Pesalemo 13 - Tosi Tapu

Faikole mo le fanaki i le temi faigataa

¹ Ki le pule o le kau sua. Pesalemo a Tavite.

² Eteleno, e kaku loa kiafea, lau galoi au ? E kaku loa kiafea lau fufu ou mata kiate au ?

³ E kaku loa kiafea laku nofo mo ni tuania i loku laumalie, Ti mo ni mamae i loku loto i aso fuli ? E kaku loa kiafea le malaga mai o loku fili kiate au ?

⁴ Eteleno, loku Atua, ke ke tio mai, ke ke tali mai kiate au ! Ke ke tuku ki oku mata le malama, O tupu ke aua na kau moe i le fia moe o le mate,

⁵ O tupu ke aua na pati loku fili : Kua kau malo iate ia ! Ti ke aua na fiafia latou e agatuu mai kiate au, mo ka kau siga.

⁶ Ko au, e kau fanaki ki lou agamalie, E kau maua le fiafia lasi i loku loto, o tupu ko lou fakamauli. E kau sua ki le Eteleno, talie na fai e ia se nea malie kiate au.