Luka 7 - Tosi Tapu

Fakamauli o le tagata fakasausau a le setulio Loma

¹ I le oki o folafola fuli ana i mua o le kakai leia na fakalogo kiate ia, na ulu loa Sesu ki Kafanaume.

² Na maua e se setulio sana tagata fakasausau, leia na alofa lasi a ia ki ai. Ti na masaki le tagata fakasausau lena, o teiteiki ke mate.

³ I le logo a le setulio ki le masau kia Sesu, na kakau loa e ia kiate ia ni kau fakamatuatua o le kau Sutea, ke kolekole kia Sesu ke au o fakamauli lana tagata fakasausau.

⁴ Na lotou kaku loa kia Sesu, ti na lotou kole fakamalotoloto loa kiate ia, o pati : E tonu ai ke ke tokoi ki le tagata leinei ;

⁵ talie e alofa a ia ki lotatou kakai, ti ko ia leia na laga ia lotatou sinakoka.

⁶ Na ano loa Sesu mo latou. Ti kua ofi a ia ki le fale, kae na kakau loa e le setulio ni iki ke ano o pati kiate ia : Aliki, aua na ke fakapakia ; talie e leaise kau gali ke ke ulu mai ki loku fale.

⁷ Koia na kau manatu ai e leaise gali ke kau natu totonu kiate koe. Kae pati mai fua se folafola e tasi, ti e mauli loa laku tagata fakasausau.

⁸ Talie ko au leia e fakalogo foki ki ni pule e kau pule foki ki ni tagata solia ; ti e kau pati ki se tasi : Ano ! Ti e ano a ia ; ti e kau pati ki leia : Au ! Ti e au a ia ; ti e kau pati ki laku tagata fakasausau : Fai le nea lena ! Ti e fai e ia.

⁹ I le logo a Sesu ki masau ana, na viki loa e ia le setulio, ti na maliu loa a ia ki le kakai leia na muli mai iate ia, o pati : E kau fakasa kia koutou, i Iselaele foki na leaise kau maua se tui lasi feneeki.

¹⁰ I le toe liliu ki fale a le kakai leia na kakau e le setulio, na lotou maua loa kua mauli le tagata fakasausau leia na masaki.

Fakamauli o le tama o le fafine lokonui o Naini

¹¹ I leia ake a aso, na ano loa Sesu ki se kolo na igoa ko Naini ; ti na ano mo ia ana tisipulo mo se kakai toka api.

¹² Ti kua ofi a ia ki le matapa o le kolo, ko leinei, na amo ki fafo se mate, ko se tama fuatasi o se fafine lokonui ; ti na ano mo ia se kakai toka api o le kolo.

¹³ I le tio a le Aliki ki le fafine, na manavaalofa loa a ia kiate ia, o pati : Aua na ke tagi !

¹⁴ Ti na fakafeofi loa a ia o fafa ki le pusa o le mate. Ti na tuu loa le kau amo. Ti na pati loa a ia : Tupulaga, e kau pati atu kiate koe, tuu ki aluga !

¹⁵ Ti na tonatona loa le mate, o kamata masau. Ti na tuku loa a ia e Sesu ki lona tinana.

¹⁶ Na maua loa e le kakai katoa se i, ti na lotou fakakololia loa ki le Atua, o pati : Kua sa se polofeta lasi ia tatou, ti kua fakatele le Atua ki lona kakai.

¹⁷ Na mafola loa le logologona o Sesu i Sutea katoa ti mo ona tafatafa fuli.

Viki e Sesu o Soane-Patita

¹⁸ Na logo loa Soane ki nea fuli ana i lana kau tisipulo.

¹⁹ Ti na kalagai loa e ia se toka lua ia latou, o kakau laua kia Sesu, o vesili kiate ia : Pe ko koe leia e tonu ke au, pe tonu ke motou talitali ki se tasi ake ?

²⁰ Na la kaku loa kia Sesu, ti na la pati loa kiate ia : Na kakau mai maua e Soane-Patita ke ma au o vesili atu kiate koe : Pe ko koe leia e tonu ke au, pe tonu ke motou talitali ki se tasi ake ?

²¹ I le ola fai lena, na fakamauli loa e Sesu ni kakai toka api i olatou masaki, mo olatou maimoa, ti na kapu loa e ia ni laumalie veli, ti na fakatio loa e ia ni kivi toka api.

²² Ti na tali loa Sesu kia laua : Kolua ano o fakamatala kia Soane le nea leia kua kolua tio mo logo ki ai : Kua tio a kivi, kua saele a kito, kua mea a kilia, kua logo a tuli, kua toe tuuake a mate, kua fakasa le logo malie ki le kau mativa.

²³ Manuia leia e leaise tukia loa iate au !

²⁴ I le titua o tisipulo a Soane, na masau loa Sesu ki le kakai o uiga mo Soane : Kolea na kotou ano o tioi i le toafa ? pe ko se fa u leia e viligia i le matagi ?

²⁵ Leai ? Kolea na kotou ano o tio ? pe ko se tagata leia e kofu ki ni kofu mauiga ? Ko latou ala e kofu ki ni kofu mauiga ti mo fimalie, e nofo i fale o sau.

