Pesalemo 73 - Tosi Tapu

Ko le malie fakatemi o gaoi a le tagata agaveli

¹ Pesalemo a Asafe. Io, e agamalie le Atua ki Iselaele, Kia latou ala e loto mea.

² Kae, na teiteiki ke tatepa loku vae, Na teiteiki ke kau seke i aku laka ;

³ O tupu na kau fua ki le kau vale, I laku tio ki le manuia o le kau agaveli.

⁴ E leaise lotou mamae fua i se nea o kaku ki lolatou mate, Ti e mamafa olotou kuaga i le malolo ;

⁵ E leaise lotou kau fua i mamae o tagata fuli, E leaise taai latou ofaipe le toega o tagata.

⁶ Koia kua lotou kasoa ai ki le fia nealasi, Ti kua lotou kofu ai ki le agamakeke ;

⁷ E ulu le agaveli mei olatou tootooga, Ti e sa ki le malama a manatu o olatou loto.

⁸ E lotou gologolo, ti e lotou masau fakaitaita ke fakamakeke, E lotou fai ni masau matasoka.

⁹ E lotou siki olatou gutu o lauveli ki le lagi, Ti e evaeva olatou alelo i le malama nei.

¹⁰ Koia leia e maliu ai le kakai o le Atua kia latou, O inu fai mate alatou masau ofaipe le vai,

¹¹ Ti e pati ai a ia : Pe iloa feaki loa e le Atua ? Pe iloa feaki loa e ia leia e nofo i aluga ?

¹² E fenaaki le kau agaveli : E lotou manuia tuumau, e lotou fakatupu o lasi olatou koloa.

¹³ E maoki na leai sona aoga ke kau fakamea loku loto, Ti ke kau fufulu oku lima i le maokioki :

¹⁴ I aso fuli e taai au ; I usu fuli e tuu loku tautea i oku mua.

¹⁵ Kapau na kau pati : E kau fia masau ofaipe latou, Ko leinei, e kau kakaai loa le sakoga o au fanau.

¹⁶ I le aso na fakakaukau ai ki le nea lena ke kau malama ki ai, Na lasi ai le faigataa o le nea lena ki oku mata,

¹⁷ O kaku ki le temi na kau ulu ai ki sagatualio o le Atua, Ti na kau tokaga ai loa ki le fakaoki o le kau agaveli.

¹⁸ Io, e ke tuku latou ki ni ala sekeseke, E ke tuku ke lotou vivilo ki ni masele ti ke lotou maumau ai.

¹⁹ Kolea koia ! I se kemo o le mata ko lena latou kua maumau ! Kua too latou, kua lotou pupuli i se mate fakafokifa !

²⁰ Ofaipe se moe miti i le ala ake, Aliki, i lau ala ake, e ke tekei kese olatou paaki.

²¹ I le temi leia na mamae ai loku loto, Ti na kau logoi ai e sukii oku tootooga iate au,

²² Na kau valea mo sala atamai, Na kau fai kiate koe pe manu.

²³ Kae ko le maoki e kau nofo tuumau mo koe : Na ke too loku lima atamai ;

²⁴ E ke taki loa au i lou poto, Ti e ke tali loa au i lou kololia.

²⁵ Ko ai ake iate koe e kau maua i le lagi ? Ti i le malama nei e kau maua loku fiafia iate koe toka tasi.

²⁶ E feala ke gaegae loku tino mo loku loto : Kae ko le utu o loku loto mo loku vaega ko le Atua, o lee gato.

²⁷ Talie ko leinei, ko latou ala e fakamamao iate koe e mamate ; E ke maumaui latou fuli ala na vesia kiate koe.

²⁸ Kiate au, ko laku fakafeofi ki le Atua, ko lena loku koloa : E kau fakatuu loku mumuniaga i le Aliki, le Eteleno, O tupu ke fakamatala au gaoiaga fuli.