Mikea 2 - Tosi Tapu

Le agaveli mo le tautea o Iselaele

¹ Malaia kia latou ala e fakakaukau ia le agaveli mo teuteu ia le veli i olatou moeaga ! I le mafoata e lotou fai a ia, Mo ka e lotou maua ia le pule i olatou lima.

² E lotou manumanu ki ni faisaga, ti e lotou too fakamakeke latou ; Ni fale, ti e lotou too fakamakeke latou ; E lotou too fakamakeke le tagata mo lona famili, Le tagata mo lona tofiga.

³ Koia leia e folafola ai le Eteleno : Ko leinei, e kau fakakaukaui loa ki le kakai lena se malaia ; E leaise kotou fakasao loa i ai okoutou ua, Ti e leaise kotou saele loa mo le ulu e tuu sako, Talie e veveli loa a temi ana.

⁴ I le aso lena, e fakaliliu loa koutou ko se nea fakakata. E fai loa ni tagi mamae, E pati loa : Kua motou maumau katoa ! E soli e ia ki iki le vaega o loku kakai ! Kolea koia ! E too e ia loku vaega ! E tufa e ia amatou faisaga ki le fili !…

⁵ Koia leia e leaise ke maua ai loa se tasi Leia e toso ia le afo i se koga kele, I le fakatasiga a le Eteleno.

⁶ E lotou pati : Aua na kotou kikite ! Ke aua na kotou kikite ni nea fenaaki ! E leaise koi oki a lauveli !

⁷ Fale o Sakopo, pe ke toa i le masau felaaki ? Pe ita vave le Eteleno ? Pe ko lana fai masani a ia ? Pe leaise malie aku masau Ki leia e saele i le agatonu ?

⁸ Talu mei fualoa na fai loku kakai ofaipe se fili ; E kotou too le taupulupulu i aluga o kofu O latou ala e saele i le tokamalie, I le liliu mei le tau.

⁹ E kotou kapu a fafine o loku kakai mei olatou fale ala e lotou pipiki ki ai. E kotou too loku kololia i alatou fanau o lee gato.

¹⁰ Kotou tutuu ki aluga, kotou saele ! talie e leaise ko se ganea malolo leinei ; O tupu ko le kelekele, e i ai loa ni mamae, ni mamae lalasi.

¹¹ Kapau e makape se tagata i muli o le matagi ti e fai ia ni loi : E kau fai loa ni kikite kiate koe o uiga mo le vino, mo kava makeke ! Ko lena loa se polofeta ki le kakai lena.

¹² E kau fakatasi fuli loa a koe, ei Sakopo ! E kau fakatasi loa a toetoega fuli o Iselaele, E kau fakatasi loa latou ofaipe ni ovi o se fale manu, Ofaipe se kau manu i lolatou lotoa manu ; E i ai loa se logoa lasi o tupu ko le lasi o tagata.

¹³ Ko leia e fakamavaa ia loa le ala e pale loa i olatou mua ; E lotou fakamavaa loa se uluaga, e lotou fakalaka loa i le matapa ti e lotou ulu loa ki fafo ; E saele loa lolatou sau i olatou mua, Ti e ano loa le Eteleno i lolatou ulu.