Selemia 39 - Tosi Tapu

Too o Selusalemi ; ave o Setesiasi ki Papilone

¹ I le too o Selusalemi, i le fetuu iva o Setesiasi, sau o Suta, i le masina kau agafulu, na au loa Nepukatenesale, sau o Papilone, mo lana solia katoa o takatakai Selusalemi.

² I le fetuu kau agafulu tupu tasi o Setesiasi, i le aso iva o le masina fa, na fai loa se pu i le kolo,

³ Ti na au loa a kau pule fuli a le sau o Papilone, o nofo i le matapa i loto malie : ko Nekale-Saletesele, mo Samekale-Nepu, mo Salesekime, pule o le kau enuke, mo Nekale-Saletesele, pule o le kau masi, mo la ake kau pule fuli a le sau o Papilone.

⁴ I le tio loa a Setesiasi, sau o Suta, mo kau tagata tau fuli kia latou, na lotou sosola loa, ti na lotou mavae loa mei le kolo i le pouli i le ala o le oloto o le sau, mo le matapa i loto o paa e lua, ti na lotou too loa le ala o le toafa.

⁵ Kae na tuli loa latou e le solia a le kau Kaletea, ti na tapo loa e ia Setesiasi i le toafa o Seliko. Na lotou too loa a ia, o ave kia Nepukatenesale, sau o Papilone i Lipela, i le fenua o Amati ; ti na fakamaui loa e ia aia i ai.

⁶ Na fakatotonu loa e le sau o Papilone ke tamate a vosa o Setesiasi i ona mua ; ti na toe fakatotonu foki e le sau o Papilone ke tamate a kau lalasi fuli o Suta.

⁷ Ti na fakatotonu e ia ke kape a mata o Setesiasi, ti ke saisai a ia ki ni tini sila, o ave ki Papilone.

⁸ Ti na tutu loa e le kau Kaletea ki le afi le fale o le sau mo fale o le kakai, ti na lotou maumaui loa a paa o Selusalemi.

⁹ Ti na ave loa e Nepusalatane, pule o le kau leo, o fakapopula i Papilone latou o le kakai ala na nofo i le kolo, mo latou ala na ano kiate ia, ti mo le toetoega o le kakai.

¹⁰ Kae na tuku loa e Nepusalatane, pule o le kau leo, i le fenua o Suta le kakai mativa, latou ala na leai salatou nea ; ti na soli loa e ia kia latou ni faisaga vite mo ni faisaga.

Fakamavae o Selemia i le pilisoni

¹¹ Ti na tuku loa e Nepukatenesale, sau o Papilone, le fakatotonu leinei kia Nepusalatane, pule o le kau leo, o uiga mo Selemia :

¹² Too a ia, tokaga kiate ia, aua na ke fai kiate ia se nea veli, kae fai kiate ia o mulimuli ki lona loto.

¹³ Ti na fakatotonu loa e Nepusalatane, pule o le kau leo, mo Nepusasepane, pule o le kau enuke, mo Nekale-Saletesele, pule o le kau masi, mo kau pule fuli a le sau o Papilone,

¹⁴ Ke afa mai Selemia mei le malae o le fale pilisoni, ti na lotou tuku loa a ia kia Ketalia, vosa o Asikame, vosa o Safani, ke taki a ia ki lona fale. Ti na nofo loa Selemia i loto malie o le kakai.

¹⁵ Na folafola loa le Eteleno kia Selemia, ka koi pilisoni a ia i le malae o le fale pilisoni, o pati :

¹⁶ Ano o masau kia Epeti-Meleke, le tagata Etiopia, o pati kiate ia : E folafola le Eteleno o kau tau, le Atua o Iselaele, o pati : Ko leinei, e kau aumai loa ki le kolo leinei le veli kae leai le malie, leia kua kau fakasa. E soko loa a ia i aso anei, ti e ke tio loa ki ai.

¹⁷ Kae e pati le Eteleno, i le aso lena, e kau saofaki loa a koe, ti e leaise tuku loa a koe ki lima o tagata, ala e ke i ki ai.

¹⁸ E kau saofaki loa a koe, ti e leaise ke mate loa i le seleta ; ko lou totogi ko lou mauli, talie na ke fanaki kiate au, e pati le Eteleno.