Pesalemo 66 - Tosi Tapu

Tapuaki i le oki o le asiasii

¹ Ki le pule o le kau sua. Katiko. Pesalemo. Kotou kalaga fakafiafia ki le Atua, Koutou fuli, ko le kakai o le malama nei !

² Kotou sua le kololia o lona suafa, Kotou sua lona kololia i akoutou fakafetai !

³ Kotou pati ki le Atua : E fakaii ai au gaoiaga ! O tupu ko le lasi o lou makeke, e fakavikiviki ou fili kiate koe.

⁴ E atolasio le malama nei katoa kiate koe ti e sua e ia lou mauiga ; E sua e ia lou suafa. - Manava.

⁵ Kotou au, ti kotou tio ki gaoiaga a le Atua ! E fakaii a ia mo ka gaoi a ia ki vosa o le tagata.

⁶ Na fetogi loa e ia le tai ko se kele malo, Na fakalaka loa i le vaitafe i vae : Koia na motou fiafia loa iate ia.

⁷ E pule a ia o lee gato i lona mafimafi, E tio ona mata ki atu puleaga : Ke aua na malaga ki aluga le kau agatuu ! - Manava.

⁸ Atu kakai, ke kotou fakafetai ki lomatou Atua, Ke kotou fakagugulu ni fakafetai kiate ia !

⁹ Na taupau e ia omatou laumalie, Ti na leaise fakataga e ia ke seke omatou vae.

¹⁰ Talie na ke asiasii matou, ei Atua ! Na ke tuku matou ke fakalaka i le kulo saka ukamea ofaipe le siliva.

¹¹ Na ke aumai matou ki le kupega, Ti na ke sai ki omatou vakavaka se kavega mamafa.

¹² Na ke tuku ke eke ni tagata i omatou ulu, Na motou fakalaka i le afi mo le vai. Kae na ke too matou i ai, o tupu ke soli kia matou le mou koloa.

¹³ E kau ano loa ki lou fale mo ni failaulau, E kau fai loa aku fakapapau kiate koe :

¹⁴ Io, a fakapapau ala na fakasa e oku laugutu Ti na puaki e loku gutu i loku mamae.

¹⁵ E kau momoli loa kiate koe ni failaulau ko ni ovi pepeti, Mo le gako o ovi tagata ; E kau fai loa ni sakilifisio ki ni ovi fafine mo ni koti tagata. - Manava.

¹⁶ Kotou au, kotou fakalogo, koutou fuli ala e i ki le Atua, ti e kau fakamatala loa Le nea leia na fai e ia ki loku laumalie.

¹⁷ Na kau tagi kiate ia i loku gutu, Ti na nofo le fakafetai i loku alelo.

¹⁸ Ka na kau fai ni manatu veveli i loku loto, Na leaise tali loa e le Aliki laku kole.

¹⁹ Kae ko le maoki na tali e le Atua laku kole, Na tokaga a ia ki le leo o laku kole.

²⁰ Ke fakafetai ki le Atua, Leia na leaise tiaki ia laku kole, Leia na leaise too ia lona agamalie iate au !