Pesalemo 107 - Tosi Tapu

Ko le kalasia o le Atua ki le kau popula

¹ Kotou fakafetai ki le Eteleno, talie e agamalie a ia, Talie e tologa lona manava alofa o lee gato !

² Ke fakasa le nea lena e latou ala na totogi e le Eteleno, Latou ala na saofaki e ia i le lima o le fili,

³ Ti na fakatasi e ia mei fenua fuli, Mei le potu esite mo le potu uesite, mei le potu noleto mo le tai !

⁴ Na lotou foli i le toafa, na lotou saele i le ganea lavaki ; Na leaise lotou maua se kolo leia ke lotou nonofo ai.

⁵ Na lotou mamae i le fia kai mo le fia inu ; Na gaegae olatou laumalie ia latou.

⁶ I lolatou mamae, na lotou tagi loa ki le Eteleno, Ti na saofaki loa e ia latou i olatou mamae.

⁷ Na taki loa e ia latou i le ala totonu, O tupu ke lotou kaku ki se kolo leia e mafai ke lotou nonofo ai.

⁸ Ke lotou fakafetai ki le Eteleno i lona agamalie, Ti mo ana nea malilie ki vosa o le tagata !

⁹ Talie na fakainu e ia le loto leia na fia inu, Na fakamakona e ia le loto leia na fia kai.

¹⁰ Ko latou ala na nonofo i le fakapouli mo le malu o le mate, Na mauli popula i le mamae mo tini,

¹¹ Talie na lotou agatuu ki folafola a le Atua, Talie na lotou vesia ki le akonaki a le Taualuga.

¹² Koia na fakataulalo loa e ia olatou loto ki le mamae ; Na lotou vivilo loa ki lalo, ti na leaise tokoi loa se tasi kia latou.

¹³ I lolatou mamae, na lotou tagi loa ki le Eteleno, Ti na saofaki loa e ia latou i olatou mamae.

¹⁴ Na fakamavae loa e ia latou i le fakapouli mo le malu o le mate, Ti na motusi loa e ia olatou sai.

¹⁵ Ke lotou fakafetai ki le Eteleno i lona agamalie Ti mo ana nea malilie ki vosa o le tagata !

¹⁶ Talie na maumaui e ia a matapa sila, Na maumaui e ia a loka ukamea.

¹⁷ Na mamae le kau vale o tupu ko lolatou mauli i le agasala Ti mo alatou agaveli ;

¹⁸ Na fakalialia olatou laumalie ki nea kai fuli, Ti na lotou nofo fua i tafa o le matapa o le mate ;

¹⁹ I lolatou mamae, na lotou tagi loa ki le Eteleno, Ti na saofaki loa e ia latou i olatou mamae ;

²⁰ Na kakau loa e ia lana folafola o fakamauli latou, Na saofaki loa e ia latou i le popoko.

²¹ Ke lotou fakafetai ki le Eteleno i lona agamalie, Ti mo ana nea malilie ki vosa o le tagata !

²² Ke lotou fai ni sakilifisio fakafetai, Ti ke lotou logologo ana gaoi i ni kalaga fakafiafia !

²³ Ko latou ala na ifo ki le tai i ni vaka, Ti na gaoi i aluga o atu vai lalasi,

²⁴ Ko latou ana na tio loa ki gaoi a le Eteleno Mo ana nea malilie i loto malie o le loloto.

²⁵ Na pati loa a ia, ti na fakaagi loa e ia le afa, Leia na laga ia loa a piau o le tai.

²⁶ Na lotou pale loa ki le atu lagi, ti na lotou vivilo loa ki le loloto ; Na gaegae loa olotou laumalie i mua o le tutamaki ;

²⁷ Na lotou mata ninimo loa, ti na lotou sisiga loa ofaipe ni tagata konana, Ti na ano noa loa lolatou poto katoa.

²⁸ I lolatou mamae, na lotou tagi loa ki le Eteleno, Ti na saofaki loa e ia latou i olatou mamae ;

²⁹ Na taofi loa e ia le afa, ti na toe aumai loa e ia le tokamalie, Ti na fakalologo loa a galu.

³⁰ Na lotou fiafia loa i le tokamalie o le tai, Ti na taki loa latou e le Eteleno ki le taulaga leia na lotou oli ki ai.

³¹ Ke lotou fakafetai ki le Eteleno i lona agamalie, Ti mo ana nea malilie ki vosa o le tagata !

³² Ke lotou siki a ia i le fakatasiga o le kakai, Ti ke lotou fakafetai kiate ia i le fakatasiga o le kau matua !

³³ E fakaliliu e ia a vaitafe o toafa, Ti mo matapuna vai ko ni ganea malo,

³⁴ Le kele mauli ko se kele kaka, O tupu ko le agaveli o lona kakai.

³⁵ E fakaliliu e ia le toafa ko se tanakiaga vai, Ti mo le kele malo ko ni matapuna vai,

³⁶ Ti e fakanofo e ia i ai latou ala e fia kai. E lotou laga se kolo ke lotou nonofo ai ;

³⁷ E lotou fai ni faisaga, e lotou to ni vite, Ti e lotou tau loa olatou fua.

³⁸ E tapuaki a ia kia latou, ti e lotou liliu o toka api ai, Ti e leaise toe tamate loa e ia alatou kau manu.

³⁹ Kae e liliu loa a iki o lavaki mo luma, Ti e lotou tua piko i le popula, mo le malaia, mo le mamae ;

⁴⁰ E fakamamaei e ia le kau lalasi, Ti e fakafoli e ia latou i ni toafa sala ala.

⁴¹ Kae e toe lagai e ia le tagata mativa, o saofaki a ia i le mamae ; E liuliuga e ia a famili ofaipe ni kau manu.

⁴² E tio ki ai le kau agatonu ti e lotou fiafia, Kae e tapono e ia a gutu o le kau agasala.

⁴³ Ke tokaga leia e poto ki nea ana, Ti ke matala a ia ki agamalie o le Eteleno.