Pesalemo 24 - Tosi Tapu

Ulu o le sau o le kololia ki lona fale tapu

¹ Pesalemo a Tavite. A le Eteleno le kele mo nea fuli e maua i ai ; Le malama nei mo latou fuli e nonofo i ai !

² Talie na fakatuu e ia le kele i aluga o atu tai, Ti na fakamakeke e ia a ia i aluga o vaitafe.

³ Ko ai e feala loa ke pale ki le mauga o le Eteleno ? Ko ai e malaga loa o kaku ki lona potu maokioki ?

⁴ Ko leia e saosaoa ona lima ti e mea lona loto ; Ko leia e leaise tuku ia lona laumalie ki le loi, Ti e leaise fakapapau i le kaka.

⁵ E maua loa e ia le tapuakina a le Eteleno, Le manava alofa o le Atua o lona fakamauli.

⁶ Ko lena le vaega o le tautupu leia e fetapa kiate ia, O latou ala e afa ia ou mata, Atua o Sakopo ! - Manava.

⁷ Matapa, ke kotou siki ki aluga okoutou kau matapa ; Ke kotou malaga ki aluga, matapa lee gato ! Ke kotou tuku ke ulu le sau o le kololia !

⁸ Ko ai le sau lena o le kololia ? Ko le Eteleno makeke mo mafimafi, Le Eteleno toa i tau.

⁹ Matapa, ke kotou siki ki aluga okoutou kau matapa ; Ke kotou siki latou ki aluga, matapa lee gato ! Ke kotou tuku ke ulu le sau o le kololia !

¹⁰ Ko ai le sau lena o le kololia ? Ko le Eteleno o kau tau : Ko lena le sau o le kololia ! - Manava.