Pesalemo 36 - Tosi Tapu

Ko le tagata agaveli mo lona tautea

¹ Ki le pule o le kau sua. A le tagata fakasausau a le Eteleno, a Tavite.

² E logo le masau veli a le tagata agaveli i loku loto. E leaise nofo le i ki le Atua i ona mua.

³ Talie e fanaki valea a ia kiate ia totonu, Ke fagai ai lona agaveli Ke fakamakona ai lona vesia.

⁴ Ko masau o lona gutu ko le loi mo le kaka ; E fakafiti a ia ki le poto mo le malie.

⁵ E metitasio a ia ki le veli i lona moeaga ; E tuu a ia i se ala leia e leaise malie ; E leaise vesia a ia ki le veli.

⁶ Eteleno ! E kaku lou agamalie ki le atu lagi, Lou agatonu ki atu ao.

⁷ Ko lou faitotonu e faipe atu mauga o le Atua, Ko au fakamaauaga e faipe le moana loloto. Eteleno ! e ke fakamauli a tagata mo manu.

⁸ E lasi ai lou agamalie, ei Atua ! E afa e vosa o le tagata se mumuniaga i le malu o ou kapakau.

⁹ E lotou kai makona i le mou koloa o lou fale, E ke fakainu latou i le liua o au nea malilie.

¹⁰ Talie e iate koe le matapuna o le mauli. I lou malama e motou tio ai ki le malama.

¹¹ Ke folasi lou agamalie kia latou ala e iloa ia a koe, Mo lou faitotonu kia latou ala e loto sako !

¹² Ke aua na kaku mai kiate au le vae o le tagata fia nealasi, Ti ke aua na kau sola i mua o le lima o le tagata agaveli !

¹³ Kua sisiga latou ala e fai ia le veli ; Kua ti latou ki lalo, ti e leaise mafai ke lotou toe tuu ki aluga.