Pesalemo 34 - Tosi Tapu

Fakafetai i le oki o le saofaki

¹ Pesalemo a Tavite. I lana fakatautau le tagata valea i mua o Apimeleke, ti mo lona kapu e Apimeleke, o ano ai.

² E kau fakafetai loa ki le Eteleno i temi fuli ; E tuu mau loa lona fakavikiviki i loku gutu.

³ Ke fakakololia loku laumalie i le Eteleno ! Ke logo ki ai latou e mamae ti ke lotou fiafia !

⁴ Ke kotou siki mo au le Eteleno ! Ke tou vikiviki fakatasi ki lona suafa !

⁵ Na kau afa le Eteleno, ti na tali mai a ia kiate au, Na fakamauli e ia au i oku mamae fuli.

⁶ Ka fulusi otou mata kiate ia, e tou gigila loa i le fiafia, Ti e leaise apele loa otou mata i le luma.

⁷ Ka tagi se tagata e mamae, e logo le Eteleno, Ti e fakamauli e ia a ia i ona mamae fuli.

⁸ E nofo le aselo o le Eteleno o takatakai latou ala e i kiate ia, Ti e taaki e ia latou i le tutamaki.

⁹ Ke kotou logoi ti ke kotou tio ki le malie o le Eteleno ! Manuia le tagata leia e afa ia lona mumuniaga iate ia !

¹⁰ Ke kotou i ki le Eteleno, kotou fuli ko ana kau sagato ! Talie e leaise puli se nea kia latou ala e i kiate ia.

¹¹ E pakupaku ti e fia inu a uviki laione, Kae e leaise puli se nea kia latou ala e afa ia le Eteleno.

¹² Ke kotou au, ei oku vosa, ke kotou fakalogo mai kiate au ! E kau ako loa kia koutou le i ki le Eteleno.

¹³ Ko le tagata fea leia e alofa ki le mauli, Leia e oli ke fakatologa a ia i le manuia ?

¹⁴ Ke ke taofi lou alelo i le veli, Mo ou laugutu i masau kaka.

¹⁵ Ke ke fakamamao i le veli, ti ke ke fai le nea leia e malie. Ke ke afa le tokamalie, ti ke ke tuli a ia.

¹⁶ E tio a mata o le Eteleno ki le kau agatonu, Ti e logo ona taliga ki alatou tagi.

¹⁷ E itaita a mata o le Eteleno ki le kau agaveli, Ke motusi olatou tukualofa i le malama nei.

¹⁸ Ka tagi le kau agatonu, e logo le Eteleno, Ti e fakamauli e ia a ia i ona mamae fuli.

¹⁹ E ofi le Eteleno kia latou ala e loto fatifati, Ti e fakamauli e ia latou ala e loto mamae.

²⁰ E lasi a mamae o le tagata agatonu, Kae e fakamauli a ia e le Eteleno o lee gato.

²¹ E taupau e ia ona ivi fuli, E leaise fati sona ivi fua e tasi.

²² E tamate e le malaia le tagata agaveli, Ti e tautea a fili o le tagata agatonu.

²³ E fakamauli e le Eteleno le laumalie o ana tagata fakasausau ; Ti e leaise sao i le tautea latou fuli ala e mumuni iate ia.