²⁶ Kolea koia na kotou ano o tio ki ai ? pe ko se polofeta ? E io, e kau pati atu kia koutou, e toe lasi ake a ia i le polofeta.

²⁷ Ko ia leia na masau ki ai i le Tosi : Ko leinei, e kau kakau laku tagata avelogo i ou mua, Ke teuteu ia lou ala i ou mua.

²⁸ E kau fakasa atu kia koutou, ia latou ala na tupu mei fafine, e leaise lasi ake se tasi ia Soane. Kae i le puleaga o le Atua, e lasi ake leia e ikiiki oki iate ia.

²⁹ Na logo le kakai katoa mo le kau popelikano kiate ia, ti na lotou fakamaoki ki le agatonu o le Atua, i lolatou papitema ki le papitema a Soane ;

³⁰ kae ko le kau faliseo mo le kau sekelipa, na lotou fakanoai le finegalo o le Atua kia latou, i lalatou fakafiti ke papitema latou e Soane.

³¹ Na toe pati loa Sesu : Ko ai e kau fakatatau loa ki ai a tagata o le tautupu nei, ti ko ai e lotou tatau loa mo ia ?

³² E lotou faipe ni toe ala e nonofo o manonogi i lamatua, ti e kalaga a iki ki la, o pati : Kua motou ta se lagi ke kotou mako, ti na leaise kotou mako ; kua motou sua atu kia koutou ni laumate, ti na leaise kotou tagilaulau.

³³ Talie kua au Soane-Patita, o leaise kai e ia se pane ti mo inu e ia se vino, ti na kotou pati : E iate ia se temonio.

³⁴ Kua au le Vosa o le tagata, o kai mo inu, ti e kotou pati : Kotou tio, ko le tagata kai mo inu vino, ti ko le kaukau nea a ia o le kau popelikano mo le kau agasala.

³⁵ Kae na fakatonuia le poto o le Atua e ana fanau fuli.

Sesu i le fale o Simone

³⁶ Na kole loa e se tagata faliseo kia Sesu ke kai mo ia. Ti na ulu loa Sesu ki le fale o le faliseo, o eke ki le laupapa.

³⁷ Ti ko leinei, na nofo se fafine agasala i le kolo, ti na logo loa a ia kua kai Sesu i le fale o le faliseo, ti na too loa e ia se ipu alapate kua apele i se kaloni,

³⁸ ti na ano loa a ia o nofo i vae o Sesu, mei muli. Na tagi a ia, ti na kamata fakasusu loa e ia a vae o Sesu ki ona loimata, ti na solo loa e ia laua ki lona lauulu, o sogi ki ai, ti na takai loa e ia laua ki le kaloni.

³⁹ Ko le faliseo leia na fakaafe ia Sesu, i lana tio ki le nea lena, na pati loa i lona loto : Kapau na polofeta maoki le tagata leinei, e iloa loa e ia pe ko ai le fafine leia e fafa kiate ia, mo lona anoaga totonu : ko se fafine agasala.

Folafola o tagata tuu maua e toka lua

⁴⁰ Na masau loa Sesu, o pati ki le tagata faliseo : Simone, e i ai le nea e kau fia pati atu kiate koe. Na tali loa Simone : Pule, masau.

⁴¹ Ti na pati loa Sesu : Na i ai se tagata leia na tuu maua ki ai ni tagata toka lua : Na tuu maua le tasi ki ni fa tenalio e kau lelau lima, ti ko leia ake ki fa tenalio e kau lima.

⁴² Talie na leaise la maua ia se nea ke ui ai ola maua, na soloi loa e le tagata kia laua toka lua ola maua. Ko ai loa ia laua e alofa lasi ake loa kiate ia ?

⁴³ Na tali loa Simone : E kau masalo, ko leia na lasi lona maua. Na pati loa Sesu kia Simone : E tonu lau tio.

⁴⁴ Ti na mafuli loa Sesu ki le fafine, mo pati kia Simone : E ke tio ki le fafine leinei ? Na kau ulu mai ki lou fale, ti na leaise ke soli mai kiate au se ga vai ke fufulu ai oku vae ; kae ko ia, kua fakasusu e ia laua ki ona loimata, ti kua solosolo e ia laua ki lona lauulu.

⁴⁵ Na leaise ke sogi mai kiate au ; kae ko ia, talu laku ulu mai ki lou fale, na leaise toe tuku e ia lana sogi ki oku vae.

⁴⁶ Na leaise ke liligi ia se lolo ki loku ulu ; kae ko ia, kua liligi e ia se kaloni ki oku vae.

⁴⁷ Koia e kau pati atu ai kiate koe, kua fakamolemole ana agasala ala na lasi ai ; koia leia na alofa lasi ai a ia. Kae ko leia e fakamolemole ikiiki ki ai e alofa ikiiki.

⁴⁸ Ti na pati loa Sesu ki le fafine : Kua fakamolemole au agasala.

⁴⁹ Ko latou ala na kakai mo Sesu, na pati loa i olatou loto : Ko ai a ia leinei e fakamolemole ia foki a agasala ?

⁵⁰ Kae na pati loa Sesu ki le fafine : Kua fakamauli a koe e lau tui, ano i le tokamalie.