Sakopo 5 - Tosi Tapu

¹ Kia koutou loa, kau mou koloa ! Kotou tagi mo lauga, o tupu ko malaia ala ka au loa kia koutou.

² Kua popo okoutou koloa, ti kua kai okoutou kofu e ugogo.

³ Kua kelemea lakotou aulo mo lakotou paaga ; ti e malaga loa lola kelemea o fakamaoki kia koutou, ti e kai loa e ia okoutou kanofi ofaipe se afi. Kua kotou tanaki ni koloa i aso anei ko aso fakamuli !

⁴ Ko leinei, e tagi le totogi o le kau gaoi, ala na tuuti ia akoutou faigasaga, kae na kotou taofi olatou totogi ; ti kua kaku a tagi a latou ala na tuuti ki taliga o le Aliki o kau tau.

⁵ Kua kotou mauli i le malama nei i fiafia lalasi mo fiafia veveli o le tino, ti kua kotou fakamakona okoutou loto i le aso o le katoaga.

⁶ Kua kotou fakalakasala mo tukipooi le Agatonu, leia na leaise taofi ia koutou.

Fakamakeke kesekese o uiga mo le toe liliu mai o le Aliki

⁷ Koia, fetaina, ke kotou kataki fualoa, o kaku ki le toe liliu mai a le Aliki. Kotou tio ki le talitali a le tagata gaoi kele ki le fua mauiga o le kele : e talitali a ia o kaku ki le to o ua o le temi mamate ti mo ua o le temi tutupu.

⁸ Ko koutou foki, ke kotou kataki fualoa, kotou fakamakeke okoutou loto, talie kua vave fua le saele mai a le Aliki.

⁹ Fetaina, aua na kotou felaugaaki a la ki la, talie ke aua na fakamaaui koutou e le Atua ; ko leinei, kua tuu le tui fakamaau i le matapa.

¹⁰ Ei oku fetaina, kotou too le kau polofeta, ala na masau i le suafa o le Aliki, ofaipe ni faifaitakiaga o le kataki fualoa i le mamae.

¹¹ Ko leinei, e motou fakasa kua manuia latou ala na kataki fualoa i le mamae. Kua kotou logo ki le kataki fualoa o Sopo, ti kua kotou tio ki le fakaoki leia na tuku e le Aliki kiate ia, talie e apele le Aliki i le manavaalofa ti mo le aloalofa.

¹² Ei oku fetaina, i mua o nea fuli, ke aua na kotou fakamaoki i le lagi, pe i le kele, pe i se tasi ake fua nea. Kae ke io lakoutou io, ti ke leai lakoutou leai, o tupu ke aua na kotou vilo ki le malaia.

¹³ Pe mamae se tasi ia koutou ? Ke faikole a ia. Pe fiafia se tasi ? Ke sua e ia ni katiko.

¹⁴ Pe masaki se tasi ia koutou ? Ke kalagai e ia le kau fakamatuatua o le Ekelesia, ti ke faikole le kau fakamatuatua kiate ia, o takai a ia ki se lolo i le suafa o le Aliki ;

¹⁵ Ti ko le faikole i le tui e fakamauli ia loa le masaki, ti e fakatuu loa a ia e le Aliki ; ti kapau na fai e ia ni agasala, e fakamolemole loa kiate ia.

¹⁶ Koia ke kotou fekofesioaki akoutou agasala, ti kotou fefaikoleaki, o tupu ke kotou mauli. E aoga lasi ai le faikole fakamalotoloto a le tagata agatonu.

¹⁷ Ko Elia ko se tagata na natula tasi mo tatou : Na faikole fakamalotoloto loa a ia ke aua na to se ua, ti na leaise to loa se ua ki le kele i fetuu e tolu mo masina e ono.

¹⁸ Ti na toe faikole loa a ia, ti na soli loa e le lagi le ua, ti na toe fakatupu loa e le kele lona fua.

¹⁹ Ei oku fetaina, kapau kua sese se tasi ia koutou mei le maoki, ti e toe aumai a ia e se tasi,

²⁰ ke kotou iloa ko leia e aumai ia loa se tagata agasala mei le ala leia na sese ai, e fakamauli loa e ia se laumalie mei le mate, ti e ufiufi loa e ia ni agasala mauke ai.