Mateo 1 - Tosi Tapu

Sakoga o Sesu ia Salomone mo Sosefo

¹ Ko le sakoga o Sesu-Kilisito, vosa o Tavite, vosa o Apalaamo.

² Ko Apalaamo na tupu ai Isaake ; ko Isaake na tupu ai Sakopo ; ko Sakopo na tupu ai Suta mo ona fetaina ;

³ ko Suta na tupu ai Pelesi mo Sala kia Tamale ; ko Pelesi na tupu ai Eselome ; ko Eselome na tupu ai Alame ;

⁴ ko Alame na tupu ai Aminatape ; ko Aminatape na tupu ai Naasone ; ko Naasone na tupu ai Salamone ;

⁵ ko Salamone na tupu ai Poase kia Laape ; ko Poase na tupu ai Opeto kia Lute ;

⁶ ko Opeto na tupu ai Isaia ; ko Isaia na tupu ai Tavite. Ko le sau ko Tavite na tupu ai Salomone ki le avaga o Ulio ;

⁷ ko Salomone na tupu ai Lopoamo ; ko Lopoamo na tupu ai Apisa ; ko Apisa na tupu ai Asa ;

⁸ ko Asa na tupu ai Sosafate ; ko Sosafate na tupu ai Solame ; ko Solame na tupu ai Osiasi ;

⁹ ko Osiasi na tupu ai Soatame ; ko Soatame na tupu ai Akase ; ko Akase na tupu ai Esekiasi ;

¹⁰ ko Esekiasi na tupu ai Manase ; ko Manase na tupu ai Amone ; ko Amone na tupu ai Sosiasi ;

¹¹ ko Sosiasi na tupu ai Sekoniasi mo ona fetaina, i le temi o le ave fakapopula ki Papilone.

¹² I le oki o le popula i Papilone, ko Sekoniasi na tupu ai Salatiele ; ko Salatiele na tupu ai Solopapele ;

¹³ ko Solopapele na tupu ai Apiuti ; ko Apiuti na tupu ai Eliakimi ; ko Eliakimi na tupu ai Asole ;

¹⁴ ko Asole na tupu ai Satoke ; ko Satoke na tupu ai Akimi ; ko Akimi na tupu ai Eliuti ;

¹⁵ ko Eliuti na tupu ai Eleasale ; ko Eleasale na tupu ai Matane ; ko Matane na tupu ai Sakopo ;

¹⁶ ko Sakopo na tupu ai Sosefo, avaga o Malia, leia na fanaui ia Sesu, leia na igoa ko Kilisito.

¹⁷ Na fakatasi fuli loa ko le kau agafulu tupu fa tautupu meia Apalaamo o kaku mai kia Tavite, ti mo le kau agafulu tupu fa tautupu meia Tavite o kaku mai ki le popula i Papilone, ti mo le kau agafulu tupu fa tautupu mei le ave popula ki Papilone o kaku mai kia Kilisito.

Tupu fakamilakulo o Sesu-Kilisito

¹⁸ Ko leinei loa le anoaga o le tupu o Sesu-Kilisito : Ko Malia, lona tinana, na fakatasi mo Sosefo, ti e i mua o lala nonofo fakatasi, na tinae a ia i le Laumalie Maokioki.

¹⁹ Ko Sosefo, lona avaga, ko se tagata malie mo agatonu, ti na leaise fia fakamatagafua e ia a Malia, koia na fakatotonu ai loa e ia ke veteki fakafufu lala fakatasi.

²⁰ Na lolotoga fakakaukau a ia ki le nea lena, ti na fokifa kua sa se aselo o le Aliki kiate ia i se moe miti, o pati : Sosefo, vosa o Tavite, aua na ke i i le too o Malia lau avaga, talie ko le toe leia e tinae ai e au mei le Laumalie Maokioki.

²¹ E fanaui loa e ia se tama, e ke soli loa kiate ia le igoa ko Sesu, talie ko ia loa leia ka saofaki ia loa lona kakai mei alatou agasala.

²² Na soko a nea fuli ana ke fakasoko ai le nea leia na fakasa e le Aliki i le polofeta :

²³ Ko leinei, e tinae loa le taupoou, e fanaui loa e ia se vosa, ti e soli loa kiate ia le igoa ko Emanuele, ko lona uiga ko le Atua mo tatou.

²⁴ I lana ala ake, na fai loa e Sosefo le nea leia na fakatotonu ake kiate ia e le aselo o le Aliki, ti na too loa e ia lona avaga mo ia.

²⁵ Kae na leaise iloa e Sosefo a Malia o kaku ki le fanaui e Malia se tama, leia na tuku ki ai e Sosefo le igoa ko Sesu.