Pesalemo 46 - Tosi Tapu

Ko le Atua ko lotatou mumuniaga ti ko lotatou makekeaga

¹ Ki le pule o le kau sua. O vosa o Kole. I le nota o le alamote. Katiko.

² Ko le Atua ko se ulufaga mo se fanakiaga kia tatou, Ko se tokoi leia e leaise toe puli i le temi o le mamae.

³ Koia e leaise motou i ai mo ka galulu le kele, Ti mo sosolo ai a mauga i loto malie o le tai,

⁴ Mo ka gugulu ai ti mo piau ai a galu o le tai, Ti mo lotou malaga ai ki aluga o lui a mauga. - Manava.

⁵ E i ai se vaitafe leia e fakafiafia ia e ona vai le kolo o le Atua, Le sagatualio o nofoaga o le Taualuga.

⁶ E agai le Atua i loto malie o le kolo : e leaise galulu loa a ia ; E tokoi le Atua kiate ia talu mei le mafoata.

⁷ E taugaoi ni puleaga, ti e sosolo ni puleaga ; Kae ka fakasa e ia lona leo, ti e liliu o vai le malama nei i le i.

⁸ E kau mo matou le Eteleno o kau tau, Ko le Atua o Sakopo, ko se kolo ulufaga a ia kia matou. - Manava.

⁹ Ke kotou au, ke kotou tio ki gaoi a le Eteleno, Ki maumau ala na fai e ia i le malama nei !

¹⁰ Ko ia leia na fakagato ia a tau o kaku ki potupotu o le malama nei ; Na fatii e ia le gasau ti na motusi e ia le tao, Na tutu e ia ki le afi a saliote tau.

¹¹ Ke kotou tuku, ti ke kotou iloa ko au ko le Atua : E kau pule ki atu puleaga, ti e kau pule ki le malama nei.

¹² E kau mo matou le Eteleno o kau tau, Ko le Atua o Sakopo ko se kolo ulufaga kia matou. - Manava.