofaipe le Kalemelo leia e oso ki le tai, E au loa le fili.

¹⁹ Teuteu lau taga ki le popula, Taine o Esipito ! Talie e liliu loa Nofi ko se toafa, E maumaui loa a ia, e leaise toe nofo loa i ai se kakai.

²⁰ Ko Esipito ko se uviki pipi fafine fulumalie ai… E au le tagata maumau mei le potu noleto, e kaku mai a ia…

²¹ E saele ana kau solia totogi mo ia ofaipe ni uviki pipi na fakapepeti. Kae ko latou foki, e lotou titua, e lotou sosola fuli sala ga fakatutuu fua. Talie kua soko le aso o lolatou malaia, Le aso o lolatou tautea.

²² E logo lona leo ofaipe leia o le gata ; Talie e lotou saele ofaipe se solia, E lotou saele kiate ia mo ni toki Ofaipe ni tagata ta laakau.

²³ E lotou sele lona vaomatua, e pati le Eteleno, Logo ai le faigataa o le ulu ki ai ; Talie e lotou toka api ake i seseivaka, E leaise mafai ke lau latou.

²⁴ Kua luma le taine o Esipito, Talie kua tuku a ia ki lima o le kakai o le potu noleto.

²⁵ E pati le Eteleno o kau tau, le Atua o Iselaele : Ko leinei, e kau tautea loa Amone, le atua o No, Falaone, mo Esipito, mo ona atua ti mo ona sau, Falaone ti mo latou ala e fanaki kiate ia.

²⁶ E kau tuku loa latou ki lima o latou ala e loto ki lolatou mauli, Ki lima o Nepukatenesale, sau o Papilone, Ti mo lima o ana tagata fakasausau ; Ti ka oki le nea lena, e toe nofoi loa Esipito ofaipe le temi mua, E pati le Eteleno.

²⁷ Ti ko koe, laku tagata fakasausau ko Sakopo, aua na ke i ; Aua na ke tuania, Iselaele ! Talie e kau saofaki loa a koe i le kele mamao, E kau saofaki loa lou sakoga i le fenua leia e popula ai ; E toe liliu mai loa Sakopo, e fiafia loa a ia i le malolo mo le fimalie, Ti e leaise toe fakamamae loa a ia e se tasi.

²⁸ Ko koe, laku tagata fakasausau ko Sakopo, aua na ke i ! e pati le Eteleno ; Talie e kau nofo mo koe. E kau fakapuli loa a atu puleaga fuli ala na kau fakamavetevete a koe ki ai, Kae ko koe, e leaise kau fakapuli loa a koe ; E kau tautea loa a koe i le faitotonu, Talie leaise mafai ke kau tuku a koe sala tautea.