Pesalemo 147 - Tosi Tapu

Mafimafi o le Atua ki Iselaele

¹ Kotou fakafetai ki le Eteleno ! Talie e fulumalie ke sua fakafetai ki lotatou Atua ; Talie e malie ti e gali ke fakafetai kiate ia.

² E toe laga e le Eteleno Selusalemi, E fakatasi e ia le kau popula o Iselaele ;

³ E fakamauli e ia latou ala e loto fatifati, E sai e ia olatou lavea.

⁴ E iloa e ia le lasi o fetuu, E soli e ia kia latou fuli ni igoa.

⁵ E lasi lotatou Aliki, ti e lasi ai lona makeke ; E leai se gatoaga o lona atamai.

⁶ E tokoi e Eteleno leia e mamae, Kae tuku e ia ki le kele le kau agaveli.

⁷ Kotou sua ni fakafetai ki le Eteleno, Kotou siki lotatou Atua i le alepe !

⁸ E kofu e ia le lagi ki ao ; E teuteu e ia le ua ki le kele ; E fakasosomo e ia le vao i aluga o mauga.

⁹ E soli e ia le nea kai ki manu lalasi, Ki uviki o le kolopo mo ka lotou tagi.

¹⁰ E leaise fanaki a ia ki le makeke o le osi, E leaise tuku e ia lona fiafia ki vae o le tagata ;

¹¹ E alofa le Eteleno kia latou ala e i kiate ia, Latou ala e amanaki malie ki lona agamalie.

¹² Selusalemi, fakafetai ki le Eteleno ! Sione, fakafetai ki lou Atua !

¹³ Talie e fakamakeke e ia a ukamea fakamau o ou matapa, E tapuaki a ia ki ou vosa i loto malie o ou ;

¹⁴ E toe tuku e ia le tokamalie ki lou fenua, E fakamakona e ia a koe ki le fulumeto saosaoa.

¹⁵ E kakau e ia ana fakatotonu ki le malama nei ; E makape lana folafola i le gasolo katoa.

¹⁶ E soli e ia le nive ofaipe le fului akeno, E liligi e ia le sasau aisi ofaipe le mugalafu ;

¹⁷ E laku e ia lana ua fefeka. Ko ai e mafai ke tuu i mua o le momoko !

¹⁸ E kakau e ia lana folafola, ti e liliu le aisi o vai ; E fakaagi e ia lana matagi, ti e sali a vai.

¹⁹ E fakasa e ia lana folafola kia Sakopo, Ana lao mo ana fakatotonu ki Iselaele ;

²⁰ Na leaise fai fenaaki e ia ki atu puleaga fuli, Ti e leaise lotou iloa fua ana fakatotonu. Kotou fakafetai ki le Eteleno !