Sakopo 3 - Tosi Tapu

E fakasa le tui maoki i le pule ki le alelo

¹ Ei oku fetaina, ke aua na fai akonaki se toka api, talie e kotou iloa e lasi loa lotatou tautea.

² Talie e tou tukia fuli i nea kesekese. Kapau e leaise tukia se tasi i ana masau, ko se tagata saosaoa a ia, kua mafai e ia le taofi o lona tino katoa.

³ Kapau e tou fakaulu le fakagutu ki gutu o osi, o tupu ke lotou fakalogo kia tatou, e tou taki loa lolatou tino katoa.

⁴ Kotou tio foki ki vaka, ala e lalasi ti e fakagasolo e matagi makeke, kae e taki latou e se ga foe ikiiki, o fakalogo ki le pailate.

⁵ E toe tatau foki mo le alelo, ko se ga koga tino ikiiki fua a ia, kae e viki a ia ki nea lalasi. Kotou tio ki le vaomatua lasi leia kua tutu e se ga afi ikiiki !

⁶ Ti ko le alelo foki ko se afi ; ko se malama a ia o le agasala. Kua fakatuu le alelo i lotolotoga otatou koga tino, o fakakelekele le tino katoa. E tutu e ia lotatou mauli katoa ki le afi leia e au kiate ia mei Ifeli totonu.

⁷ Talie na fakalalata e le tagata i mua, ti e koi fakalalata nei foki e ia a manu fekai kesekese fuli, mo manu lele, mo manu totolo, ti mo manu o le tai ;

⁸ Kae ko le alelo, e leaise tagata leia kua ma fakalalata ia a ia : ko se veli a ia e leaise feala ke taofi ; e apele a ia i se kona mateia.

⁹ E tou fakafetai ki le Aliki lotatou Tamana i le alelo, ti e tou lauveli foki i le alelo ki tagata ala na fai o fakatatau ki le paaki o le Atua.

¹⁰ Mei le gutu fuai e tasi e mapusi ai le tapuaki mo le malaia. E leaise tonu, ei oku fetaina, ke fenaaki.

¹¹ Pe mafai ke mapusi mei se matapuna e tasi le vai mami mo le taiatea ?

¹² Pe mafai, ei oku fetaina, ke fua se fiki ko ni fuai olive, pe ko se vite ko ni fuai fiki ? E leaise feala foki ke fakatupu e se taiatea se vai mami.

Le poto fakamalama mo le poto fakalagi

¹³ Ko ai leia e poto mo atamai ia koutou ? Ke fakamaoki e ia a ia ki le malie o lana aga, ti mo ni gaoi ala e fai i le agamalu mo le poto.

¹⁴ Kae kapau e kotou maua i okoutou loto se oli kona mo se loto fefele, aua na kotou viki koutou, ti aua na kotou loi ki le maoki.

¹⁵ E leaise ifo le poto lena mei aluga ; kae e fakamalamanei a ia, mo fakakanofi, mo fakatemonio.

¹⁶ Talie ko le ganea leia e i ai se oli kona mo se loto fefele, e maua ai le maveuveu ti mo gaoi veveli kesekese fuli.

¹⁷ Ko le poto mei aluga, e fuafuaki mea a ia ; ti lua e tokamalie a ia, mo agamalu, mo loto malie, mo apele i le manavaalofa ti mo fua malilie, mo mea mei le fakapalatasi ti mo le malualoi.

¹⁸ Talie e muluki le fua o le faitotonu i le tokamalie e latou ala e afa ia le tokamalie.