Pesalemo 50 - Tosi Tapu

Ko sakilifisio malie ki le Atua

¹ Pesalemo a Asafe. Atua, Atua, le Eteleno, ke ke folafola, ti ke ke fakatasi le malama nei, Mei le sopoaga o le laa ki le galoaga o le laa.

² Mei Sione, mataga fulumalie mo saosaoa, e gigila le Atua.

³ E au lotatou Atua, e leaise nofo fakalologo a ia ; E ano se afi kaka i ona mua, E takatakai a ia e se afa makeke.

⁴ E kalaga a ia ki le atu lagi i aluga, Ti e kalaga a ia ki le kele, o tupu ke fakamaau lona kakai :

⁵ Ke kotou fakatasi mai kiate au aku kau agatonu, Latou ala na fai ia se sai mo au i le sakilifisio !

⁶ Ti e fakasa loa e le atu lagi lona faitotonu, Talie ko le Atua leia e tui fakamaau. - Manava.

⁷ Fakalogo mai, ei loku kakai ! ti e kau masau loa ; Iselaele ! e kau valoki loa a koe, Ko au ko le Atua, ko lou Atua.

⁸ E leaise kau valoki a koe o tupu ko au sakilifisio ; Pe ko au failaulau ala e fai tuumau i oku mua.

⁹ E leaise kau too loa se pipi tagata i lou fale, Pe ko ni koti tagata i ou lotoa manu.

¹⁰ Talie ko manu fuli o le vao a aku, Mo manu fuli o mauga, o lau i afe mo afe ;

¹¹ E kau iloa a manu lele fuli o mauga, Ti e fakalogo kiate au a nea fuli ala e taka i le vao.

¹² Ka na kau fia kai, na leaise kau fakasa atu loa kiate koe, Talie ko le malama nei mo nea fuli ala e maua i ai a aku.

¹³ Pe kau kai le kanomate o le pipi tagata ? Pe kau inu le toto o koti tagata ?

¹⁴ Ke ke momoli ni sakilifisio ki le Atua ko ni fakafetai, Ti ke ke fai au fakapapau ki le Taualuga.

¹⁵ Ti ke ke fetapa mai kiate au i le aso o le mamae ; Ti e kau saofaki loa a koe, ti e ke fakakololia loa kiate au.

¹⁶ Ti e pati le Atua ki le tagata agaveli : Kolea e ke lau ai aku lao, ti ke maua ai laku sai i lou gutu,

¹⁷ E koe leia e vesia ki manatu, Ti e tiaki ia aku folafola ki ou muli !

¹⁸ Kapau e ke tio ki se tagata kaia, e ke fiafia mo ia, Ti e ke maua lou vaega i le kau tono.

¹⁹ E ke tuku lou gutu ki le veli, Ti ko lou alelo e fakatupu ia le kaka.

²⁰ E ke tonatona, ti e ke masau veli ki lou taina, E ke lau veli ki le vosa o lou tinana.

²¹ Ko lena le nea leia e ke fai, ti na kau fakaleemu. Na ke pati i lou loto e kau tatau mo koe ; Kae e kau valoki loa a koe, ti e kau tuku loa nea fuli ki ou mua.

²² Koia ke kotou tokaga ai, koutou ala e galoi ia le Atua, Ke aua na kau sae ia koutou, kae e leaise tasi ke saofaki.

²³ Ko leia e momoli ia ni sakilifisio ko ni fakafetai e fakakololia kiate au ; Ti ko leia e tokaga ki lona ala, E kau fakatio loa a ia ki le fakamauli o le Atua.