Pesalemo 42 - Tosi Tapu

Ko le amanaki malie ki le Atua

¹ Ki le pule o le kau sua. Katiko a vosa o Kole.

² Ofaipe se tia e fakaamu ki ni tafeaga vai, E fakaamu foki loku laumalie kiate koe, ei Atua !

³ E fia inu loku laumalie ki le Atua, ki le Atua mauli : E kau ano loa afea o sa ki mua o le Atua ?

⁴ Ko laku nea kai i le ao mo le po ko oku loimata, Talie e leaise toe gato le pati mai kiate au : kofea lou Atua ?

⁵ E kau manatui le temi leia na kau saele ai kae takatakai au e le kakai, Ti na kau taki ai latou ki le fale o le Atua, i loto malie o ni kalaga fakafiafia mo ni fakafetai A se kakai toka api i aso lalasi.

⁶ Kolea e ke mamae ai, ei loku laumalie, ti e ke tagi ai i loku loto ? Ke ke amanaki malie ki le Atua, talie e kau toe fakafetai loa kiate ia : Ko ia ko loku fakamauli mo loku Atua.

⁷ E mamae loku laumalie i loku loto : Koia e kau manatu ai kiate koe, mei le fenua o Solotane, Mei le mauga o Elemoni, mei le mauga o Miseale.

⁸ E kalaga se tasi vaitafe ki se tasi vaitafe ; E fakalaka ou vai fuli mo au galu fuli iate au.

⁹ I le aso, na tuku mai e le Eteleno lona kalasia kiate au ; I le pouli na kau sua ona fakavikiviki, Na kau fai se kole ki le Atua o loku mauli.

¹⁰ E kau pati ki le Atua, loku utu : Kolea e ke galoi ai au ? Kolea e tonu ai ke kau saele i le mamae, I le fakaveliveli a le fili ?

¹¹ E fatifati oku ivi mo ka nukinuki mai kiate au latou e fakaveliveli kiate au, O pati tuumau mai kiate au : Kofea lou Atua ?

¹² Kolea e ke mamae ai, ei loku laumalie, ti e ke tagi ai i loku loto ? Ke ke amanaki malie ki le Atua, talie e kau toe fakafetai loa kiate ia. Ko ia ko loku fakamauli mo loku Atua.